ມີເດຍລາວແຂວງສາລະວັນ ໂດຍທິດລານີ ໂຄດໂຍທາ. ວັນທີ10ພຶດສະພາ2021, ຢູ່ພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງສາລະວັນ, ຜູ້ປະກອບການດ້ານປ້າຍໂຄສະນາ 3 ພາກສ່ວນ: ຮ້ານໃຫຍ່ປ້າຍ, ສອນມີເດຍ, ໄຊພອນສະປອດ ໄດ້ປະກອບສ່ວນປ້າຍໂຄສະນາ ກ່ຽວກັບການປະຕິບັດມາດຕະການຕ່າງໆ ແລະວິທີການປ້ອງກັນພະຍາດໂຄວິດ-19. ຮັບໂດຍ: ທ່ານ ມະໄລວອນ ສີປະເສີດ ຫົວໜ້າພະແນກ ຖວທ ແຂວງ ທັງແມ່ນຄະນະສະເພາະກິດປ້ອງກັນໂຄວິດ-19 ຂັ້ນແຂວງ, ມອບໂດຍ: ທ່ານ ໄພທູນ ໄຊຍະວົງ, ທ່ານ ສອນປະສິດ ແກ້ວບົວລະພາ.

ປ້າຍໂຄສະນາທີ່ນຳມາມອບໃນຄັ້ງນີ້, ມີທັງໝົດ 16 ຜືນ ລວມມູນຄ່າທັງໝົດເກືອບ 5 ລ້ານກີບ. ໃນນັ້ນຮ້ານໃຫຍ່ປ້າຍ 4 ຜືນ ມູນຄ່າ 2 ລ້ານກີບ, ຮ້ານສອນມີເດຍປ້າຍ ແລະ ສະຕູດີໂອ ຈຳນວນ 6 ຜືນ ມູນຄ່າ 1 ລ້ານກວ່າກີບ ແລະ ໄຊພອນ ສະປອດ 6 ຜືນ ມູນຄ່າ 1 ລ້ານກວ່າກີບ. ໂດຍເນື້ອໃນກ່ຽວກັບການປະຕິບັດມາດຕະການຂອງຄະນະສະເພາະກິດຂັ້ນແຂວງ ວາງອອກ, ວິທີປ້ອງກັນ ແລະ ການໃຊ້ຊີວິດປະຈຳວັນ ແບບປອດໄພ.

ທ່ານ ມະໄລວອນ ສີປະເສີດ ກໍ່ໄດ້ກ່າວສະແດງຄວາມຂອບໃຈ ແລະ ຊົມເຊີຍມາຍັງ 3 ພາກສ່ວນ ທີ່ໄດ້ເປັນເຈົ້າການໃນການປະກອບສ່ວນ ເພື່ອໃຫ້ສັງຄົມໄດ້ຮັບຮູ້ເຂົ້າໃຈ. ສຳລັບປ້າຍໂຄສະນາດັ່ງກ່າວ ຈະນຳໄປຕິດຕັ້ງຈຸດທີ່ເປັນເຂດຊຸມຊົນໃນເທດສະບານແຂວງ ແລະ ບັນດາເມືອງ ເພື່ອໂຄສະນາ, ກ່າວເຕືອນ, ແນະນຳໃຫ້ພໍ່ແມ່ປະຊາຊົນບັນດາເຜົ່າ ຮູ້ວິທີລະມັດລະວັງ, ສະກັດກັ້ນ ແລະຕອບໂຕ້ກັບການແຜ່ລະບາດພະຍາດໂຄວິດ-19 ແລະ ຮັບຮູ້ຂໍ້ມູນຂ່າວສານຫຼາຍຊ່ອງທາງ ເພື່ອໃຫ້ເຂົ້າເຖິງກຸ່ມເປົ້າໝາຍ ໃນສັງຄົມ ຢ່າງວ່ອງໄວ.