ວັນທີ 8 ຕຸລາ 2019 ອົງຄະນະພັກເມືອງໜອງບົກ ແຂວງຄຳມ່ວນ ໄດ້ດຳເນີນກອງປະຊຸມໃຫຍ່ຄັ້ງທີ IX ຂອງອົງຄະນະພັກເມືອງ ໂດຍການເປັນປະທານຂອງສະຫາຍ ສິນທະສອນ ມະຫາໂຄດ ກຳມະການພັກແຂວງ ເລຂາພັກເມືອງ ເຈົ້າເມືອງໆໜອງບົກ, ໃຫ້ກຽດເຂົ້າຮ່ວມມີສະຫາຍ ໂອໄດ ສຸດາພອນ ກຳມະການສູນກາງພັກ ເລຂາພັກແຂວງ ເຈົ້າແຂວງໆຄຳມ່ວນ, ສະຫາຍ ວັນໄຊ ຟອງສະຫວັນ ຮອງຫົວໜ້າຄະນະຈັດຕັ້ງສູນກາງພັກ, ມີຄະນະການນຳຂັ້ນແຂວງ, ແຂກຖືກເຊີນຈາກບັນດາເມືອງ, ພະແນກການອ້ອມຂ້າງ, ອົງການຈັດຕັ້ງມະຫາຊົນ ຕະຫຼອດເຖິງຜູ້ແທນສົມບູນເຂົ້າຮ່ວມ ຈຳນວນ 155 ສະຫາຍ.

ສະຫາຍ ສິນທະສອນ ມະຫາໂຄດ ເລຂາພັກເມືອງ ເຈົ້າເມືອງໆໜອງບົກ ໄດ້ກ່າວໄຂກອງປະຊຸມ ພ້ອມທັງຜ່ານຮ່າງບົດລາຍງານການເມືອງຂອງຄະນະບໍລິຫານງານພັກເມືອງໜອງບົກ ສະໄໝທີ VIII. ຈາກນັ້ນສະຫາຍ ສົມມະລາ ອ່ອນສິລິວົງ ຮອງເລຂາພັກເມືອງ ຮອງເຈົ້າເມືອງໆໜອງບົກ ໄດ້ຂຶ້ນຜ່ານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນໄລຍະ 5 ປີຜ່ານມາ ເຫັນວ່າເສດຖະກິດຂອງເມືອງມີການຂະຫຍາຍຕົວຢ່າງຕໍ່ເນື່ອງ ໃນລະດັບສະເລ່ຍ 7,74% ຕໍ່ປີ, ລວມຍອດຜະລິດຕະພັນ 664 ຕື້ກີບ, ລາຍໄດ້ສະເລ່ຍຕໍ່ຫົວຄົນຕໍ່ປີເພີ່ມຂຶ້ນຈາກ 1.406 ໂດລາ ມາເປັນ 1.568 ໂດລາສະຫະລັດ, ທຽບໃສ່ແຜນ 5 ປີປະຕິບັດໄດ້ 91,38%, ໂຄງການທີ່ໄດ້ຮັບການຈັດຕັ້ງປະຕິບັດທັງໝົດ 116 ໂຄງການ ລວມມູຄ່າ 171 ຕື້ກີບ. ໃນນັ້ນມີໂຄງການລົງທຶນຂອງລັດ 67 ໂຄງການ ມີມູນຄ່າ 120 ຕື້ກີບ, ການລົງທຶນເອກະຊົນພາຍໃນ ແລະ ຕ່າງປະເທດ 13 ໂຄງການ ມີມູນຄ່າ 34 ຕື້ກີບ ແລະ ໂຄງການສົມທົບທຶນຂອງປະຊາຊົນ 36 ໂຄງການ ມູນຄ່າ 16 ຕື້ກີບ, ໃນນັ້ນໂຄງການຈັດຕັ້ງປະຕິບັດສຳເລັດ 100% ມີ 55 ໂຄງການ ລວມມູນຄ່າ 107%, ໂຄງການສືບຕໍ່ 12 ໂຄງການ ລວມມູນຄ່າ 12 ຕື້ກີບ.

ຂົງເຂດວຽກງານກະສິກຳ ການຜະລິດເຂົ້າໃນປີ 2019 ມີເນື້ອທີ່ນາປີ 15.888 ເຮັກຕາ. ໃນນີ້ເສຍຫາຍຈາກນໍ້າຖ້ວມ 5.345 ເຮັກຕາ. ເນື້ອທີ່ເກັບກ່ຽວ 10.543 ເຮັກຕາ ຜົນຜະລິດ 41.118 ໂຕ່ນ, ເນື້ອທີ່ນາແຊງ 2.961 ເຮັກຕາ ຜົນຜະລິດ 16.522 ໂຕ່ນ ລວມຜົນຜະລິດທັງສອງລະດູ 57.640 ໂຕ່ນ. ສະເລ່ຍໃສ່ຫົວຄົນໄດ້ 1.088 ກິໂລຕໍ່ຄົນຕໍ່ປີ, ການຜະລິດເປັນສິນຄ້າ ໃນທົ່ວເມືອງມີ 28 ກຸ່ມ. ໃນນີມີກຸ່ມຜະລິດເເນວພັນເຂົ້າ 4 ກຸ່ມ. ໃນປີ 2019 ຜະລິດແນວພັນໄດ້ 17.781 ໂຕ່ນ ທຽບໃສ່ແຜນການການເພີ່ມຂຶ້ນ 13,5%, ມີຄອບຄົວຕົວແບບໃນການປູກຝັງ-ລ້ຽງສັດຈຳນວນ 31 ຄອບຄົວ ແລະ ພົ້ນເດັ່ນແມ່ນຄອບຄົວທ່ານ ສີຮອງ ໂຄດຕະວົງ ຫົວໜ້າກຸ່ມຂະຫຍາຍແນວພັນເຂົ້າ ບ້ານຜັກອີ່ຕູ່ ໄດ້ຮັບຫຼຽນຊາວນາດີເດັ່ນ ອາຊຽນ ໃນປີ 2017 ເຊິ່ງເປັນຄົນທຳອິດໃນ ສປປ ລາວ, ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ມີກອງທຶນພັດທະນາບ້ານ 44 ບ້ານ, ລວມມີມູນຄ່າ 7 ຕື້ກວ່າກີບ ເປັນເງື່ອນໄຂເຮັດໃຫ້ປະຊາຊົນສາມາດເຂົ້າເຖິງແຫຼ່ງທຶນ ເພື່ອປະກອບເຂົ້າໃນການຜະລິດເປັນສິນຄ້າ ສ້າງລາຍຮັບເພິ່ມເຮັດໃຫ້ຊີວິການເປັນຢູ່ດີຂຶ້ນ.

ມາຮອດປະຈຸບັນຈຳນວນຄອບຄົວທຸກຍາກຍັງເຫຼືອ 35 ຄອບຄົວ ເທົ່າກັບ 0,37% ຂອງຈຳນວນຄອບຄົວທົ່ວເມືອງ, ສ້າງບ້ານກະສິກໍາພັດທະນາໄດ້ 9 ບ້ານ, ຄອບຄົວພັດທະນາກະສິກຳ 1.157 ຄອບຄົວ ເທົ່າກັບ 16,36%, ສ້າງບ້ານພັດທະນາໄດ້ 54 ບ້ານ ແລະ ຄອບຄົວພັດທະນາ 8.515 ຄອບຄົວ ເທົ່າກັບ 98% ຂອງບ້ານ ແລະ ຂອບຄົວໃນທົ່ວແຂວງ. ກອງປະຊຸມຄັ້ງນີ້ບັນດາຜູ້ແທນທີ່ເຂົ້າຮ່ວມຍັງໄດ້ພ້ອມກັນຮັບຟັງບົດປະກອບຄຳເຫັນວຽກງານ ປກຊ-ປກສ, ຂົງເຂດເສດຖະກິດ, ວັດທະນະທຳ-ສັງຄົມ, ວຽກງານອົງການຈັດຕັ້ງມະຫາຊົນ, ຄອບຄົວຕົວແບບດ້ານການຜະລິດເຂົ້າ ແລະ ວຽກງານຕ່າງໆ ອີກຈໍານວນໜຶ່ງ. ຈາກນັ້ນກໍ່ໄດ້ພ້ອມກັນຄົ້ນຄ້ວາປະກອບຄຳຄິດເຫັນໃສ່ບັນດາໜ້າວຽກທີ່ເປັນຂໍ້ຄົງຄ້າງ ເພື່ອແນໃສ່ເຮັດໃຫ້ທິດທາງແຜນການໃນຕໍ່ໜ້າ ໄດ້ຮັບການຈັດຕັ້ງປະຕິບັດສຳເລັດຜົນຕາມລະດັບຄາດໝາຍ. ກອງປະຊຸມຍັງຈະໄດ້ປ່ອນບັດຄັດເລືອກເອົາຄະນະບໍລິຫານງານພັກເມືອງຊຸດໃໝ່ ພ້ອມທັງຮັບຟັງການໂອ້ລົມຂອງການນຳຂັ້ນເທິງ. ກອງປະຊຸມຈະໄດ້ດໍາເນີນໄປເປັນເວລາ 2 ວັນເຕັມ ຈຶ່ງຈະສໍາເລັດລົງ.

MEDIALAOS