ມີເດຍລາວແຂວງຫຼວງພະບາງ ຂ່າວ: ຈໍາປາ ວັນທີ 20 ກັນຍາ 2021 ນີ້ ທີ່ສູນປະຕິບັດງານ ຄວບຄຸມ ໂຄວິດ-19 ແຂວງຫຼວງພະບາງ 3 ພະແນກການຂອງແຂວງຫຼວງພະບາງ ຄື: ພະແນກໂຍທາທິການ ແລະຂົນສົ່ງ, ພະແນກແຜນການ ແລະການລົງທຶນ ແລະພະແນກກະສິກໍາ ແລະປ່າໄມ້ ໄດ້ນຳເອົາເຄື່ອງອຸປະໂພກບໍລິໂພກ, ຕຽງນອນ ແລະເງິນສົດ ມາມອບໃຫ້ຄະນະສະເພາະກິດ ແຂວງຫລວງພະບາງ ເພື່ອໄປມອບຕໍ່ໃຫ້ສູນກັກກັນແຫ່ງຕ່າງໆຢູ່ພາຍໃນແຂວງ, ເຊິ່ງປະກອບມີ ພະແນກໂຍທາທິການ ແລະຂົນສົ່ງ ມອບເຄື່ອງອຸປະໂພກ-ບໍລິໂພກ ໃນມູນຄ່າ 15.225.000 ກີບ ພ້ອມທັງຕາງໜ້າໃຫ້ບໍລິສັດ ບຸນໂຮມ ກໍ່ສ້າງ ມອບເຄື່ອງອຸປະໂພກ-ບໍລິໂພກ ມູນຄ່າ 10.000.000 ກີບ

ໂດຍການກ່າວມອບຂອງ ທ່ານ ບຼົ່ງຫວ່າງ ວ່າງເຈ່ຍຊາ ຫົວໜ້າພະແນກ ໂຍທາທິການ ແລະຂົນສົ່ງແຂວງ, ຈາກນັ້ນພະແນກກະສິກໍາ ແລະປ່າໄມ້ແຂວງ ໄດ້ມອບຕຽງນອນ 65 ໜ່ວຍ, ນໍ້າດຶ່ມ 70 ແກັດ, ເງິນສົດ 4.750.000 ກີບ, ລວມມູນຄ່າ 17.650.000 ກີບ ກ່າວມອບໂດຍ ທ່ານ ສີວອນ ວົງຄຳຈັນ ຫົວໜ້າພະແນກກະສິກຳ ແລະປ່າໄມ້ແຂວງ, ພະແນກແຜນການ ແລະການລົງທຶນ ມອບເຄື່ອງອຸປະໂພກ-ບໍລິໂພກ ມູນຄ່າ 24.250.000 ກີບ ພ້ອມເງິນສົດ 115.750.000 ກີບ ກ່າວມອບໂດຍ ທ່ານ ຈິນດາວົງ ໂພສີຄໍາ ຫົວໜ້າພະແນກແຜນການ ແລະການລົງທຶນແຂວງ, ລວມມູນຄ່າການມອບເທື່ອນີ້ມີທັງໝົດ 182.875.000 ກີບ, ກ່າວຮັບໂດຍ ທ່ານ ບຸນເລື່ອ ມະນີວົງ ຮອງເຈົ້າແຂວງຫຼວງພະບາງ ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ຂອງແຂວງ ພ້ອມດ້ວຍຄະນະສະເພາະກິດຂັ້ນແຂວງທີ່ເຂົ້າຮ່ວມ. ໂອກາດນີ້ທ່ານຍັງໄດ້ກ່າວຄວາມຂອບໃຈນຳທຸກພາກສ່ວນທີ່ໃຫ້ການສະໜັບສະໜູນຄະນະສະເພາະກິດ ແຂວງຫຼວງພະບາງ ແລະພ້ອມທີ່ຈະນຳວັດຖຸປັດຕ່າງໆທີ່ໄດ້ຮັບໃນຄັ້ງນີ້ໄປນຳໃຊ້ເຂົ້າໃນວຽກງານປ້ອງກັນ, ຄວບຄຸມ ແລະແກ້ໄຂພະຍາດໂຄວິດ-19 ຢູ່ແຂວງຫຼວງພະບາງ ໃຫ້ເກີດຜົນປະໂຫຍດສູງສຸດ.