ໃນ​ວັນ​ທີ 11 ຕຸລາ 2019, ສູນ​ກາງ​ແນວ​ລາວ​ສ້າງ​ຊາດ ຮ່ວມ​ກັບ ສູນ​ກາ​ງອົງການ​ພຸດທະສາ​ສະໜາ ສຳພັນ​ລາວ ໄດ້ຈັດ​ພິທີຖະ​ແຫຼງຂ່າວບຸນ​ໃສ່​ບາດ​ພຣະສົງໝູ່​ໃຫຍ່ 300 ອົງ ຈາກ 5 ປະ​ເທດ ພາຍໃຕ້ໂຄງການທຳ​ມະຍາດ​ຕາ 5 ​ແຜ່ນ​ດິນ ​ແຫ່ງ​ລຸ່ມ​ແມ່​ນໍ້າຂອງ​ ຄັ້ງ​ທີ 2, ​ເຊິ່ງຈະ​ດຳ​ເນີນ​ກິດຈະກຳ​ທາງພຸດທະສາສະໜາ​ ​ໃນ​ລະຫວ່າງວັນ​ທີ 14-31 ຕຸລາ 2019 ນີ້ ​ໃຫ້ກຽດ​ເຂົ້າ​ຮ່ວມ​​ພິທິຖະ​ແຫລ​ງຂ່າວໂດຍ​ ພຣະອາຈານ ດໍາຣົງ ພິມ​ມະ​ຈັກ ຫົວໜ້າຫ້ອງການ ອົງການ​ພຸດທະສາສະໜາສຳພັນ​ລາວ ພ້ອມ​ດ້ວຍ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

​ທ່ານ ຄະນອງ​ລິດ ສີ​ສົມບູນ ຫົວໜ້າກົມ​ສາສະໜາ ສູນ​ກາງ​ແນວ​ລາວ​ສ້າງ​ຊາດ ​ໃຫ້​ຮູ້​ວ່າ: ໂຄງການທຳ​ມະຍາດ​ຕາ 5 ​ແຜ່ນ​ດິນ ​ແຫ່ງ​ລຸ່ມ​ແມ່​ນໍ້າຂອງ​ ຈະ​ມີ​ພິທີ​ເປີດ​ທາງ​ການ ​ໃນ​ວັນ​ທີ 15 ຕຸລາ 2019 ທີ່​ແຂວງ​ ຊຽງລາຍ ​ຣາຊະ​ອານາຈັກໄທ  ແລະ ສືບ​ຕໍ່​​ເຮັດ​ກິດ​ຈະ​ກຳທາງພຸດທະສາສະໜາ​ ​ໃນ​ວັນ​ທີ 16 ຕຸລາ 2019 ຈາກ​ນັ້ນ ​ໃນ​ວັນ​ທີ 17-18 ຕຸລາ  2019 ຄະນະ​ຜູ້​ແທນຈະ​ໄດ້​ເດີນທາງ ​ໄປ ສ.ສ ຫວຽດນາມ, ຫລັງຈາກ​ນັ້ນ ​ໃນ​ວັນ​ທີ 19 ຕຸລາ 2019 ຄະນະຜູ້​ແທນ​ຈະ​ໄດ້​ເດີນທາ​ງ​ເຂົ້າມາ ສປປ ລາວ ຜ່ານ​ດ່ານ​ສາກົນ​ ຊຽງຂອງ-​ຫ້ວຍ​ຊາຍ ​ເພື່ອ​ເດີນທາງ​​ໄປ​ເຮັດ​ກິດຈະກຳ​​ທາງພຸດທະສາສະໜາ​ ທີ່ແຂວງ​ອຸດົມ​ໄຊ, ຈາກ​ນັ້ນ ​ໃນ​ວັນ​ທີ 20-21 ຕຸລາ 2019 ຄະນະຜູ້​ແທນ​ ຈະ​ໄດ້​ເດີນທາງ​ໄປແຂວງ​ດຽນ​ບຽນ ສ.ສ ຫວຽດນາມ ໂດຍ​ຜ່ານ​ດ່ານ​ຊາຍ​ແດນ​ລາວ-​ຫວຽດນາມ ​ໄຕ​ຈາງ-​ຊົບ​ຮຸນ, ​ ຈາກ​ນັ້ນ ໃນ​ວັນ​ທີ 22-24 ຕຸລາ 2019 ຄະນະ​ຜູ້​ແທນຈະ​ເຄື່ອນ​ໄຫວ​ກິດຈະກຳ​ຢູ່​​ແຂວງອຸດົມ​ໄຊ ​ແລະ ແຂວງ​ຫລວງ​ພະ​ບາງ ສ່ວນ​ວັນ​ທີ 25-27 ຕຸລາ ​2019 ແມ່ນ​ຈະ​ໄດ້​ເຄື່ອນ​ໄຫວກິດຈະກຳ​ທາງ​ພຸດທະສາສະໜາທີ່​ນະຄອນຫລວງ​ວຽງຈັນ, ຈາກ​ນັ້ນ​ໃນ​ວັນ​ທີ 28-29 ຕຸລາ 2019 ຄະນະ​ຜູ້​​ແທນຈະ​​ເດີນທາງ​ໄປເຄື່ອນ​ໄຫວກິດຈະກຳທີ່ຣາຊະ​ອານາຈັກໄທຫຼັງຈາກ​ນັ້ນ​ຈະ​ເດີນທາງ​ໄປ ແຂວງຊຽມລຽບ ຣາຊະ​ອານາຈັກກຳປູ​ເຈຍ ​ເພື່ອ​​ປິດໂຄງການ​ດັ່ງກ່າວຢ່າງ​ເປັນ​ທາງ​ການ ​ໃນ​ວັນ​ທີ 30-31 ຕຸລາ 2019.

​ທ່ານ ຄະນອງ​ລິດ ສີ​ສົມບູນ ຍັງ​ໃຫ້​ຮູ້ຕື່ມ​ອີກ​ວ່າ: ໂຄງການທຳ​ມະຍາດ​ຕາ 5 ​ແຜ່ນ​ດິນ ​ແຫ່ງ​ລຸ່ມ​ແມ່​ນໍ້າຂອງ ​ເປັນ​ອີກ​ກິດຈະກຳໜຶ່ງໃນການ​ປະກອບສ່ວນ​ເສີມຂະຫຍາຍການ​ພົວພັນ​ຮ່ວມ​ມືຂອງ 5 ປະ​ເທດ​ລຸ່ມ​ແມ່​ນໍ້າຂອງ ​ແນ​ໃສ່​ເຜີຍ​ແຜ່​ວັດທະນະທໍາ-​ຮີດຄອງ​ປະ​ເພນີອັນ​ດີງາມ ​ແລະ ສົ່ງ​ເສີມ​ການທ່ອງທ່ຽວ ຂອງ​ແຕ່ລະ​ປະ​ເທດ ​​​ແລະ ​ອື່ນໆ.