ໃນຕອນບ່າຍຂອງວັນທີ 21 ຕຸລາ 2019 ສະຫະພັນກຳມະບານນະຄອນໄກສອນພົມວິຫານ ໄດ້ມີການຈັດພິທີ ມອບ-ຮັບ ໃບຢັ້ງຢືນ 5 ເປັນເຈົ້າ ປະຈຳປີ 2019 ໃຫ້ແກ່ 57 ກຳມະບານຮາກຖານ ຂຶ້ນຢ່າງເປັນທາງການທີ່ສະໂມສອນຂອງຫ້ອງວ່າການປົກຄອງນະຄອນດັ່ງກ່າວ ໂດຍການເຂົ້າຮ່ວມຂອງທ່ານ ຄຳຕັນ ສີໂພໄຊ ຮອງປະທານຄະນະບໍລິຫານງານສະຫະພັນກຳມະບານແຂວງ, ມີ ທ່ານ ກູນາ ເຫຼື່ອມເທພາ ຄະນະປະຈຳພັກນະຄອນ, ທ່ານ ບຸນຍໍ ວໍລະສັກສິດ ປະທານຄະນະບໍລິຫານງານສະຫະພັນກຳມະບານນະຄອນໄກສອນພົມວິຫານ ຕະຫຼອດຮອດຄະນະກຳມະບານຮາກຖານທັງ 57 ຮາກຖານ ພ້ອມດ້ວຍສະມາຊິກຂອງຕົນເຂົ້າຮ່ວມ ຈຳນວນ 150 ທ່ານ, ຍິງ 31 ທ່ານ.

ໃນພິທີ ທ່ານ ນາງ ບົວລຽນ ເກດໂສພາພອນ ປະທານກຳມະບານຮາກຖານ ຫ້ອງການສຶກສາທິການ ແລະ ກິລານະຄອນໄກສອນພົມວິຫານ ກໍ່ໄດ້ຕາງໜ້າໃຫ້ 57 ກຳມະບານຮາກຖານ ຂຶ້ນຜ່ານບົດສະຫຼຸບເນື້ອໃນຂໍ້ແຂ່ງຂັນ 5 ເປັນເຈົ້າ ປະຈໍາປີ 2019 ແລະ ທິດທາງແຜນການ 2020 ຢ່າງຮອບດ້ານ ໂດຍຍົກໃຫ້ເຫັນວ່າ: ກຳມະບານຮາກຖານຫ້ອງການສຶກສາທິການ ແລະ ກິລາ ແມ່ນອົງການຈັດຕັ້ງໜຶ່ງທີ່ສຳຄັນ, ຊຶ່ງເປັນຮາກຖານເອກະລາດ ທີ່ສາຍການຈັດຕັ້ງຂຶ້ນກັບສະຫະພັນກຳມະບານນະຄອນໄກສອນພົມວິຫານ ສ່ວນສາຍວິຊາສະເພາະແມ່ນຂຶ້ນກັບພະແນກສຶກສາທິການ ແລະ ກິລາແຂວງ ໂດຍເປັນເສນາທິການໃຫ້ແກ່ໜ່ວຍພັກ, ຫົວໜ້າຫ້ອງການສຶກສາທິການ ແລະ ກິລາ, ຄະນະສະຫະພັນກຳມະບານນະຄອນ, ໃນການຈັດຕັ້ງປະຕິບັດແນວທາງນະໂຍບາຍຂອງພັກ-ລັດທີ່ວາງອອກໃນແຕ່ລະໄລຍະ ເພື່ອເຜີຍແຜ່ໃຫ້ແກ່ພະນັກງານ-ລັດຖະກອນ, ສະມາຊິກກຳມະບານພາຍໃນຮາກຖານຂອງຕົນໃຫ້ໄດ້ຮັບຮູ້ເຊື່ອມຊຶມຢ່າງທົ່ວເຖິງ ຊຶ່ງຜ່ານການຈັດຕັ້ງປະຕິບັດວຽກງານໃນໄລຍະຜ່ານມາໂດຍຕິດພັນກັບການປະເມີນ 5 ເປັນເຈົ້າເຊັ່ນ:

ເປັນເຈົ້າໂຄສະນາສຶກສາອົບຮົມການເມືອງ-ແນວຄິດ ໄດ້ 91 %, ເປັນເຈົ້າໃນການປັບປຸງແບບແຜນການນຳພາ ແລະ ຂະຫຍາຍການຈັດຕັ້ງກຳມະບານ ໄດ້ 92%, ເປັນເຈົ້າປົກປ້ອງສິດຜົນປະໂຫຍດອັນຊອບທໍາຂອງພະນັກງານ,ສະມາຊິກກຳມະບານ ,ກຳມະກອນ ແລະ ຊາວຜູ້ອອກແຮງງານ ໄດ້ 90%. ເປັນເຈົ້າເຂົ້າຮ່ວມໃນການຕິດຕາມ,ກວດກາການຄຸ້ມຄອງຂອງລັດ,ຄຸ້ມຄອງເສດຖະກິດ,ວັດທະນະທຳ-ສັງຄົມ ໄດ້ 95% ແລະ ເປັນເຈົ້າເຂົ້າຮ່ວມໃນການຈັດຕັ້ງປະຕິບັດແນວທາງການຕ່າງປະເທດຂອງພັກ,ລະບຽບກົດໝາຍຂອງລັດ ໄດ້ 89% ສະເລ່ຍຜົນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ພາຍໃນ 1 ປີຜ່ານມາ ສາມາດປະຕິບັດໄດ້ 91,4 %. ນອກນັ້ນ, ພິທີຍັງໄດ້ມີການຜ່ານຂໍ້ຕົກລົງຂອງປະທານຄະນະບໍລິຫານງານສະຫະພັນກໍາມະບານນະຄອນໄກສອນພົມວິຫານ ວ່າດ້ວຍການຢັ້ງຢືນ ເອົາກຳມະບານຮາກຖານທັງ 57 ຮາກຖານ ເປັນກຳມະບານຮາກຖານ 5 ເປັນເຈົ້າປະຈຳປີ 2019 ອີກດ້ວຍ, ໂດຍການໃຫ້ກຽດມອບໃບຢັ້ງຢືນຂອງທ່ານ ບຸນຍໍ ວໍລະສັກສິດ ປະທານຄະນະບໍລິຫານງານສະຫະພັນກຳມະບານນະຄອນໄກສອນພົມວິຫານຢ່າງສົມກຽດ.

ຂ່າວ – ພາບ : ວັນນະເລດ ມະນີວົງ
savannakhet medialaos