ມີເດຍລາວແຂວງເຊກອງ ຕອນແລງວັນທີ 23 ກັນຍາ ຜ່ານມາ 3 ອົງການຈັດຕັ້ງຄື: ອົງການແນວລາວສ້າງຊາດແຂວງ, ສະຫະພັນກໍາມະບານ ແລະສະຫະພັນແມ່ຍິງແຂວງ ຊຶ່ງຕາງໜ້າໂດຍແມ່ນ ທ່ານ ນາງ ບຸນຮຽງ ບຸນຈິດ ປະທານແນວລາວສ້າງຊາດແຂວງ, ຄະນະຊີ້້ນໍາຄະນະສະເພາະກິດຂັ້ນແຂວງ ພ້ອມຄະນະຈາກ 3 ອົງການຈັດຕັ້ງ ໄດ້ນໍາເອົາເຄື່ອງບໍລິໂພກ-ອຸປະໂພກ ແລະເງິນສົດຈໍານວນໜຶ່ງ ມອບໃຫ້ພະແນກສາທາລະນະສຸກແຂວງ ຊຶ່ງກ່າວຮັບແມ່ນທ່ານ ດຣ ຄໍາໄຫຼ ສັນຕິພູມ ຫົວໜ້າພະແນກສາທາລນະສຸກແຂວງ, ຮອງປະທານຄະນະສະເພາະກິດຂັ້ນແຂວງ ພ້ອມຄະນະ ແລະພາກສ່ວນທີ່ກາຽວຂ້ອງເຂົ້າຮ່ວມ.

ເຄື່ອງທີ່ນໍາມາມອບໃນຄັ້ງນີ້ ປະກອບມີ ຫມີ່ ຈໍານວນ 10 ແກັດ, ຢາສີຟັນ 2 ແກັດ, ນໍ້າດື່ມ 10 ແພັກ ເປັນມູນຄ່າ 2.258.000 ທີ່ໄດ້ຈາກການລະດົມນໍາສະຖາບັນການເງິນຈຸລະພາກ ສາຂາຈໍາປາສັກ ແລະເງິນສົດ ຈໍານວນ 1.500.000 ກີບ ທີ່ໄດ້ຈາກ 3 ອົງການຈັ້ດຕັ້ງດັ່ງກ່າວ, ລວມມູນຄ່າທັງໝົດ 3.758.000 ກີບ, ທັງນີ້ ເພື່ອນໍາໃຊ້ເຂົ້າໃນວຽກງານປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ ເພື່ອນໍາໄປແບ່ງປັນໃຫ້ພະນັກງານທີ່ເຮັດໜ້າທີ່ເວນຍາມ ແລະຜູ້ທີ່ຈໍກັດບໍລິເວນຢູ່ສູນກັກບໍລິເວນແຫ່ງຕ່າງໆໃນທົ່ວແຂວງ.

ໃນໂອກາດນີ້, ທ່ານ ດຣ ຄໍາໄຫຼ ສັນຕິພູມ ກໍໄດ້ກ່າວສະແດງຄວາມຂອບອົກຂອບໃຈມາຍັງ 3 ອົງການຈັດຕັ້ງດັ່ງກ່າວ ທີ່ປະກອບສ່ວນຊ່ວຍເຫຼືອເຂົ້າໃນວຽກງານປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ເຊິ່ງເຄື່ອງທີ່ໄດ້ຮັບໃນຄັ້ງນີ້ ຄະນະສະເພາະກິດຂັ້ນແຂວງ ຈະນໍາໄປແບ່ງປັນໃຫ້ສູນກັກບໍລິເວນຕ່າງໆທົ່ວແຂວງ ຢ່າງເໝາະສົມ ແລະທົ່ວເຖີງ.
ຂ່າວ-ພາບ:ພຸດທະສອນ