ໃນວັນທີ 2 -3 ຕຸລາ 2019ນີ້; ອົງການໄອຍະການປະຊາຊົນເຂດ IV ແຂວງ ສະຫວັນນະເຂດ ໄດ້ຈັດການຝຶກອົບຮົມຍົກລະດັບໃຫ້ແກ່ເຈົ້າໜ້າທີ່ສຶບສວນ – ສອບສວນ ແລະ ພະນັກງານຫຼັກແຫຼ່ງອ້ອມຂ້າງເມືອງ ຂື້ນຢ່າງເປັນທາງການ. ຢູ່ທີ່ສະໂມສອນຂອງເມືອງ ອາດສະພັງທອງ, ໂດຍພາຍໃຕ້ການເຂົ້າຮ່ວມຂອງ ທ່ານ ອຸໄພວັນ ໄຊຍະວົງ ເຈົ້າເມືອງ ອາດສະພັງທອງ, ທ່ານ ໂພສີແກ້ວ ທິຣະວົງ ຮອງອົງການໄອຍະການປະຊາຊົນ ແຂວງ ສະຫວັນນະເຂດ, ນອກຈາກນັ້ນ; ກໍ່ມີຫົວໜ້າກອງບັນຊາການ ປ.ກ.ສ ເມືອງ, ການນຳຂັ້ນເມືອງເຈົ້າໜ້າທີ່ສຶບສວນ – ສອບສວນຈາກ ປ.ກ.ສ ເມືອງ, ປ.ກ.ສ ກຸ່ມບ້ານ 8 ກຸ່ມບ້ານ, ພະນັກງານອ້ອມຂ້າງເມືອງທີ່ກ່ຽວຂ້ອງຕະຫຼອດຮອດອຳນາດການປົກຄອງບ້ານໃນ6 ບ້ານເທດສະບານເມືອງກໍ່ເຂົ້າຮ່ວມຈໍານວນ 64 ຄົນ / 06 ຄົນ.

ສຳລັບຜູ້ເຂົ້າຮ່ວມຝຶກອົບຮົມແມ່ນໄດ້ຮຽນຮູ້ກ່ຽວກັບການປະມວນຜົນໃນການນຳໃຊ້ມາດຕະການສຶບສວນ – ສອບສວນ ແລະ ມາດຕະການສະກັດກັ້ນເຊີ່ງລວມມີ 6 ບົດຄື: ຫຼັກການຂອງການດຳເນີນຄະດີອາຍາລວມມີ 16 ຫຼັກການ, ອົງການທີ່ເຂົ້າຮ່ວມໃນການດຳເນີນຄະດີອາຍາປະກອບມີ 3 ອົງການເປັນຕົ້ນກໍ່ແມ່ນ ອົງການສຶບສວນ – ສອບສວນ, ອົງການໄອຍະການປະຊາຊົນ ແລະ ສານປະຊາຊົນ, ສາຍເຫດທີ່ພາໃຫ້ສຶບສວນ – ສອບສວນ ຫຼັກຖານໃນຄະດີອາຍາ, ມາດຕະການສຶບສວນ – ສອບສວນ ແລະ ມາດຕະການສະກັດກັ້ນຂອງການດໍາເນີນຄະດີ ອາຍາ.

ນອກຈາກນັ້ນຜູູ້ເຂົ້າຮ່ວມຍັງໄດ້ຮຽນຮູ້ກ່ຽວກັບກົດໝາຍວ່າດ້ວຍ ອົງການໄອຍະການປະຊາຊົນແຫ່ງ ສປປ ລາວ ສະບັບປັບປຸງ 2017 ລວມມີ 6 ພາກ 72 ມາດຕາ. ຜ່ານການຝຶກອົບຮົມຍົກລະດັບຜູ້ເຂົ້າຮ່ວມສາມາດເຂົ້າ ໃຈໄດ້ເຖີງ 80 %, ໃນຕອນທ້າຍກໍ່ໄດ້ຈັດພິທິມອບ – ຮັບ ໃບຢັ້ງຢືນໃຫ້ແກ່ຜູ້ເຂົ້າຮ່ວມຝຶກອົບຮົມໃນຄັ້ງນີ້ໂດຍແມ່ນທ່ານ ທ່ານ ໂພສີແກ້ວ ທິຣະວົງ ຮອງອົງການໄອຍະການປະຊາຊົນ ແຂວງ ສະຫວັນນະເຂດ,ໃຫ້ກຽດມອບຢ່າງສົມກຽດໂດຍຊ່ອງໜ້າກັບບັນດາສໍາມະນາກອນທີ່ເຂົ້າເປັນສັກຂີພິຍານນໍາດ້ວຍ.