ໃນວັນທີ 2 ຕຸລາ 2019 ທ່ານ ຂັນທະວົງ ສະຫວັນອະໂນໄທ ຫົວໜ້າຫ້ອງການກະສິກຳ-ປ່າໄມ້ເມືອງ ພ້ອມດ້ວຍພະນັກງານວິຊາການທີ່ກ່ຽວຂອງ ໄດ້ລົງນຳພາພໍ່ແມ່ປະຊາຊົນບ້ານໂພນຢານາງ ເມືອງອຸທຸມພອນ ສ້າງຝາຍກັກເກັບນ້ຳຕາມສາຍຫ້ວຍທີ່ໄຫຼຜ່ານບ້ານ ເພື່ອກະກຽມນ້ຳ ໄວ້ສະໜອງໃນການຜະລິດກະສິກຳລະດູແລ້ງ.

ທ່ານ ເສົາ ເຫຼົາທອງຄຳ ນາຍບ້ານໆໂພນຢານາງ ໄດ້ໃຫ້ຮູ້ວ້າ: ເພື່ອເປັນການກະກຽມນ້ຳ ໄວ້ສະໜອງໃນ ການຜະລິດກະສິກຳລະດູແລ້ງ ແຕ່ລະປີ ທາງຄະນະອຳນາດການປົກຄອງບ້ານແມ່ນໄດ້ປະສານສົມທົບຫາຫ້ອງການ ກະສິກຳ-ປ່າໄມ້ເມືອງ ເພື່ອຂໍທິດຊີ້ນຳ. ເຊິ່ງການສ້າງຝາຍກັກເກັບນ້ຳຕາມສາຍຫ້ວຍທີ່ໄຫຼຜ່ານບ້ານ ກໍ່ແມ່ນວິທີໜຶ່ງ ທີ່ຈະເປັນການກະກຽມນ້ຳ ໄວ້ສະໜອງໃນການຜະລິດກະສິກຳລະດູແລ້ງ ນອກຈາກການຂຸດໜອງ ແລະ ການເຮັດ ຊົນລະປະທານ ເພາະຕ້ອງໃຊ້ງົບປະມານສູງ. ແຕ່ການສ້າງຝາຍດັ່ງກ່າວແມ່ນພຽງແຕ່ລະດົມການປະກອບສ່ວນທາງ ດ້ານເຮື່ອແຮງ ແລະ ວັດຖຸອຸປະກອນຈຳນວນໜຶ່ງນຳພໍ່ແມ່ປະຊາຊົນ ເພື່ອຂຸດດິນໃສ່ກະເປົາແລ້ວປ້ານເປັນຄັນເພື່ອ ຕັນນ້ຳໄວ້ ສ່ວນວ່າກະເປົາແມ່ນທາງຫ້ອງການກະສິກຳ-ປ່າໄມ້ເມືອງ ເປັນຜູ້ສະໜອງໃຫ້ ສຳຫຼັບຄັນຝາຍທີ່ຈະສ້າງ ແມ່ນມີຄວາມຍາວ ປະມານ 8 ແມັດ, ກວ້າງ 2,5 ແມັດ ແລະ ສູງ 2 ແມັດ.

ເຊິ່ງຈະໃຊ້ເວລາສ້າງປະມານ 5 ວັນ ຈຶ່ງຈະສຳເລັດ ແລະ ຖ້າວ່າຝາຍດັ່ງກ່າວສຳເລັດຕາມແຜນການ ມັນຈະເປັນແຫຼ່ງນ້ຳ ທີ່ສາມາດສະໜອງນ້ຳໃຫ້ແກ່ ການຜະລິດກະສິກຳລະດູແລ້ງ ທັງສອງຂ້າງຫ້ວຍ ກວມພື້ນທີ່ 25 ກວ່າເຮັກຕາ.
ທ່ານ ນາຍບ້ານໆໂພນຢານາງ ຍັງເວົ້າອີກວ່າ: ທັງນີ້; ກໍ່ເພື່ອເປັນການສ້າງຂະບວນການຮ່ວມກັນ ລະຫວ່າງ ອໍານາດການປົກຄອງຂັ້ນເມືອງ, ຂັ້ນບ້ານ ແລະ ປະຊາຊົນພາຍໃນບ້ານໃຫ້ມີຄວາມສາມັກຄີປອງດອງກັນຍິ່ງຂຶ້ນ ແລະ ທັງເປັນການສ້າງຂະບວນການ ຂຳນັບຮັບຕ້ອນໃຫ້ແກ່ກອງປະຊຸມໃຫຍ່ ຄັ້ງທີ VIII ຂອງອົງຄະນະພັກເມືອງ ອຸທຸມພອນ ນຳອີກດ້ວຍ.

ນັກຂ່າວເມືອງອຸທຸມພອນ ພອນປະເສີດ ແຜນພັກດີ