ພິທີມອບຮັບເງິນນະໂຍບາຍອູດໜູນ ເສຍສະຫຼະຊີວິດໃນປາງສົງຄາມ ຕາມດຳລັດ 272/ລບ ປະຈຳປີ 2019ໄດ້ຈັດຂື້ນໃນວັນທີ 23 ຕຸລາ 2019 ນີ້ ຢູ່ທີ່ຫ້ອງປະຊຸມພະແນກແຮງງານ ແລະ ສະຫວັດດີການສັງຄົມ ແຂວງໄຊຍະບູລີ ໃຫ້ກຽດເຂົ້າຮ່ວມມອບເງິນໃນຄັ້ງນີ້ ມີ: ທ່ານ ນາງແພງຈັນ ແກ້ວມະນີວົງ ກຳມະການພັກແຂວງ ຫົວໜ້າພະແນກ ແຮງງານ ແລະ ສະຫວັດດີການສັງຄົມ ແຂວງມີພາກສ່ວນຂະແໜງການທີ່ກ່ຽວຂ້ອງພ້ອມດ້ວຍລູກຫຼານຍາດຕິພີ່ນ້ອງຜູ້ທີ່ໄດ້ຮັບເງິນນະໂຍບາຍເຂົ້າຮ່ວມ.

ທ່ານ ນາງ ແພງຈັນແກ້ວ ມະນີວົງ ຫົວໜ້າພະແນກ ຮສສ ແຂວງໄດ້ກ່າວວ່າ: ພິທີມອບຮັບເງິນນະໂຍບາຍຜູ້ທີ່ມີຜົນງານ ແລະ ຄຸນງາມຄວາມດີໃນພາລະກິດຮັບໃຊ້ການປະຕິວັດຊາດປະຊາທິປະໄຕ ໄດ້ອຸທິດເລືອດເນື້ອເຫື່ອແຮງເຂົ້າໃນການປົກປັກຮັກສາເຂດນ້ຳແດນດິນ ຜືນແຜ່ນດິນອັນຄົບຖ້ວນ ແລະ ໄດ້ເສຍສະຫຼະຊີວິດ ຍ້ອນການສູ້ຮົບ ແລະ ຮັບໃຊ້ ການສູ້ຮົບໃນສະໄໝສົງຄາມຕາມດຳລັດ 272/ລບ ໃນຄັ້ງນີ້ຍ້ອນຄວາມເປັນຫ່ວງເປັນໄຍ ຂອງພັກ-ລັດກໍ່ຄື ອຳນາດການປົກຄອງທຸກຂັ້ນ ໄລຍະຜ່ານມາກໍ່ໄດ້ເປັນເຈົ້າການໃນການຄູ້ມຄອງ ແລະ ເກັບກຳສະຖິຕິພະນັກງານບໍານານ ແລະ ພະນັກງານເສຍອົງຄະ ຜູ້ມີຄຸນງາມຄວາມດີຕໍ່ການປະຕິວັດຊາດປະຊາທິປະໄຕ ແລະ ໄດ້ເອົາໃຈໃສ່ສຶກສາອົບຮົມການເມືອງແນວຄິດ ຢ່າງເປັນລະບົບຕໍ່ເນື່ອງພ້ອມນີ້ຍັງໄດ້ມີນະໂຍບາຍສະເໜີຂໍງົບປະມານຈາກແຂວງ ແລະ ສູນກາງເພື່ອປະຕິບັດນະໂຍບາຍຕາມດຳລັດ 272/ລບ ໃນແຕ່ລະປີ ສະເພາະແຂວງໄຊຍະບູລີກຳມະການຂັ້ນແຂວງໄດ້ຄົ້ນຄ້ວາຕາມດຳລັດຂອງລັດຖະບານ ຍັງຄ້າງປະຕິບັດທັງໝົດທົ່ວແຂວງຈຳນວນ 2.017 ທ່ານ ໃນປີ 2019 ຕາມການແບ່ງປັນຕົວເລກຂອງກົມນະໂຍບາຍຕໍ່ຜູ້ມີຜົນງານ, ພິການ, ຜູ້ອາຍຸສຸງ, ໂດຍອີງຕາມມະຕິຮັບຮອງຈາກກະຊວງການເງິນທົ່ວປະເທດທັງໝົດ 3.913 ທ່ານ, ໃນນີ້ສະເພາະແຂວງໄຊຍະບູລີໄດ້ຮັບນະໂຍບາຍທັງໝົດ 123 ທ່ານ, ເປັນເງິນ 2ຕື້701 ລ້ານກ່ວາກີບ, ແລະ ພິທີມອບໃນຊຸດນີ້ມີຈຳນວນ 37 ທ່ານ, ຈາກ 2 ເມືອງ ຄື: ເມືອງໄຊຍະບູລີ ມີ 20 ທ່ານ, ໄດ້ຮັບເງິນທັງໝົດ 482 ລ້ານກ່ວາກີບ, ເມືອງພຽງມີ 17ທ່ານ, ໄດ້ຮັບເງິນທັງໝົດ 412 ລ້ານກ່ວາກີບ, ໂດຍໃຫ້ກຽດມອບຂອງທ່ານ ນາງແພງຈັນ ແກ້ວມະນີວົງ ຫົວໜ້າພະແນກ ຮສສ ແຂວງ.

ຂ່າວ: ບຸນທີ ແສງຈັນທະລາ
Medialaos Xayaboury