ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ເຄື່ອນໄຫວຢ້ຽມຢາມ ພ້ອມທັງພົບປະໂອ້ລົມການນຳຂັ້ນສູງຂອງແຂວງສະຫວັນນະເຂດ ໃນຄັ້ງວັນທີ 3 ຕຸລາ 2019 ນີ້ ທີ່ຫ້ອງປະຊຸມຊັ້ນ 4 ຫ້ອງວ່າການປົກຄອງແຂວງສະຫວັນນະເຂດ ເຂົ້າຮ່ວມຮັບຟັງການໂອ້ລົມຂອງທ່ານຮອງນາຍົກຄັ້ງນີ້ມີທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດພ້ອມຄະນະ ມີບັນດາທ່ານຫົວໜ້າແນກພະແນກການຕ່າງໆອ້ອມຂ້າງແຂວງເຂົ້າຮ່ວມນຳ.

ໂອກາດເຂົ້າຮ່ວມຮັບຟັງການໂອ້ລົມຂອງທ່ານຮອງນາຍົກລັດຖະມົນຕີ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ກໍ່ໄດ້ລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມໃນໄລຍະ 9 ເດືອນຜ່ານມາໃຫ້ຮູ້ວ່າ: ໃນ 9 ເດືອນຕົ້ນປີ GDP ຂະຫຍາຍຕົວໃນລະດັບ 8% (ແຜນ 9,5%) ມີມູນຄ່າ 12.148,81 ຕື້ກີບ, ເທົ່າກັບ 63,98% ຂອງແຜນການ (ແຜນ 18.987,7 ຕື້ກີບ) ໃນນັ້ນ: ກະສິກໍາ ເພີ່ມຂຶ້ນ 9,86% ກວມ 17,61%, ອຸດສະຫະກຳ ເພີ່ມຂຶ້ນ 7,88% ກວມ 45,12% ຂະແໜງບໍລິການ ເພີ່ມຂຶ້ນ 7,31% ກວມ 37,27%. ສະເລ່ຍໃສ່ຫົວຄົນໄດ້ 1.362 ໂດລາສະຫະລັດ. ໂດຍລວມແລ້ວການພັດທະນາເສດຖະກິດ-ສັງຄົມ ຂອງແຂວງຍັງໄປຕາມທິດການຫັນເປັນອຸດສາຫະກຳ ແລະ ທັນສະໄໝເທື່ອລະກ້າວ ຊຶ່ງຂະແໜງອຸດສາຫະກຳປຸງແຕ່ງ ເປັນຕົວຂັບເຄື່ອນເສດຖະກິດ ເປັນຕົ້ນ ໂລຫະທອງແດງ, ເຫຍື່ອເຈ້ຍ, ຢາສູບ, ອຸປະກອນ ພາບດີຈີຕ໋ອນ ແລະ ໃນເງື່ອນໄຂທີ່ມີຜົນກະທົບຈາກໄພພິບັດນ້ຳຖ້ວມໃນຄັ້ງນີ້, ຄາດຄະເນການຈັດຕັ້ງປະຕິບັດລວມຍອດຜະລິດຕະພັນພາຍໃນ ໝົດປີຈະບໍ່ສາມາດບັນລຸຕາມແຜນການ ໂດຍສະເພາະໃນຂະແໜງກະສິກຳ-ປ່າໄມ້.

ຈາກນັ້ນທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ກໍ່ໄດ້ມີຄຳເຫັນໂອ້ລົມຕໍ່ການນຳຂອງແຂວງເຊິ່ງກ່ອນອື່ນທ່ານກໍ່ໄດ້ສະແດງຄວາມເຫັນອົກເຫັນໃຈ ທີ່ແຂວງສະຫວັນນະເຂດຂອງພວກເຮົາໄດ້ຮັບຜົນກະທົບຈາກໄພນ້ຳຖ້ວມ ແລະ ໄພແຫ້ງແລ້ງເຊິ່ງມັນໄດ້ສົ່ງຜົນກະທົບຫຼາຍດ້ານຕໍ່ການພັດທະນາເສດຖະກິດ – ສັງຄົມຂອງແຂວງ ໂດຍສະເພາະກໍ່ແມ່ນການຜະລິດກະສິກຳເປັນສິນຄ້າ ອັນຫຼັກໆແມ່ນການຜະລິດເຂົ້າສົ່ງອອກ ສຳລັບຜະລິດຕະພັນອື່ນໆແມ່ນນຳເຂົ້າເປັນສ່ວນຫຼາຍ ຕໍ່ບັນຫາດັ່ງກ່າວນີ້ມັນໄດ້ສົ່ງຜົນກະທົບໄປເຖິງການຈັດເກັບລາຍຮັບລະດັບຊາດບໍ່ບັນລຸຕາມແຜນ ລວມທັງກະທົບຕໍ່ອັດຕາການແລກປ່ຽນເງິນຕາຕ່າງປະເທດມີຄ່າແຂງຂຶ້ນ ແລະ ດ້ານບັນຫາອື່ນໆກໍ່ຈະມີຜົນກະທົບຕາມໆກັນ

ພາບ – ຂ່າວ: ອັກສອນສິນ ພົມມະຈັນ
Medialaos Massmedia