ຖະແຫຼງຂ່າວ
ຂອງຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ COVID-19
ປະຈໍາວັນທີ 13 ພຶດສະພາ ປີ 2020
ໂດຍ: ທ່ານ ຮສ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ,
ຜູ້ປະຈໍາການ ຄະນະສະເພາະກິດ
I. ສະພາບການເຝົ້າລະວັງ COVID-19 ຢູ່ ສປປ ລາວ ຮອດ 5 ໂມງແລງ ຂອງວັນທີ 12 ພຶດສະພາ 2020

  1. ວຽກງານຈຸດຜ່ານດ່ານ
    • ຈໍານວນຜູ້ເດີນທາງເຂົ້າມາ ມີທັງໝົດ 1,799 ຄົນ
  • ຈຸດຜ່ານດ່ານລາວ-ໄທ ທັງໝົດ 1,087 ຄົນ, ໃນນັ້ນ ມີແຮງງານລາວກັບມາຈາກປະເທດໄທ ຜ່ານດ່ານຊ່ອງເມັກ ແຂວງຈຳປາສັກ 08 ຄົນ, ເຫຼືອນັ້ນ ແມ່ນຜູ້ຂັບລົດຂົນສົ່ງສິນຄ້າ.
  • ຈຸດຜ່ານດ່ານລາວ-ຈີນ ທັງໝົດ 27 ຄົນ, ແຮງງານລາວ 09 ຄົນຜ່ານດ່ານບໍ່ເຕັນ, ແຂວງ ຫຼວງນໍ້າທາ, 18 ຄົນແມ່ນຜູ້ຂັບລົດຂົນສົ່ງສິນຄ້າ.
  • ຈຸດຜ່ານດ່ານລາວ-ຫວຽດ ທັງໝົດ 694 ຄົນ, ທັງໝົດແມ່ນຜູ້ຂັບລົດຂົນສົ່ງສິນຄ້າ.
  • ຈຳນວນຜູ້ເດີນທາງຜ່ານສະໜາມບິນສາກົນວັດໄຕ 00 ຄົນ
    • ໃນທຸກດ່ານ ແມ່ນໄດ້ກວດວັດອຸນຫະພູມຮ່າງກາຍ ແລະ ບໍ່ມີຄົນເປັນໄຂ້.
    • ສຳລັບແຮງງານລາວ ຈຳນວນ 8 ຄົນ ຜ່ານດ່ານຊ່ອງເມັກ ແຂວງຈຳປາສັກ ແມ່ນມີຖິ່ນຖານມາຈາກ ແຂວງຈຳປາສັກ 07 ແລະ ສະຫວັນນະເຂດ 01ຄົນ.
    • ແຮງງານລາວ 9 ຄົນ ຜ່ານດ່ານບໍ່ເຕັນ ແຂວງຫຼວງນໍ້າທາ ແມ່ນມີຖິ່ນຖານມາຈາກ, ນະຄອນຫຼວງວຽງຈັນ 03, ຫຼວງນໍ້າທາ 03, ອຸດົມໄຊ 01, ຈໍາປາສັກ 01 ຄົນ ແລະ ບໍລິຄໍາໄຊ 01.
    • ແຮງງານທັງໝົດໄດ້ເກັບຕົວຢ່າງມາກວດ ແລະ ນຳສົ່ງໄປຈຳກັດບໍລິເວນຢູ່ສູນຂອງແຂວງ ຈົນກ່ວາຈະຄົບກຳນົດ 14 ວັນ.
  1. ການເຝົ້າລະວັງ ແລະ ວິເຄາະ
    • ໃນວັນທີ 12 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 101 ຄົນ, ໃນນັ້ນ ມີກໍລະນີສົງໄສ 02 ຄົນ, ຜູ້ຕິດເຊື້ອທີ່ຄົບຮອດ 14 ວັນ 02 ຄົນ (ນ້ຳເບີ 14 ແລະ 12), ແຮງງານລາວທີ່ກັບມາຈາກປະເທດໄທ 65 ຄົນ, ແຮງງານໄທທີ່ເຂົ້າມາລາວ 02 ຄົນ (ແມ່ນຢູ່ແຂວງໄຊຍະບູລີ) ແລະ ບຸກຄົນທົ່ວໄປບໍ່ມີອາການສະແດງ 30 ຄົນ.
    • ແຮງງານລາວທີ່ກັບມາຈາກປະເທດໄທ 65 ຄົນ ລາຍລະອຽດດັ່ງລຸ່ມນີ້:
  • ແຂວງວຽງຈັນ 25 ຄົນ
  • ຈຳປາສັກ 16 ຄົນ
  • ສະຫວັນນະເຂດ 11 ຄົນ
  • ຄຳມ່ວນ 10 ຄົນ
  • ບໍລິຄຳໄຊ 02 ຄົນ
  • ວຽງຈັນ 02 ຄົນ
  • ສາລະວັນ 01 ຄົນ
    • ຜົນກວດທັງໝົດຂອງແຮງງານລາວ, ແຮງງານໄທ ທີ່ເຂົ້າມາ ແລະ ກໍລະນີສົງໄສຂອງມື້ວານນີ້ ບໍ່ພົບເຊື້ອ.
    • ໝາຍຄວາມວ່າໃນວັນທີ 12 ພຶດສະພາ 2020 ບໍ່ມີຜູ້ຕິດເຊື້ອໃໝ່.
    • ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 12 ພຶດສະພາ 2020 ໄດ້ເກັບຕົວຢ່າງມາກວດທັງໝົດ ມີ 3,975 ຕົວຢ່າງ, ກວດພົບເຊື້ອສະສົມ 19 ຄົນ (31 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).
  1. ການຕິດຕາມຜູ້ເດີນທາງມາຈາກຕ່າງປະເທດໂດຍສະເພາະແຮງງານລາວ ຢູ່ສະຖານທີ່ຈຳກັດບໍລິເວນຕ່າງໆຂອງແຂວງ
    • ປະຈຸບັນນີ້ທົ່ວປະເທດ ມີສູນຈໍາກັດບໍລິເວນ ທັງໝົດ 60 ສູນ, ມີຜູ້ຈຳກັດບໍລິເວນຢູ່ສູນ 1, 919 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດນີ້ບໍ່ມີຜູ້ຕິດເຊື້ອ.
  2. ການຕິດຕາມປີ່ນປົວຄົນເຈັບຢູ່ໂຮງໝໍ
    • ມີຜູ້ຕິດຕາມຢູ່ໂຮງໝໍມິດຕະພາບ 6 ຄົນ ລວມທັງ ກໍລະນີນ້ຳເບີ 14 ທີ່ເອົາກັບຄືນມານອນຕິດຕາມອາການຢູ່ໂຮງໝໍ ທັງໝົດເຫັນວ່າມີອາການປົກກະຕິ, ໄດ້ກວດວິເຄາະຫາເຊື້ອ ນ້ຳເບີ 14 ສອງຄັ້ງຕິດຕໍ່ກັນບໍ່ພົບເຊື້ອ ແລະ ໄດ້ໃຫ້ອອກໂຮງໝໍ. ປະຈຸບັນມີຜູ້ນອນຕິດຕາມຢູ່ໂຮງໝໍ 5 ຄົນ.
  3. ການຕິດຕາມສະພາບການລະບາດຂອງປະເທດໃກ້ຄຽງ ແລະ ການລະບາດຢູ່ໃນໂລກ ເຫັນວ່າ:
    • ມາຮອດເວລາ 6:00 ໂມງເຊົ້າ ຂອງວັນທີ 13 ພຶດສະພາ 2020, ທົ່ວໂລກມີການລາຍງານການລະບາດ ທັງໝົດ 212 (ປະເທດ/ເຂດ)
  • ມີການຢັ້ງຢືນ ຜູ້ຕິດເຊື້ອພະຍາດ COVID-19 ແມ່ນ 4,330,027 (77,737 ໃໝ່)
  • ເສຍຊິວິດ 291,911 (4,780 ໃໝ່) ກວມເອົາ 6.74 % ຂອງຜູ້ຕິດເຊື້ອທັງໝົດ;
  • ປີ່ນປົວຫາຍດີ 1,575,558 (54,161 ໃໝ່) ກວມເອົາ 36.38 % ຂອງຜູ້ຕິດເຊື້ອທັງ
    ໝົດ;
  • ບັນຫາສຳຄັນ ແມ່ນມີບາງປະເທດ ຈຳນວນຜູ້ຕິດເຊື້ອມື້ດຽວ ມີເຖິງ 20,564 ຄົນ ແລະ
    ເສຍຊີວິດ 1,466 ຄົນຕໍ່ມື້;
  • ອັດຕາຄວາມຮ້າຍແຮງຂອງມື້ນີ້ແມ່ນ 6.74 % (ມື້ວານນີ້ 6.75 %).
    • ສະເພາະກຸ່ມປະເທດອາຊຽນກໍ່ເຫັນວ່າ ຍັງມີບາງປະເທດທີ່ມີອັດຕາການຕິດເຊື້ອໃໝ່ປະ
    ຈຳວັນທີ 12 ພຶດສະພາ 2020 ສູງເຖິງ 884 ຄົນ, ໃນມື້ດຽວນີ້ຢູ່ກຸ່ມປະເທດອາຊຽນມີຜູ້ເສຍຊີວິດ 42 ຄົນ.
  1. ຂໍ້ແນະນຳ
    ບັນດາທ່ານທີ່ນັບຖື ແລະ ຮັກແພງ,
    • ຂໍ້ມູນສໍາຄັນໃນມື້ນີ້ແມ່ນການລາຍງານປະຈໍາວັນຂອງລະບົບເຝົ້າລະວັງພະຍາດ ຈາກແຕ່ລະແຂວງທົ່ວປະເທດມາຫາສູນປະຕິບັດງານສຸກເສີນ ຂອງກະຊວງສາທາລະນະສຸກ. ຢັ້ງຢືນວ່າ ສປປ ລາວ ບໍ່ພົບຜູ້ຕິດເຊື້ອໃໝ່ 31 ມື້ແລ້ວ (ເລິ່ມແຕ່ວັນທີ 12 ເມສາ 2020 ເປັນຕົ້ນມາ). ໄດ້ເກັບຕົວຢ່າງມາກວດທັງໝົດ ມີ 3,975 ຕົວຢ່າງ, ມີຈໍານວນຜູ້ຕິດເຊື້ອສະສົມ ທັງໝົດ 19 ຄົນ ອອກໂຮງໝໍມື້ນີ້ອີກ 01 ຄົນ ຍັງຕິດຕາມຢູ່ໂຮງໝໍ 05 ຄົນ.
    • ບັນຫາສຳຄັນໃນໄລຍະຜ່ອນຜັນບາງມາດຕະການຮອດວັນທີ 17 ພຶດສະພາ ນີ້ ແມ່ນເຝົ້າລະວັງຜູ້ເດີນທາງເຂົ້າມາ ສປປ ລາວ ທຸກຄົນຈະຕ້ອງໄດ້ກວດກັ່ນກອງຊອກຫາເຊື້ອພະຍາດບໍ່ໃຫ້ມີຜູ້ຕິດເຊື້ອເລັດລອດອອກໄປຫາຊຸມຊົນ, ຈຳກັດບໍລິເວນຢູ່ສູນຈົນຄົບ 14 ວັນ ແລະ ການເຝົ້າລະວັງຕິດຕາມການປະຕິບັດຄຳແນະນຳຂອງມວນຊົນຢູ່ແຕ່ລະແຂວງວ່າມີຄວາມຮັບຮູ້, ຄວາມເຂົ້າໃຈ ແລະ ເປັນເຈົ້າການປະຕິບັດຄຳແນະນຳຂອງຄະນະສະເພາະກິດໄດ້ດີແນວໃດ. ເພື່ອໃຫ້ມີຄວາມໝັ້ນໃຈວ່າຈະບໍ່ມີຄວາມສ່ຽງຈະເກີດການລະບາດຄັ້ງໃໝ່.
    • ການປະຕິບັດມາດຕະການຜ່ອນຜັນ ຮອດວັນທີ 17 ພຶດສະພາ ຍັງມີຄວາມຈຳເປັນທີ່ຈະຕ້ອງໄດ້ເອົາໃຈໃສ່ ວິທີປ້ອງກັນການຕິດເຊື້ອ ແລະ ການແຜ່ເຊື້ອພະຍາດ ເພື່ອສະກັດກັ້ນບໍ່ໃຫ້ມີກໍລະນີໃໝ່ເກີດຂຶ້ນ. ປັດໄຈສໍາຄັນທີ່ສຸດ ແມ່ນຂຶ້ນກັບພຶດຕິກໍາຂອງພວກເຮົາໝົດທຸກຄົນທີ່ຈະປັບປຸງວິຖີຊີວິດໃໝ່ຂອງຕົນ ຕາມຄຳແນະນຳຂອງຄະນະສະເພາະກິດ. ໃນມື້ວານນີ້ກໍ່ໄດ້ມີກອງປະຊຸມຄະນະສະເພາະກິດໂດຍການເປັນປະທານຂອງທ່ານຮອງນາຍົກລັດຖະມົນຕີ ລັດຖະມົນຕີກະຊວງການເງີນ ຫົວໜ້າຄະນະສະເພາະກິດ ໂດຍໄດ້ ປະເມີນຄືນສະພາບ ການປ້ອງກັນ ແລະ ຄວບຄຸມການລະບາດຂອງພະຍາດ COVID-19ເພື່ອຈະສະເໜີຕໍ່ລັດຖະບານກໍ່ຄືການນຳຂັ້ນສູງຂອງພັກລັດໃນການພິຈາລະນາຜ່ອນຜັນບາງມາດຕະການຕື່ມອີກ
    • ສະນັ້ນ, ຈຶ່ງຮຽກຮ້ອງໃຫ້ທຸກພາກສ່ວນໃນສັງຄົມ ມີຄວາມອົດທົນພະຍາຍາມ ເອົາໃຈ
    ໃສ່ ຮ່ວມແຮງຮ່ວມໃຈກັນ ຈັດຕັ້ງປະຕິບັດຄຳແນະນຳ ແລະ ມາດຕະການຕ່າງໆ ໃຫ້ຖືກຕ້ອງ ແລະ ເຂັ້ມງວດ. ໂດຍສະເພາະ ການລ້າງມືດ້ວຍນໍ້າສະອາດ ແລະ ສະບູ ຫຼື ໃຊ້ເຈວລ້າງມືຂ້າເຊື້ອດ້ວຍເຫຼົ້າ 70% ຂື້ນໄປ, ການປະຕິບັດໄລຍະຫ່າງ, ການໃສ່ຜ້າປິດປາກ-ດັງ ເວລາອອກຈາກບ້ານ ຫຼື ໄປສະຖານທີ່ບໍລິການຕ່າງໆ ໃຫ້ກາຍເປັນຄວາມຊີ່ນເຄີຍໃນການດຳລົງຊີວິດປະຈຳວັນ.
    • ການຖະແຫຼງຂ່າວມາຮອດມື້ນີ້ໄດ້ສີ້ນສຸດລົງ.
    ຂໍຂອບໃຈ ໃນການຕິດຕາມຮັບຊົມ ແລະ ຮັບຟັງ