ສະຖານທູດ ສປປ ລາວ ປະຈໍາ ສປ ຈີນ ໄດ້ສະຫລອງວັນຄູແຫ່ງຊາດ ຄົບຮອບ 25 ປີ ຢ່າງຟົດຟື້ນພາຍໃຕ້ ສາຍພົວພັນ ລາວ-ຈີນ ເຕີບໃຫຍ່ ແລະ ເບັ່ງບານຢ່າງບໍ່ຢຸດຢັ້ງ, ຂະນະທີ່ປັດຈຸບັນ ນັກສຶກສາລາວໄປສຶກສາ ຢູ່ ສປ ຈີນ ເພີ່ມຂຶ້ນເຖິງ 10.000 ຄົນ ເຊິ່ງພວມຈະກາຍ ເປັນກໍາລັງແຮງສໍາຄັນ ປະກອບສ່ວນພັດທະນາປະເທດຊາດ ໂດຍພິທີສະຫລອງວັນສຳຄັນນີ້ໄດ້ຈັດຂຶ້ນ ໃນວັນທີ  5 ຕຸລາ 2019 ທ່າມກາງບັນຍາກາດ ທີ່ ສປ ຈີນ ຫາ ກໍສໍາເລັດການ ສະຫລອງວັນຊາດ ຄົບຮອບ 70 ປີ, ສປປ ລາວ ພວມດໍາເນີນກອງປະຊຸມໃຫຍ່ໃຫຍ່ 3 ຂັ້ນ ແລະ ວັນສໍາຄັນຂອງຊາດອື່ນໆ ແລະ ທ່ານ ນາງ ຄໍາເຜົາ ເອີນທະວັນ ເອກອັກຄະລັດຖະທູດ ແຫ່ງ ສປປ ລາວ ຄົນໃໝ່ປະຈໍາສປ ຈີນ, ນັກສຶກສາລາວກວ່າ 200 ຄົນເຂົ້າຮ່ວມ.

ທ່ານ ແສງສັນໄຊ ຂັດຕິຍະວົງ ຫົວໜ້າຄະນະນັກສຶກສາ ປະຈໍາ ສປ ຈີນ ລາຍງານສະພາບ ລວມວ່າ: ຄະນະນັກສຶກສາລາວ ຢູ່ປັກກິ່ງ ສປ ຈີນ ເປັນອົງການຈັດຕັ້ງໜຶ່ງ ທີ່ໄດ້ຮັບການຊີ້ນໍາ ຈາກຫ້ອງ ການ ທີ່ປຶກສາ ຝ່າຍສຶກສາ-ວັດທະນະທໍາ ໂດຍໄດ້ຮັບການແຕ່ງຕັ້ງຈາກສະຖານທູດລາວ,ເປັນເສນາທິການ ໃຫ້ແກ່ສະຖານທູດ, ມີບົດບາດຄຸ້ມຄອງ, ເຕົ້າໂຮມຄວາມສາມັກຄີ, ສ້າງຄວາມເຂົ້າໃຈ,ກໍ່ສ້າງ-ສຶກ ສາອົບຮົມ ໃຫ້ກາຍເປັນມະຫາຊົນກ້າວໜ້າ, ອໍານວຍຄວາມສະດວກ ແລະ ເຄື່ອນໄຫວກິດຈະກໍາຕ່າງໆ ທີ່ເປັນປະໂຫຍດລະ ຫວ່າງພາຍໃນ-ຕ່າງປະເທດ ແລະ ອື່ນໆ, ລະຫວ່າງນັກສຶກສາລາວ ຢູ່ປັກກິ່ງ ແລະ ຢູ່ພາຍໃນ ສປ ຈີນ.ປັດຈຸບັນນັກສຶກສາລາວ ພວມຮຽນຢູ່ປັກກິ່ງມີ 433 ຄົນ ໃນນີ້ສຶກສາ ໃນລະດັບປະລິນຍາຕີ 198 ຄົນ,ປະລິນຍາໂທ 152 ຄົນ,ປະລິນຍາເອກ 14 ຄົນ,ກຽມພາສາ 49 ຄົນ, ຊັ້ນສູງ 10 ຄົນ ແລະ ອື່ນໆ.

ທ່ານນາງ ຄໍາເຜົາ ເອີນທະວັນ ເອກອັກຄະລັດຖະທູດ ແຫ່ງ ສປປ ລາວ ຄົນໃໝ່ປະຈໍາ ສປ ຈີນ ໄດ້ຍ້ອງຍໍຊົມເຊີຍຜົນສໍາເລັດອັນຍິ່ງໃຫຍ່ ລວມທັງຄຸນງາມຄວາມດີ ອັນປະເສີດຂອງຄູ-ອາຈານພາຍໃຕ້ ແນວທາງນະໂຍບາຍ ແລະ ການນຳພາຂອງ ພັກ-ລັດທີ່ສະຫລາດສ່ອງໃສ ໄດ້ນໍາພາປະເທດຊາດ ຍາດເອົາໄຊຊະນະ ອັນຍິ່ງໃຫຍ່ນັບບໍ່ຖ້ວນ ແລະ ເຮັດໃຫ້ປະເທດຊາດ ຄ່ອຍຫລຸດພົ້ນອອກ ຈາກຄວາມ ດ້ອຍພັດທະນາ ເປັນກ້າວໆ. ຄູປຽບເໝືອນແມ່ພິມຂອງຊາດ ໃນການສ້າງຄົນ ແລະ ຝຶກຝົນຫລໍ່ຫລອມຄົນ ໃຫ້ກາຍເປັນຜູ້ມີຄວາມຮູ້ຄວາມສາມາດ,ມີຄຸນສົມບັດສິນທໍາປະຕິວັດ, ຮູ້ຮັກເຊື້ອແພງຊາດ ແລະ ບ້ານເກີດເມືອງນອນ ໄດ້ປະກອບສ່ວນໃນພາລະກິດປົກປັກຮັກສາ ແລະ ພັດທະນາປະເທດຊາດ ຢ່າງໜັກແໜ້ນ.

ເອກອັກຄະລັດຖະທູດກ່າວຕື່ມວ່າ: ສປປ ລາວ ແລະ ສປ ຈີນ ໄດ້ສ້າງຕັ້ງສາຍພົວພັນ ການທູດຮ່ວມກັນ ນັບແຕ່ປີ 1961 ເຖິງປັດຈຸບັນເຫັນວ່າ ສາຍພົວພັນລະຫວ່າງ ສອງປະເທດໄດ້ກ້າວເຂົ້າສູ່ ໄລຍະ ຂອງການພັດທະນາໃໝ່, ການພົວພັນຮ່ວມມືລະຫວ່າງສອງຝ່າຍກໍກວ້າງຂວາງກວ່າເກົ່າ ແລະ ແຕກດອກອອກຜົນຢ່າງບໍ່ຢຸດຢັ້ງ, ສອງປະເທດ ລາວ-ຈີນ ໄດ້ເສີມຂະຫຍາຍການ ຮ່ວມມືກັນຕາມທິດ 4 ດີ ຄື ເປັນບ້ານໃກ້ເຮືອນຄຽງທີ່ດີຕໍ່ກັນ, ເປັນຄູ່ຮ່ວມມືທີ່ດີ, ເປັນອ້າຍນ້ອງທີ່ດີ ແລະ ເປັນສະຫາຍທີ່ດີ. ຫລ້າສຸດ, ສອງພັກ-ສອງລັດລາວ ແລະ ຈີນ ໄດ້ບັນລຸການຮ່ວມລົງນາມ ແຜນແມ່ບົດວ່າດ້ວຍ ການສ້າງ ຄູ່ຮ່ວມຊະຕາກໍາ ລາວ-ຈີນ ເຊິ່ງເປັນເອກະສານທີ່ ເປັນທິດທາງ ໃຫ້ແກ່ການຮ່ວມມື ສອງຝ່າຍຕໍ່ໜ້າໃນຂະແໜງ ເສດຖະກິດ, ການຄ້າ, ການລົງທຶນ, ໄຟຟ້າ, ກະສິກຳ ແລະ ອື່ນໆ. ສະເພາະໂຄງການພັດ ທະນາ ເສັ້ນທາງລົດໄຟຄວາມໄວສູງ ລາວ-ຈີນ ເປັນອີກໂຄງການໜຶ່ງສໍາຄັນ ທີ່ບໍ່ພຽງເປັນສັນຍະລັກ ທາງປະຫວັດສາດ ຂອງສອງຊາດລາວ-ຈີນ, ແຕ່ຍັງສະແດງໃຫ້ເຫັນຄວາມຕັ້ງ ໃຈ ແລະ ມຸ່ງໝັ້ນ ຂອງ 2 ຊາດ ໃນການເປີດປະຕູ ສູ່ໂລກພາຍນອກລວມ ທັງປ່ຽນສະຖານະພາບຂອງ ສປປ ລາວ ຈາກເປັນປະເທດບໍ່ ຕິດຈອດກັບທະເລກາຍ ເປັນປະເທດເຊື່ອມຈອດ ກັບສາກົນ ແລະ ເປັນປະຕູທາງຜ່ານ ອາ ຊຽນພາຍໃຕ້ ຂໍ້ລິເລີ່ມໜຶ່ງແລວໜຶ່ງເສັ້ນທາງ ຕ່າງຝ່າຍຕ່າງມີຝົນ ປະໂຫຍດຮ່ວມກັນ.ໂຄງການດັ່ງ ກ່າວໃຊ້ງົບປະມານກໍ່ສ້າງ ເກືອບ 6 ຕື້ໂດລາສະຫະລັດ ໂດຍຈີນປະກອບສ່ວນທຶນ 70% ແລະ ລາວ ປະ ກອບສ່ວນ 30%,ມີຄວາມຍາວຫລາຍກວ່າ 400 ກວ່າກິໂລແມັດ ເລີ່ມຢູ່ຈຸດຊາຍແດນ ລະຫວ່າງ ສປ ຈີນ ແລະ ສປປ ລາວ ຈາກແຂວງຫລວງນໍ້າທາ ເຖິງນະຄອນຫລວງວຽງຈັນ ເຊິ່ງຈະສືບຕໍ່ໄປເຊື່ອມ ໂຍງຫາປະເທດມາເລເຊຍ ແລະ ສິງກະໂປ. ທັງໝົດເຫລົ່ານີ້ ຈະປະກອບສ່ວນສໍາຄັນພັດທະນາເສດຖະກິດ-ສັງຄົມ ຂອງ 2 ປະເທດ ແລະ ຫລຸດຜ່ອນຄວາມທຸກຍາກ ຜ່ານການສົ່ງເສີມການຄ້າ, ການລົງ ທຶນ, ທ່ອງທ່ຽວ,ການໄປມາຫາສູ່ກັນ, ຄົມມະນາຄົມ,ຮັດແໜ້ນຄວາມໃກ້ຊິດ ແລະ ອື່ນໆ.