ໃນວັນທີ 23 ຕຸລາ 2019 ນີ້ແຂວງໄຊຍະບູລີໄດ້ຈັດພິທີສະເຫຼີມສະຫຼອງວັນອາຫານໂລກ, ວັນສາກົນ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກຂື້ນຢູ່ທີ່ຫ້ອງປະຊຸມພະແນກກະສິກຳ ແລະ ປ່າໄມ້ແຂວງໄຊຍະບູລີໂດຍໃຫ້ກຽດເຂົ້າຮ່ວມຂອງທ່ານ ຍັນຍົງ ສີປະເສີດ ຮອງເລຂາພັກແຂວງ ຮອງເຈົ້າແຂວງໄຊຍະບູລີ, ມີກຳມະການພັກແຂວງ, ເຈົ້າເມືອງ, ຮອງເຈົ້າເມືອງ, ຫົວໜ້າພະແນກການກົມກອງ, ພະນັກງານຫຼັກແຫຼ່ງຂອງແຂວງ, ຂອງເມືອງໄຊຍະບູລີ ເຂົ້າຮ່ວມ 200 ກ່ວາຄົນ.

ທ່ານ ຍັນຍົງ ສີປະເສີດ ຮອງເລຂາພັກແຂວງ ຮອງເຈົ້າແຂວງໄດ້ກ່າວວ່າ: ການສະເຫຼີມສະຫຼອງວັນອາຫານໂລກ ປີ2019 ແມ່ນຄົບຮອບ 39 ປີພາຍໃຕ້ຄຳຂັວນ “ ການກະທໍາຂອງພວກເຮົາຄືອະນາຄົດຂອງພວກເຮົາສົ່ງເສີມການກິນອາຫານທີ່ດີມີຄຸນຄ່າຕໍ່ສຸຂະພາບເພື່ອການລຶບລ້າງຄວາມອຶດຫີວໃນໂລກ” ການລະນຶກວັນສາກົນລຶບລ້າງຄວາມທຸກຍາກແມ່ນຄົບຮອບ 27 ປີພາຍໃຕ້ຄຳຂັວນ “ຮ່ວມກັນສ້າງຄວາມເຂັ້ມແຂງໃຫ້ກັບເດັກນ້ອຍ, ຄອບຄົວ, ຊຸມຊົນເພື່ອລຶບລ້າງຄວາມທຸກຍາກ ” ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກຄົບຮອບ 16 ປີພາຍໃຕ້ຄຳຂັວນ “ແຂ່ງຂັນຮັກຊາດ ແລະ ພັດທະນາຊົນນະບົດເພື່ອແກ້ໄຂຄວາມທຸກຍາກຂອງປະຊາຊົນ” ການສະເຫຼີມສະຫຼອງ 3 ວັນດັ່ງກ່າວໃນປີນີ້ ແມ່ນດຳເນີນໄປຢູ່ໃນເງື່ອນໄຂທີ່ບັນດາປະເທດ ນັບທັງປະເທດເຮົາໄດ້ມີຜົນສຳເລັດເບື້ອງຕົ້ນໃນການຈັດຕັ້ງປະຕິບັດເປົ້າໝາຍຂອງການພັດທະນາແບບຍືນຍົງຄຽງຄູ່ກັນນັ້ນຫຼາຍປະເທດກໍ່ໄດ້ຖືກຜົນກະທົບຂອງໄພພິບັດຕ່າງໆຢ່າງໜັກໜ່ວງເຊິ່ງໄດ້ກາຍເປັນອຸປະສັກຕໍ່ການສູ້ຊົນບັນລຸເປົ້າໝາຍໃນການລຶບລ້າງຄວາມທຸກຍາກ ແລະ ໄພອຶດຫີວຂອງທົ່ວໂລກວາງໄວ້ວ່າໃຫ້ສຳເລັດພື້ນຖານໃນປີ 2030 ສຳລັບແຂວງໄຊຍະບູລີ ປີ 2019 ກໍ່ໄດ້ຮັບຜົນກະທົບຈາກໄພແຫ້ງແລ້ງແກ່ຍາວເຮັດໃຫ້ເຂົ້າພືດພັກຕ່າງໆ ແລະ ສັດລ້ຽງໄດ້ຮັບຜົນເສຍຫາຍເຊັ່ນ : ການລະບາດບົ້ງຝຸງສາລີມີເນື້ອທີ່ສາລີຖືກທຳລາຍ 18.542,65ເຮັກຕາ, ມີ 209 ບ້ານ, ມີ 10.411 ຄອບຄົວ, ມີເນື້ອທີ່ຖືກເສຍຫາຍ 5.510,48 ເຮັກຕາ, ພົບເຊື້ອພະຍາດອະຫິວາໝູອາຟິກກາ ຢູ່ບ້ານໂຮມໄຊມີຈຳນວນ 224 ໂຕ, ຕໍ່ກັບສະພາບດັ່ງກ່າວແຂວງ ແລະ ກົມປູກຝັງໄດ້ວາງມາດຕະການຄວບຄຸມ, ສະກັດກັ້ນ ກຳນົດເຂດລະບາດ 3 ກິໂລແມັດ, ການແຜ່ລະບາດພະຍາດອະຫິວາໝູອາຟິກກາ ດ້ວຍການຂ້າໝູຕິດເຊື້ອ ແລະ ປະຕິບັດຕາມຂັ້ນຕອນຂອງວິຊາການ, ທ່ານຍັງກ່າວຕື່ມວ່າ:

ສຳລັບ ປີ2020 ແຂວງໄຊຍະບູ ລີຕ້ອງໄດ້ສຸມໃສ່ການພະລິດໃຫ້ມີສ່ວນແຮໄວ້ ເພື່ອເປັນສະບຽງອາຫານພາຍໃນ ແລະ ຂາຍເປັນສິນຄ້າ ຄື: ສູ້ຊົນປູກເຂົ້ານາແຊງເຂົ້າເນີນສຸງ ແລະ ເຂົ້ານາປີໃຫ້ໄດ້ຜົນຜະລິດທັງໝົດ 198.000 ໂຕນ, ປູກພືດລະດູແລ້ງ ແລະ ລະດູຝົນໃຫ້ໄດ້ຜົນຜະລິດ 1.300.000 ໂຕນ, ລ້ຽງຝຸງສັດໃຫເຂະຫຍາຍຕົວໃນລະດັບ 7% ຕໍ່ປີ, ສືບຕໍ່ປະຕິບັດທິດນຳສາມສ້າງ ເຂົ້າສູ່ລວງເລິກຕາມບົດແນະນຳ ເລກທີ 0830 ຂອງກະຊວງກະສິກຳ ແລະ ປ່າໄມ້ ກ່ຽວກັບການຈັດຕັ້ງປະຕິບັດດຳລັດວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ ຄື: ລຶບລ້າງຄວາມທຸກຍາກຂັ້ນຄອບຄົວ ໃຫ້ຍັງເຫຼືອບໍ່ເກີນ 1,5 ຂອງຄອບຄົວທັງໝົດໃນທົ່ວແຂວງ, ຂັ້ນບ້ານໃຫ້ໄດ້ 6 ບ້ານ, ຂັ້ນເມືອງໃຫ້ໄດ້ 1 ເມືອງ(ເມືອງຊຽງຮ່ອນ) ດ້ານການພັດທະນາ ສ້າງຄອບຄົວພັດທະນາໃຫ້ໄດ້ 1000 ຄອບຄົວຂື້ນໄປ ຄອບຄົວພັດທະນາຈະກວມ 83%, ສ້າງບ້ານພັດທະນາໃຫ້ໄດ້ 10 ບ້ານ, ທົ່ວແຂວງຈະມີບ້ານພັດທະນາ 65% ຂອງຈຳນວນບ້ານທັງໝົດ ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດ ໃຫ້ໄດ້ 3 ຈຸດ, ເມືອງເຂັ້ມແຂງຮອບດ້ານໃຫ້ໄດ້ 1 ເມືອງ.

ຂ່າວ: ບຸນທີ ແສງຈັນທະລາ
Medialaos Xayaboury