ໃນວັນທີ 16 ຕຸລາ ປີ 2019 ນີ້ຢູ່ທີ່ຫ້ອງປະຊຸມສະໂມສອນແຂວງໄດ້ຈັດກອງປະຊຸມແລກປ່ຽນຄຳຄິດເຫັນກ່ຽວກັບການຍົກສູງຄຸນນະພາບວຽກງານການເມືອງ-ແນວຄິດຂື້ນໂດຍເປັນກຽດເຂົ້າຂອງທ່ານ ປທ ສີປະເສີດ ແສນສະຫວັດ ຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ມີຄະນະປະຈຳພັກແຂວງ, ກຳມະການພັກແຂວງ, ຫົວໜ້າພະແນກການ-ຮອງພະແນການຕ່າງໆອ້ອມຂ້າງແຂວງ ແລະອົງການຈັດຕັ້ງມະຫາຊົນ, ພ້ອມດ້ວຍຫົວໜ້າຄະນະໂຄສະນາອົບຮົມເມືອງໃນ 8 ຕົວເມືອງເຂົ້າຮ່ວມ 236 ຄົນ, ຍິງ 65 ຄົນ

ທ່ານ ສີເຮັ່ງ ຫ້ອມສົມບັດ ກຳມະການປະຈຳພັກແຂວງ ຫົວໜ້າຄະນະໂຄສະນາອົບຮົມ ແຂວງສາລະວັນກໍ່ໄດ້ລາຍງານສະພາບການໂດຍຫຍໍ້, ແຂວງສາລະວັນກໍ່ແມ່ນແຂວງໜຶ່ງທີ່ເປັນພື້ນຖານຂອງການປະຕິວັດມາແຕ່ດົນນານກ່ອນມີພັກນຳພາຂະບວນການຕໍ່ສູ່ຕ່າງໆໄດ້ລຸກຂື້ນຕໍ່ສູ້ຢ່າງພິລາອາດຫານເປັນຕົ້ນກໍ່ແມ່ນຂະບວນການຕໍ່ສູ້ຂອງ ອົງແກ້ວໃນຊຸມປີ 1901-1910 ແລະໄດ້ຮັບໃຊ້ຊະນະເປັນກ້າວມາ, ເຊີ່ງທົ່ວແຂວງມີເນື້ອທີ່ທັງໝົດ 10.691 ກິໂລຕາແມັດ, ມີປະຊາກອນທັງໝົດ 4 ແສນກວ່າຄົນ, ປະກອບມີ 8 ຕົວເມືອງ 579 ບ້ານ ແລະມີ 72 ພັນກວ່າຄອບຄົວ, ມີບ້ານທຸກຍາກ 40 ກວ່າບ້ານ ແລະ 2 ພັນກວ່າຄອບຄົວ, ການຂະຫຍາຍຕົວທາງດ້ານເສດຖະກິດສະເລ່ຍ 7,5% ຕໍ່ປີ, ລວມຍອດຜະລິດຕະພັນພາຍໃນສະເລ່ຍຕໍ່ຫົວຄົນ 10 ລ້ານກວ່າກີບ ຫຼືເທົ່າກັບ 1.290 ໂດລາ,

ນອກຈາກນັ້ນກໍ່ແມ່ນວຽກງານກະກຽມກ້ອງປະຊຸມໃຫຍ່ 3 ຂັ້ນຂອງພັກ, ປະຈຸບັນທົ່ວແຂວງມີສະມະຊິກພັກທັງໝົດ 13 ພັນກວ່າສະຫາຍ, ຍິງ 2 ພັນກວ່າສະຫາຍ, ມີ 942 ໜ່ວຍພັກຮາກຖານ, ໃນນັ້ນໜ່ວຍພັກແຂງຮູ້ນຳພາຮອບດ້ານກວມ 80%, ການກະກຽມກອງປະຊຸມໃຫຍ່ 3 ຂັ້ນຂອງພັກກໍ່ໄດ້ດຳເນີນໄປຢ່າງເປັນຂະບວນຟົກຟື້ນພາຍຫຼັງໄດ້ມີມະຕິຂອງສູນກາງພັກ, ຄະນະປະຈຳພັກແຂວງກໍ່ໄດ້ອອກມະຕິເລກທີ 02/ຄຈພຂ, ຂໍຕົກລົງເລກທີ 153,154 ລົງວັນທີ 5 ກໍລະກົດ ປີ 2018 ກ່ຽວກັບການກະກຽມກອງປະຊຸມຢ່າງເປັນລະບົບຄົບຊຸດ ແລະສອດຄອງກັບມະຕິຄຳສັງຂັ້ນເທິງວາງອອກ, ປະຈຸບັນຂັ້ນແຂວງໄດ້ກະກຽມຮ່າງລາຍງານການເມືອງ, ແຜນພັດທະນາເສດຖະກິດ-ສັງຄົມສຳເລັດໂດຍພື້ນຖານ, ສຳລັບຂັ້ນເມືອງແມ່ນສຳເລັດໄປແລ້ວ 3 ເມືອງຄື: ເມືອງສະໝ້ວຍ, ເມືອງຕະໂອ້ຍ ແລະເມືອງຕຸ້ມລ້ານ, ພ້ອມນັ້ນຄະນະໂຄສະນາອົບຮົມແຂວງຍັງໄດ້ເອາໃຈໃສ່ໃນການຜັນຂະຫຍາຍມະຕິ X ຂອງພັກ ແລະມະຕິ VIII ຂອງອົງຄະນະພັກແຂວງໃຫ້ເຂົ້າສູ່ລວງເລິກ

ຈາກນັ້ນທ່ານ ປທ ສີປະເສີດ ແສນສະຫວັດ ຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກກໍ່ໄດ້ຍົກໃຫ້ເຫັນຫຼາຍສາຍເຫດ, ຫຼາຍບັນຫາ ແລະຫຼາຍປະກົດການທີ່ເກີດຂື້ນກ່ຽວກັບການຍົກສູງຄຸນນະພາບວຽກງານການເມືອງ-ແນວຄິດເປັນຕົ້ນກໍ່ແມ່ນປະກົດການຫຍໍ້ທທໍ້, ບັນຫາເສດຖະກິດ, ບັນຫາຊົນຊັນຖານະ, ພ້ອມດ້ວຍຄວາມສາມະຄີຕ່າງໆ ແລະການແກ້ໄຂຄວາມທຸກຍາກໃນເຂດຫ່າງໄກສອກຫຼິກ, ຄວາມຫ່າງເຫຼິງຈາກປະຊາຊົນ, ນອກຈາກນັ້ນກໍ່ໄດ້ຍົກໃຫ້ເຫັນກ່ຽວກັບການປົກປັກຮັກສາປະເທດຊາດ, ການຕໍ່ສູ້ຂອງຂະບວນການຕ່າງໆໃນແຕ່ລະໄລຍະ ແລະການເສຍສະຫຼະຂອງຂອງທ່ານຜູ້ນຳ

ພາບ-ຂ່າວ: ສິດຕາ ເພັດວົງສາ
MEDIALAOS