ງານບຸນຊ່ວງເຮືອປະເພນີປະຈໍາປີ 2019 ທີ່ທ່ານໍ້າແກນ ເມືອງຫົງສາໄດ້ຈັດຂຶ້ນໃນວັນທີ 5-6 ຕຸລາ 2019 ນີ້. ໃຫ້ກຽດເຂົ້າຮ່ວມມີທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ທ່ານ ປອ ສົມລິດ ເປືອກແກ້ວ ປະທານສະພາປະຊາຊົນແຂວງ, ມີການນໍາຂອງແຂວງ, ຂອງເມືອງ, ແຂກຖືກເຊີນທັງພາຍໃນ ແລະ ຕ່າງປະເທດ ພ້ອມດ້ວຍມວນຊົນພາຍໃນເມືອງ, ຕ່າງເມືອງ ແລະ ຕ່າງແຂວງເຂົ້າຮ່ວມ.

ທ່ານ ຄໍາຫຼ້າ ຜີວວັນນາ ວ່າການເຈົ້າເມືອງ ເມືອງຫົງສາ ໄດ້ກ່າວເປີດງານຊ່ວງເຮືອ; ບາງຕອນທ່ານໄດ້ກ່າວວ່າ: ເທດສະການບຸນຊ່ວງເຮືອທີ່ທ່ານໍ້າແກນເມືອງຫົງສາປີນີ້ ແມ່ນກິດຈະກໍາໜຶ່ງທີ່ສໍາຄັນເປັນການປະກອບສ່ວນເຂົ້າໃນການສະເຫຼີມສະຫຼອງປີທ່ອງທ່ຽວລາວຈີນ 2019 ຂອງເມືອງຫົງສາກໍ່ຄືແຂວງໄຊຍະບູລີ ເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວເມືອງຫົງສານັບມື້ນັບຫຼາຍຂຶ້ນ ທັງເປັນການສ້າງຂະບວນການຮອບດ້ານເພື່ອຕ້ອນຮັບກອງປະຊຸມໃຫຍ່ອົງຄະນະພັກເມືອງຫົງສາຄັ້ງທີ VIII ທີ່ຈະໄຂຂຶ້ນໃນຕໍ່ໜ້ານີ້. ສະເພາະການຈັດງານບຸນປະເພນີຊ່ວງເຮືອປີນີ້ ເມືອງຫົງສາແມ່ນໄດ້ເຮັດໃຫຍ່ກວ່າທຸກໆປີ ແລະ ມີຫຼາຍກິດຈະກໍາເຊັ່ນ: ປະກວດນາງສາວງາມເຮືອຊ່ວງ, ການປະກວດອາຫານພື້ນບ້ານ, ປະກວດເຫຼົ້າໄຫຫວານ, ການສະແດງສີລະປະວັນນະຄະດີ, ທ່ຽວຊົມຕະຫຼາດນັດ, ວາງສະແດງສິນຄ້າ ແລະ ກິດຈະກໍາອື່ນໆ. ການແຂ່ງຂັນຊ່ວງເຮືອປະເພນີໃນຄັ້ງນີ້ມີເຮືອເຂົ້າຮ່ວມ 2 ປະເພດຄື: ເພດຍິງ ມີ 14 ລໍາ ຈາກ 14 ບ້ານ, ເພດຊາຍມີ 15 ລໍາ ຈາກ 15 ບ້ານ; ຜົນການແຂ່ງຂັນອັນດັບທີ I ເຮືອເພດຍິງໄດ້ແກ່ ເຮືອບ້ານແທ່ນຄໍາ ໄດ້ຮັບຂັນເງິນ 1 ໜ່ວຍ, ໜັກ 1 kg ພ້ອມເງິນສົດ 8 ລ້ານກີບ, ທີ II ເຮືອບ້ານສີບຸນເຮືອງ ໄດ້ຮັບເງິນສົດ 7 ລ້ານກີບ, ທີ III ເຮືອບ້ານນາປຸ່ງ ໄດ້ຮັບເງິນສົດ 6 ລ້ານກີບ, ອັນດັບທີ IV ເຮືອບ້ານໂພນໄຊ ໄດ້ຮັບເງິນສົດ 5 ລ້ານກີບ ແລະ ລາງວັນຊົມເຊີຍບ້ານລະ 2 ລ້ານ 5 ແສນກີບ. ສ່ວນເຮືອເພດຊາຍອັນດັບທີ I ເຮືອບ້ານໂພນສະອາດ ໄດ້ຮັບຂັນເງິນ 1 ໜ່ວຍ ໜັກ 1 kg ພ້ອມເງິນສົດ 8 ລ້ານກີບ, ທີ II ເຮືອບ້ານໂພນໄຊ ໄດ້ຮັບເງິນສົດ 7 ລ້ານກີບ, ທີ III ເຮືອບ້ານແທ່ນຄໍາ ໄດ້ຮັບເງິນສົດ 6 ລ້ານກີບ, ທີ IV ເຮືອບ້ານນາປຸ່ງໄດ້ຮັບເງິນສົດ 5 ລ້ານກີບ ແລະ ລາງວັນຊົມເຊີຍບ້ານລະ 2 ລ້ານ 5 ແສນກີບ. ໃຫ້ກຽດມອບຂອງຂວັນລາງວັນແຕ່ລະປະເພດ ໂດຍແມ່ນທ່ານ ຄໍາຫຼ້າ ຜີວວັນນາ ວ່າການເຈົ້າເມືອງ ແລະ ທ່ານ ນາງ ດາວວິນ ລາດຊະກິດ ຮອງເຈົ້າເມືອງຫົງສາ.

ຂ່າວ: ບຸນທີ.
MEDIALAOS