ໃນວັນທີ 2 ຕຸລາ 2019 ນີ້ ກອງບັນຊາການທະຫານແຂວງສະຫວັນະເຂດ,ໄດ້ຈັດພິທີມອບເງິນອຸດໜູນໃຫ້ພະນັກງານພັກຜ່ອນຮັບບຳນານຈຳນວນ 2 ສະຫາຍ ລວມເງິນທັງໝົດ 34 ລ້ານ ກວ່າ ກີບ ໂດຍການເຂົ້າຮ່ວມເປັນປະທານ,ຂອງສະຫາຍພັນໂທ ຄຳຜົງ ພັດທະນາ ຄະນະພັກ ຮັກສາການຫົວໜ້າຫ້ອງການເມືອງກອງບັນຊາການທະຫານແຂວງສະຫວັນະເຂດ ພ້ອມດ້ວຍພະແນກການທີ່ກ່ຽວຂ້ອງເຂົ້າຮ່ວມ.

ໃນພິທີ ສະຫາຍ ພັນໂທ ສົມຕາ ສີລິປັນຍາ ຫົວໜ້າວຽກພະແນກພະນັກງານທະຫານແຂວງໄດ້ຂື້ນຜ່ານຂໍ້ຕົກລົງວ່າດ້ວຍການອະນຸມັດໃຫ້ນາຍທະຫານພັກການຮັບບຳນານສະບັບເລກທີ 1161 /ກປທ ລົງວັນທີ 22/3/2019 ອີງຕາມກົດໝາຍປະກັນສັງຄົມເລກທີ 34/ສພຊ ລົງວັນທີ 26/7/2013 ແລະ ອິງໃສ່ພະນັກງານທີ່ຮອດກຳນົດພັກການຮັບບຳນານ ໃນໂອກາດດັ່ງກ່າວນີ້ ສະຫາຍ ພັນໂທ ຄຳຜົງ ພັດທະນາ ຄະນະພັກ ຮັກສາການຫົວໜ້າຫ້ອງການເມືອງກອງບັນຊາການທະຫານແຂວງສະຫວັນະເຂດ,ກໍ່ໄດ້ມີຄໍາເຫັນໂອ້ລົມຕໍ່ພະນັກງານທີ່ພັກຜ່ອນບຳນານຄັ້ງນີ້ ເຊິ່ງສະຫາຍໄດ້ສະແດງຄຳຍ້ອງຍໍຊົມເຊີຍຕໍ່ຜົນງານທີ່ບັນດາສະຫາຍໄດ້ປະກອບສ່ວນສ້າງຄຸນງາມຄວາມດີໃຫ້ແກ່ປະເທດຊາດໃນໄລຍະຜ່ານມາ ພ້ອມທັງສະແດງຄວາມເຊື່ອໜັ້ນວ່າພາຍຫູັງພັກຜ່ອນບຳນານແລ້ວແຕ່ລະສະຫາຍຈະຕ້ອງໄດ້ສືບຕໍ່ປະກອບສ່ວນຊ່ວຍເຫຼືອອຳນາດການປົກຄອງກໍ່ຄືຊ່ວຍເຫຼືອສືກສາອົບຮົມລູກຫຼານ ແລະ ພໍ່ແມ່ປະຊາຊົນໃຫ້ປະຕິບັດລະບຽບກົດໝາຍບ້ານເມືອງ ເພື່ອໃຫ້ເຂົາເຈົ້າກາຍເປັນຄົນດີຂອງສັງຄົມ ແລະ ເປັນກຳລັງແຮງອັນສຳຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງຂື້ນໄປເລື້ອຍໆ

ພາບ – ຂ່າວ ພານິດ ພິລາວົງ