ໃນວັນທີ 2 ຕຸລາ 2019 ພົທ ວິໄລ ຫຼ້າຄຳຟອງ ລັດຖະມົນຕີກະຊວງ ປກສ ພ້ອມຄະນະ ໄດ້ມອບ ເຄື່ອງຊ່ວຍເຫລືອແກ້ໄຂໄພພິບັດທີ່ເກີດຂຶ້ນ ຈາກພະຍຸ ດີເປຼເຊິນ ຢູ່ແຂວງ ອັດຕະປື ເຊິ່ງພິທີມອບແມ່ນໄດ້ຈັດຂຶ້້ນທີ່ພະແນກແຮງງານ ແລະ ສະຫວັດດີການ-ສັງຄົມແຂວງ.
ເຄື່ອງຊ່ວຍເຫລືອທີ່ນຳມາມອບໃນເທື່ອນີ້ ມີເຄື່ອງອຸປະໂພກ 4 ລາຍການ ແລະ ເງິນຊ່ວຍ ເຫຼືອອີກຈຳນວນ 50 ລ້ານກີບ ເພື່ອປະກອບສ່ວນຊ່ວຍເຫລືອ ບັນເທົາທຸກໃຫ້ປະຊາຊົນ ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມ ກ່າວຮັບ ໂດຍແມ່ນ ທ່ານ ເລັດ ໄຊຍະພອນ ເລຂາພັກແຂວງ ເຈົ້າແຂວງ ອັດຕະປື ໂດຍມີຄະນຳທັງສອງພາກສ່ວນເຂົ້າຮ່ວມ.

ລັດຖະມົນຕີກະຊວງ ປກສ ແລະ ເຈົ້າແຂວງອັດຕະປື

ໂອກາດດຽວກັນ ທ່ານ ເລັດ ໄຊຍະພອນ ເຈົ້າແຂວງ ອັດຕະປື ໄດ້ສະແດງ ຄວາມຂອບອົກຂອບໃຈມາຍັງກະຊວງປ້ອງກັນຄວາມສະຫງົບ ກໍ່ຄື ພາກສ່ວນຕ່າງໆທັງພາຍໃນ ແລະ ຕ່າງປະເທດ ທີ່ເຫັນໄດ້ຄວາມສຳຄັນ ໃນການປະກອບສ່ວນຊ່ວຍເຫລືອ ຜູ້ປະສົບໄພພິບັດທາງ ທຳມະຊາດໃນຄັ້ງນີ້, ພ້ອມທັງສະແດງຄວາມຢືນຢັນວ່າ ຈະນຳເອົາເຄື່ອງຊ່ວຍເຫຼືອດັ່ງກ່າວທີ່ໄດ້ຮັບນີ້ ໄປມອບໃຫ້ປະຊາຊົນ ຜູ້ທີ່ໄດ້ຮັບຜົນກະທົບ ຕາມຄວາມເໝາະສົມຢ່າງແນ່ນອນ.

ພາບປະກອບ

ແຈ້ງໃຫ້ຊາບຕື່ມວ່າ: ອໍານາດການປົກຄອງ ແຂວງ ອັດຕະປື ໄດ້ເປັນເຈົ້າການຮີບຮ້ອນແຈກຢາຍເຄື່ອງບໍລິຈາກ ທີ່ໄດ້ຈາກພາກສ່ວນຕ່າງໆນັ້ນ ນຳໄປມອບໃຫ້ກັບປະຊາຊົນທີ່ໄດ້ຮັບຜົນກະທົບຈາກນໍ້າຖ້ວມໃນຕົ້ນເດືອນ ກັນຍາ 2019 ຜ່ານມາ ຢ່າງເລັ່ງດ່ວນ ພ້ອມທັງສືບຕໍ່ສໍາຫລວດເກັບກໍາຄອບຄົວຜູ້ທີ່ໄດ້ຮັບຄວາມເສຍຫາຍໜັກ ແລະ ຂາດເຂີນກ່ອນໝູ່ເພື່ອໃຫ້ການຊ່ວຍເຫລືອ, ປັດຈຸບັນ ຍັງໄດ້ສືບຕໍ່ເປີດຮັບບໍລິຈາກການຊ່ວຍເຫລືອຕ່າງໆຢູ່ ເຊິ່່ງທົ່ວແຂວງ ອັດຕະປື ຄາດຄະ ເນມູນຄ່າເສຍຫາຍທັງໝົດ 82 ຕື້ກວ່າກີບ ໃນນັ້ນ ມູນຄ່າຄວາມຕ້ອງການໃນການນໍາໄປຊ່ວຍເຫລືອຟື້ນຟູຄັ້ງນີ້ປະມານ 52 ຕື້ກີບ.