ວັນທີ 18 ຕຸລາ ນີ້ ຄະນະຊາວໜຸ່ມ ປປ ລາວ ແຂວງເຊກອງ ຈັດພິທີ ປະເມີນແຜນກຳນົດພະນັກງານນໍາພາ-ຄຸ້ມຄອງ ປະຈໍາປີ 2019 ໂດຍການເປັນປະທານຂອງທ່ານ ປອ ຕຸລາວັນ ວົງໄຊ ເລຂາຄະນະພັກ, ເລຂາຄະນະບໍລິຫານງານ ຊປປ ລາວ ແຂວງ, ມີຄະນະກຳມະການກໍານົດພະນັກງານນໍາພາ-ຄຸ້ມຄອງ ຂັ້ນແຂວງພ້ອມດ້ວຍພະນັກງານນໍາພາ, ພະນັກງານລັດຖະກອນພາຍໃນ ຊປປ ລາວແຂວງເຂົ້າຮ່ວມ.

ໃນພິທີ ທ່ານ ປອ ຕຸລາວັນ ວົງໄຊ ໄດ້ຜ່ານແຈ້ງການແນະນໍາ, ສະບັບເລກທີ 24/ຄຈຂ, ລົງວັນທີ 20 ກຸມພາ 2019 ວ່າດ້ວຍກະກຽມປະເມີນແຜນກໍານົດພະນັກງານນໍາພາ-ຄຸ້ມຄອງ ອ້ອມຂ້າງແຂວງ ແລະ 4 ຕົວເມືອງ ປະຈໍາປີ 2019, ພ້ອມດຽວກັນນີ້, ຄະນະກຳມະການກໍານົດພະນັກງານນໍາພາ-ຄຸ້ມຄອງ ໄດ້ຜ່ານດຳລັດສະບັບເລກທີ 461/ລບ, ລົງວັນທີ 9 ຕຸລາ 2018 ວ່າດ້ວຍມາດຖານຕໍາແໜ່ງບໍລິຫານຂອງລັດຖະກອນແຫ່ງ ສປປ ລາວ ແລະຜ່ານບາງເນື້ອໃນຄໍາແນະນໍາຂອງຄະນະຈັດຕັ້ງສູນກາງພັກສະບັບເລກທີ 292/ກມສພ, ລົງວັນທີ 26 ເມສາ 2018.

ທ່ານ ປອ ຕຸລາວັນ ວົງໄຊ ຍັງໄດ້ເນັ້ນໃຫ້ບັນດາຜູ້ແທນສົມບູນ ຈົ່ງພ້ອມກັນເປັນເຈົ້າການໃຊ້ຄວາມຮູ້ຄວາມສາມາດ, ສະຕິປັນຍາຂອງຕົນຄົ້ນຄວ້າໃຫ້ຖີ່ຖ້ວນໃນການປະເມີນແຜນກຳນົດພະນັກງານນຳພາໃນເປົ້າໝາຍເກົ່າ ແລະ ເປົ້າໝາຍຂະຫຍາຍໃໝ່ ເພື່ອໃຫ້ໄດ້ພະນັກງານນຳພາ-ຄຸ້ມຄອງຂັ້ນແຂວງຂັ້ນຂອງຕົນ ທີ່ມີຄວາມຈົ່ງຮັກພັກດີ, ມີນໍ້າໃຈເສຍສະຫຼະຕໍ່ປະເທດຊາດ, ມີຄວາມບໍລິສຸດສັດຊື່ດຳລົງຊີວິດແບບປອດໃສຂາວສະອາດ, ມີແບບແຜນການນຳພາເຮັດວຽກທີ່ຖືກຕ້ອງ ແລະ ມີຄວາມຮູ້ຄວາມສາມາດຊີ້ນຳໆພາໜ້າທີ່ວຽກງານໃຫ້ໄດ້ດີຂຶ້ນກວ່າເກົ່າ ທັງນີ້ເພື່ອຮັບປະກັນການປະເມີນທີ່ຖືກຕ້ອງ ແລະຮັບປະກັນທາງດ້ານຄຸນນະພາບ ເພື່ອໃຫ້ໄດ້ພະນັກງານນໍາພາ-ຄຸ້ມຄອງ ທີ່ຄົບຕາມມາດຖານເງື່ອນໄຂທີ່ກຳນົດໄວ້, ຂະນະດຽວກັນນີ້ ບັນດາຜູ້ແທນສົມບູນ ກໍໄດ້ໃຊ້ສິດຄັດເລືອກ ລົງປະຊາມະຕິການປ່ອນບັດປະເມີນແຜນການກຳນົດພະນັກງານນຳພາ-ຄຸ້ມຄອງດັ່ງກ່າວ.

ຂ່າວ : ພຸດທະສອນ
Medialaos