ໃນລະຫວ່າງວັນທີ 09 ຫາ 11 ຕຸລາ 2019 ນີ້; ຢູ່ທີ່ສະໂມສອນຂອງເມືອງ ອາດສະພັງທອງ, ຫ້ອງການສຶກສາທິການ ແລະ ກິລາເມືອງ ອາດສະພັງທອງ ເປີດກອງປະຊຸມທາບທາມແຜນກໍານົດສ້າງພະນັກງານນໍາພາ – ຄຸ້ມຄອງ ຂຶ້ນຢ່າງເປັນທາງການ. ໂດຍພາຍໃຕ້ການເຂົ້າຮ່ວມຂອງທ່ານ ບົວສີ ເພຍພົມມະລິນ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ, ທ່ານ ຄູນຄໍາ ຣາຊະວົງ ຮອງຫົວໜ້າພະແນກສຶກສາທິການ ແລະ ກິລາແຂວງ ສະຫັວນນະເຂດ, ມີປະທານກວດກາພັກ – ລັດເມືອງ, ຫົວໜ້າຫ້ອງການສຶກສາທິການ ແລະ ກິລາເມືອງ ພ້ອມດ້ວຍຄະນະຕະຫຼອດຮອດບັນດາຜູ້ແທນທີ່ມາຈາກຜູ້ອໍານວຍການໂຮງຮຽນປະຖົມ, ຜູ້ອໍານວຍການໂຮງຮຽນມັດທະຍົມສົມບູນ, ຜູ້ອໍານວຍການໂຮງຮຽນມັດທະຍົມປາຍ, ຜູ້ອໍານວຍການໂຮງຮຽນມັດທະຍົມຕົ້ນໃນທົ່ວເມືອງ ແລະ ຫົວໜ້າ, ຮອງຫົວໜ້າໜ່ວຍງານໃນຫ້ອງການສຶກສາທິການ ແລະ ກິລາເມືອງຈໍານວນ 135 ທ່ານ, ຍິງ 46 ທ່ານກໍ່ໄດ້ເຂົ້າຮ່ວມ.

ໃນພິທີທ່ານ ບົວສີ ເພຍພົມມະລິນ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ ກໍ່ໄດ້ໃຫ້ກຽດຂຶ້ນຜ່ານມະຕິຕົກລົງຂອງກົມການເມືອງສູນກາງພັກສະບັບເລກທີ 030,031 ແລະ 032 / ກມສພ ວ່າດ້ວຍວຽກງານສ້າງແຜນກໍານົດພະນັກງານນໍາພາ – ຄຸ້ມຄອງ ແລະ ຍັງໄດ້ຜ່ານບົດແນະນໍາ 292 /ພນ ຕື່ມອີກດ້ວຍ. ຈາກນັ້ນ; ໃນພິທີກໍ່ໄດ້ມີການແນະນໍາປ່ອນບັດທາບທາມຮອບທີ 1 ສັງລວມຄະແນນຮອບທີ 1 , ຄັດຈ້ອນຜົນທາບທາມຮອບທີ 1 ເຂົ້າໃສ່ຮ່າງທາບທາມຮອບທີ 2 ,ຈາກນັ້ນ; ກໍ່ໄດ້ແນະນໍາເນັ້ນໜັກທາບທາມຮອບທີ 2 ແລະ ໄດ້ປ່ອນບັດທາບທາມຮອບທີ 2 ພ້ອມທັງສັງລວມຜົນການທາບທາມຮອບທີ 2 ແລະ ຄັດຈ້ອນຮັບຮອງຜົນຂອງທາບທາມ. ກອງປະຊຸມດັ່ງກ່າວແມ່ນຈະໄດ້ດໍາເນິນໄປເປັນເວລາ 3 ວັນຈຶ່ງສໍາເລັດຕາມລະດັບຄາດໝາຍທີ່ວາງໄວ້.
ເພື່ອໃຫ້ພິທີມີຄວາມໝາຍຄວາມສໍາຄັນຂຶ້ນຕື່ມໃນພິທີທ່ານ ຄູນຄໍາ ຣາຊະວົງ ຮອງຫົວໜ້າພະແນກສຶກສາທິການ ແລະ ກິລາແຂວງ ສະຫັວນນະເຂດກໍ່ໄດ້ໃຫ້ກຽດໂອ່ລົມຕໍ່ພິທີໂດຍທ່ານໄດ້ເນັ້ນໜັກໃຫ້ບັນດາຜູ້ແທນທີ່ມີສິດຈົ່ງໃຊ້ສິດຂອງຕົນຄັດຈ້ອນເອົາຄົນທີ່ຕົນເຫັນວ່າມີຄວາມຮູ້ຄວາມສາມາດມີຄຸນສົມບັດສິນທໍາປະຕິວັດ ແລະ ມີຄຸນທາດການເມືອງໜັກແໜ້ນສະເໝີຕົ້ນສະເໝີປາຍເພື່ອເຂົ້າມາບໍລິຫານວຽກງານໃຫ້ມີປະສິດທິພາບເພື່ອເຮັດໃຫ້ວຽກງານມີຄວາມກ້າວໜ້າຂຶ້ນໄປເລື່ອຍໆ.

ພາບຂ່າວ: ສາຍສະໝຸດ ສິມພະລີວົງ. ນັັກຂ່າວເມືອງ: ອາດສະພັງທອງ MediaLaos