ທ່ານ ເກຍ ອູ໊ສິດທິເດດ ເຈົ້າຂອງໂຮງງານນໍ້າດື່ມ ແລະ ນໍ້າກ້ອນໂລມາຄຳ ແມ່ນນັກທຸລະກິດຜູ້ໜຶ່ງຂອງແຂວງສະຫວັນນະເຂດ ພວກເຮົາທີ່ທ່ານ ໄດ້ຮັບລາງວັນທຸລະກິດຂະໜາດນ້ອຍ ແລະ ກາງດີເດັ່ນຂອງອາຊຽນໃນການປະກອບສ່ວນຕໍ່ສັງຄົມຊ່ວຍເຫຼືອສັງຄົມ.

ດັ່ງທ່ານໃຫ້ສຳພາດວ່າ: ໃນການຮັບລາງວັນທຸລະກິດດີເດັ່ນຂອງອາຊຽນປະຈຳ ສ ປປ ລາວ ໃນຄັ້ງນີ້ ແມ່ນການໃຫ້ຂໍ້ມູນທາງສະພາການຄ້າ ແລະ ອຸດສາຫະກຳແຫ່ງຊາດຂອງລາວເຮົາເພີ່ນໄດ້ເອົາມາດຖານເງື່ອນໄຂເຂົ້າໄປແຂ່ງຂັນຄັດເລືອກເອົາທຸລະກິດດີເດັ່ນຂອງຊາດໃນມາດຖານເງື່ອນໄຂຂອງອາຊຽນທີ່ຈັດຢູ່ ສ ປປ ລາວ ເຮົາປະຈຳປີ 2019 ແລະ ໂຮງງານນໍ້າດື່ມ ແລະ ນໍ້າກ້ອນໂລມາຄຳ ກໍ່ເປັນ 1 ໃນ 16 ຫນ່ວຍທຸລະກິດທີ່ໄດ້ຮັບລາງວັນອາຊຽນດີເດັ່ນຂອງ ສປປ ລາວປະຈຳປີ 2019 ຈາກທັງໝົດ 18 ລາງວັນ ເຫດຜົນ ແລະ ມາດຖານທີ່ໄດ້ຮັບລາງວັນທຸລະກິດຂະໜາດນ້ອຍ ແລະ ກາງດີເດັ່ນ ລາງວັນປະກອບສ່ວນຕໍ່ສັງຄົມຍ້ອນວ່າເນັ້ນພັດທະນາທຸລະກິດແບບຢືນຍົງ, ສິນຄ້າໄດ້ມາດຕາຖານ ແລະ ຄຸນນະພາບ ຄຽງຄູ່ກັບການປະກອບສ່ວນຊ່ວຍເຫຼືອສັງຄົມ, ໂຄງການທີ່ພົ້ນເດັ່ນຄືໄດ້ມີໂອກາດເຂົ້າເປັນສ່ວນຮ່ວມນຳອົງການຈັດຕັ້ງພັກ-ລັດ ແກ້ໄຂຄວາມທຸກຍາກ ຂອງປະຊາຊົນ 2 ບ້ານຄື:

ບ້ານຄໍາປ່າແໜ ແລະ ບ້ານປ່າກ້ວຍ ເມືອງຈຳພອນ ແຂວງສະຫວັນນະເຂດຂອງພວກເຮົາ, ໂດຍຕົນ ແລະ ທີມງານໄດ້ສຸມທຶນ ແລະເຮືອແຮງ ແລະ ສະຕິປັນຍາພັດທະນາຢ່າງຈິງໃຈ ແລະ ບໍ່ຮູ້ອິດຮູ້ເມື່ອຍ,ໂຄງການນີ້ໄດ້ພັດທະນາຈັດພື້ນຖານໂຄງລ່າງເຊິ່ງໄດ້ ຫັນປ່ຽນຊີວິດການເປັນຢູ່ຂອງປະຊາຊົນໃນຈຳນວນ 111 ຄອບຄົວ 600ກວ່າຄົນ, ມີທີ່ຢູ່ອາໄສຖາວອນ, ມີອາຊີບທີ່ໝັ້ນຄົງ, ມີຊັບສິນເປັນຂອງຕົນເອງມີຊີວິດການເປັນຢູ່ທີ່ດີຂຶ້ນພ້ອມທັງສາມາດເຂົ້າເຖິງການສຶກສາ ແລະ ສາທາລະນະສຸກໄດ້ສະດວກສະບາຍຂຶ້ນ.

ນອກຈາກລາງວັນອາຊຽນປະຈຳປີ 2019 ທີ່ທ່ານໄດ້ຮັບແລ້ວຜ່ານມາທ່ານກໍ່ຍັງໄດ້ຮັບຫຼຽນພັດທະນາດີເດັ່ນແຫ່ງຊາດໃນປີ 2015 ຢູ່ ໜຶ່ງໃນ 5 ທ່ານ ພ້ອມນັ້ນຍັງໄດ້ຮັບການຍ້ອງຍໍຫຼາຍຂັ້ນບໍ່ວ່າຈະເປັນຫຼຽນພັດທະນາຕ່າງໆຊັ້ນ1-2 ແລະ ໃນວັນທີ 2 ພະຈິກ 2019ນີ້ ທ່ານກໍ່ຈະໄດ້ໄປຮັບລາງວັນ ສ້າງພັດທະນາດີເດັ່ນຂອງອາຊຽນຢູ່ບາງກອກ ປະເທດໄທເປັນເຈົ້າພາບຕື່ມອີກ.
ທ່ານ ເກຍ ອູ໊ສິດທິເດດ ຍັງກ່າວຕື່ມອີກວ່າສຳລັບການຊ່ວຍເຫຼືອຕໍ່ສັງຄົມແມ່ນຍັງບໍ່ໄດ້ລົດລະຈະໄດ້ສືບຕໍ່ຊ່ວຍເຫຼືອຕໍ່ໄປອີງຕາມທ່າແຮງ ແລະ ເງືອນໄຂໃນຕໍ່ໜ້າ.

ຂ່າວ: ວິລັດດາ ດວງຈັນທາ
Medialaos