ທ້າຍອາທິດແລ້ວນີ້ ຂະແໜງປົກປ້ອງແຮງງານ ທີ່ຂຶ້ນກັບສະຫະພັນກຳມະບານແຂວສະຫວັນນະເຂດ ໄດ້ຈັດຊຸດຝຶກອົບຮົມກ່ຽວກັບມາດຕະຖານການດຳລົງຊີວິດໃນການເຮັດວຽກທີ່ມີຄຸນຄ່າແລະເປັນທຳໃຫ້ແກ່ຜູ້ອອກແຮງງານນອກລະບົບ ເຊິ່ງຈັດຂຶ້ນທີ່ຫ້ອງການສະຫະພັນກຳມະບານແຂວງ,ເຂົ້າຮ່ວມເປັນປະທານ ມີທ່ານ ສົມໃຈ ສີສົມພອນ ຮອງປະທານຄະນະບໍລິຫານງານ ສະຫະພັນກຳມະບານແຂວງ,ມີບັນດາທ່ານຜູ້ຕ່າງໜ້າໃຫ້ພະແນກແຮງງານສະຫວັດດີການສັງຄົມແຂວງ ,ຫ້ອງ ການປະກັນສັງຄົມ,ສະພາການຄ້າແລະອຸດສາຫະກຳ,ສູນກາງກຳມະບານລາວ ແລະ ພະນັກງານວິຊາການຈາກບັນດາເມືອງທີ່ກ່ຽວຂ້ອງເຂົ້າຮ່ວມ 19 ທ່ານ,ຍິງ 05 ທ່ານ .

ຈຸດປະສົງຂອງການຈັດກອງປະຊຸມຄັ້ງນີ້ ແມ່ນເພື່ອເປັນການຈັດຕັ້ງປະຕິບັດ ຕາມແຜນການເຄື່ອນໄຫວຂອງການປົກປ້ອງທາງສັງຄົມ ທີ່ສະໜັບສະໜູນໂດຍອົງການ(ອັອກສຟຣາມ) ເປົ້າໝາຍແມ່ນເພື່ອເຮັດໃຫ້ການເຄື່ອນໄຫວວຽກງານໄປຕາມແຜນແລະສອດຄ່ອງກັບສະພາບຄວາມເປັນຈິງ ເພື່ອປົກປ້ອງທາງສັງຄົມ ໃຫ້ແກ່ແຮງງານໃນແລະນອກລະບົບ.ຜູ້ເຂົ້າຮ່ວມຍັງໄດ້ຮັບຟັງ,ຮັບຮູ້ເຖິງພາລະບົດບາດ,ສິດແລະໜ້າທີ່ ຂອງກຳ ມະບານ,ການບັນລະຍາຍກົດໝາຍວ່າດ້ວຍແຮງງານແລະສັນ ຍາແຮງງານບຸກຄົນ ,ການເຂົ້າປະກັນສັງຄົມພາກສະໝັກໃຈ ແລະພາລະບົດບາດຂອງສະພາການຄ້າ ,ຈາກນັ້ນກໍ່ຍັງມີ ການ ລາຍງານຂອງກຸ່ມປູກອ້ອຍແລະ ກຸ່ມປູກກ້ວຍ ຈາກເມືອງເຊໂປນແລະໄຊບູລີ ໂດຍໄດ້ມີການສົນທະນາແລະແລກປ່ຽນຄຳຄິດເຫັນໃນດ້ານຕ່າງໆດ້ວຍກັນຢ່າງມີຜົນສຳເລັດ.

ຂ່າວ/ພາບ:ວຽງສະໄໝ ຊົມຊອບ
MEDIALAOS