ວັນທີ 3 ຕຸລາ 2019 ນີ້, ບັນດາສິດເກົ່າໂຮງຮຽນ ມສ ຫົງສາ ເມືອງຫົງສາ ແຂວງໄຊຍະບູລີ ນຳໂດຍທ່ານ ປານີ ປ້ອງຄຳ ຫົວໜ້າຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງຫົງສາ ໄດ້ມອບເງິນ ຈຳນວນ 12 ລ້ານກີບ ໃຫ້ໂຮງຮຽນ ມສ ຫົງສາ ເພື່ອຮ່ວມສົມທົບທຶນກໍ່ສ້າງສະໂມສອນ. ກ່າວຮັບໂດຍທ່ານ ສົມບູນ ແສງທອງຄຳ ອຳນວຍການໂຮງຮຽນ ມສ ຫົງສາ ແລະ ໃຫ້ກຽດເຂົ້າຮ່ວມຂອງທ່ານ ຄຳຫຼ້າ ຜິວວັນນາ ວ່າການເຈົ້າເມືອງຫົງສາ, ມີບັນດາແຂກຈາກຫ້ອງການອ້ອມຂ້າງເມືອງ, ຄູ-ອາຈານເຂົ້າຮ່ວມ.

ໃນພິທີຄັ້ງນີ້, ອຳນວຍການໂຮງຮຽນກໍ່ໄດ້ຂຶ້ນກ່າວຕ້ອນຮັບ ແລະ ຜ່ານປະຫວັດການປະກອບສ່ວນສົມທົບທຶນຕ່າງໆ. ຜ່ານມາໄດ້ມີຫຼາຍລຸ້ນທີ່ຈົບຈາກໂຮງຮຽນແຫ່ງນີ້, ມາປະກອບສ່ວນຮ່ວມສົມທົບທຶນ ທັງເປັນວັດຖຸ ແລະ ເງິນສົດ ລວມມູນຄ່າ 61 ລ້ານກວ່າກີບ. ເຊິ່ງໃນໄລຍະຜ່ານມາ ໂຮງຮຽນແມ່ນໄດ້ຕັ້ງໜ້າສຸມໃສ່ເປົ້າໝາຍການພັດທະນາເປັນບູລິມາສິດຄື: ປັບປຸງຄຸນນະພາບການຮຽນ-ການສອນ, ບູລະນະອາຄານຮຽນ, ສ້າງ ແລະ ຈັດສັນສະພາບແວດລ້ອມທີ່ດີໃຫ້ແກ່ໂຮງຮຽນ. ໂດຍສະເພາະກໍ່ແມ່ນການກໍ່ສ້າງສະໂມສອນ, ເຊິ່ງໄດ້ລົງມືກໍ່ສ້າງ ແລະ ສຳເລັດໄປເປັນສ່ວນຫຼາຍ ຄິດໄລ່ເປັນເງິນ 232 ລ້ານກີບ. (ສະເພາະມູນຄ່າຫຼັງຄາ ຕາມການປະເມີນເບື້ອງຕົ້ນ 523 ລ້ານກວ່າກີບ) ແລະ ໄດ້ຊຳລະໄປແລ້ວ 140 ລ້ານກີບ.

ໃນໂອກາດທີ່ມີຄວາມໝາຍຄວາມສຳຄັນນີ້, ທາງໂຮງຮຽນ ມສ ຫົງສາ ກໍ່ໄດ້ມອບໃບຍ້ອງຍໍ ແລະ ໃບສົມມະນາບຸນຄຸນໃຫ້ຜູ່ທີ່ໄດ້ປະກອບສ່ວນຊ່ວຍເຫຼືອ ແລະ ບັນດາສິດເກົ່າກໍ່ໄດ້ຖືໂອກາດນີ້, ມອບຂອງຂວັນໃຫ້ບັນດາອາຈານເກົ່າ ທີ່ໄດ້ສິດສອນຖ່າຍທອດຄວາມຮູ້ ແລະ ເປັນການລະນຶກເຖິງຄຸນງາມຄວາມດີຂອງຄູ-ອາຈານທີ່ເຄີຍໄດ້ສິດສອນໃນໄລຍະຜ່ານມາ.
ໃນໂອກາດນີ້, ທ່ານ ຄຳຫຼ້າ ຜິວວັນນາ ວ່າການເຈົ້າເມືອງຫົງສາ ຕ່າງໜ້າໃຫ້ໂຮງຮຽນສະແດງ ຄວາມຂອບໃຈຕໍ່ສິດເກົ່າ ທີ່ເຫັນໄດ້ເຖິງຄວາມສໍາຄັນໃນວຽກງານການສຶກສາ ໂດຍສະເພາະ ແມ່ນການພັດທະນາພື້ນຖານໂຄງລ່າງຂອງໂຮງຮຽນ ພ້ອມກັນລະດົມທຶນຮອນມາຮ່ວມສົມທົບທຶນ ເພື່ອກໍ່ສ້າງສະໂມສອນແຫ່ງນີ້. ເຊິ່ງໄດ້ສະແດງເຖິງຄວາມຮູ້ບຸນຄຸນ ແລະ ຄວາມສາມັກຄີຮັກແພງຕໍ່ຄູ-ອາຈານ ທັງເປັນແບບຢ່າງທີ່ດີໃຫ້ແກ່ນ້ອງນັນຮຽນໄດ້ສືບທອດຕໍ່ໄປ.

ພາບ ແລະ ຂ່າວ: ກິດຕິສັກ ບົວໄລ
MEDIALAOS