ຈະນຳພາທ່ານໄປຮູ້ຈັກກັບແຫຼ່ງທ່ອງທ່ຽວທີ່ມີສື່ສຽງຂອງນະຄອນຊຽງໄຮ້ ນະຄອນແຫ່ງຄວາມຈະເລີນຮຸ່ງເຮືອງ ແລະ ສີວິໄລ, ມີຄວາມກ້າວໜ້າທາງດ້ານເທັກໂນໂລຊີທີ່ລ້ຳສະໄໝ ແລະ ຍັງເປັນສູນກາງທາງດ້ານການເມືອງ, ເສດຖະກິດ, ວັດທະນະທໍາ, ການບໍລິການ ແລະ ການທ່ອງທ່ຽວ. ນະຄອນຊຽງໄຮ້ມີປະຊາກອນປະມານ 25 ລ້ານຄົນ, ປະຊາກອນມີລາຍຮັບໂດຍສະເລ່ຍ 130.000 ຢວນຕໍ່ຄົນຕໍ່ປີ.

ນັບວ່າເປັນໂຊກດີທີ່ຜູ້ຂຽນໄດ້ມີໂອກາດເຂົ້າຮ່ວມກິດຈະກຳ ໃນໂຄງການທັດສະນະສຶກສາເກັບກຳຂໍ້ມູນເພື່ອໂຄສະນາສົ່ງເສີມການທ່ອງທ່ຽວຈີນ ເຊິ່ງມີສື່ມວນຊົນລາວຈາກກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ບັນດາສຳນັກຂ່າວຈາກນະຄອນຫຼວງວຽງຈັນ ແລະ ສື່ມວນຊົນຈາກ 3 ແຂວງຄໍາມ່ວນ, ສະຫວັນນະເຂດ ແລະ ໄຊຍະບູລີ ເຊິ່ງຈັດຂຶ້ນໂດຍການຮ່ວມມືລະຫວ່າງກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ສປປ ລາວ ແລະ ກະຊວງວັດທະນະທໍາ ແລະ ທ່ອງທ່ຽວ ສປ ຈີນ ໂດຍການສະໜັບສະໜູນຈາກສູນວັດທະນະທຳຈີນ ປະຈຳລາວ, ບໍລິສັດທ່ອງທ່ຽວສາກົນລາວແຮັບປີ້ ແລະ ບໍລິສັດທ່ອງທ່ຽວໂຢເຄີ ນະຄອນຊຽງໄຮ້ ເພື່ອໂຄສະນາສົ່ງເສີມການທ່ອງທ່ຽວຈີນ ທີ່ນະຄອນຊຽງໄຮ້, ເມືອງຊູໂຈ, ຫາງໂຈ ແລະ ເມືອງຫວງຊ່ານ ສປ ຈີນ ໃນລະຫວ່າງວັນທີ 13-22 ຕຸລາ 2019 ຜ່ານມາ.

ສຳລັບນະຄອນຊຽງໄຮ້ ເປັນເມືອງທຳອິດທີ່ຄະນະສື່ມວນຊົນລາວໄດ້ຮ່ວມກິດຈະກຳ ເຊິ່ງຈະພາທ່ານໄປຮູ້ຈັກກັບສະຖານທີ່ທ່ອງທ່ຽວທີ່ສຳຄັນຂອງຊຽງໄຮ້ ໂດຍເລີ່ມຕົ້ນທີ່ເມືອງເກົ່າ ເຂດຢີ້ຢວນ ເປັນສະຖານທີ່ ເປັນເມືອງເກົ່າແກ່ທີ່ມີອາຍຸ 500 ກວ່າປີ ສະຖານທີ່ນີ້ຈະປະກອບມີອາຄານທີ່ເປັນເອກະລັກໃນແບບຂອງຈີນທີ່ມີຄວາມສວຍງາມ, ຢູ່ສອງຝາກທາງຈະມີຮ້ານຂາຍເຄື່ອງບໍ່ວ່າຈະເປັນອາຫານການກິນ, ເຂົ້າໜົມ, ເຄື່ອງໃຊ້ສອຍ ແລະ ຂອງທີ່ລະນຶກຕ່າງໆ, ເຊິ່ງໃນຊ່ວງວັນຈັນ-ວັນສຸກ ຈະມີຄົນເຂົ້າມາທ່ຽວຫຼາຍເຖິງ 8 ແສນຄົນ ແລະ ວັນເສົາ-ອາທິດມີປະມານ 1 ລ້ານຄົນ, ມາຕໍ່ທີ່ໄຫວ້ທານ ເປັນສະຖານທີ່ທາງຍ່າງລຽບແຄມແມ່ນ້ຳຫວງຟູ, ມີຄວາມຍາວປະມານ 1,5 ກິໂລແມັດ ອ້ອມຮອບຍັງມີຕຶກສະຕາຍບູຮານ ແລະ ຕຶກສະໄໝໃໝ່ທີ່ສູງ ແລະ ສວຍງາມ, ສະຖານທີ່ດັ່ງກ່າວຍັງເປັນສະຖານທີ່ຖ່າຍທໍາໜັງທີ່ໂດ່ງດັງໄປທົ່ວໂລກ ກໍ່ຄືໜັງເຈົ້າພໍ່ຊຽງໄຮ້,

ໃນຍາມຄໍ່າຄືນຈະມີເຮືອບໍລິການຂີ່ຊົມບັນຍາກາດທັງສອງຝາກຝັ່ງ, ມີການເປີດໄຟແສງສະທ້ອນກັບແມ່ນໍ້າຫວງຟູທີ່ສວຍງາມ ແລະ ໜ້າປະທັບໃຈຫຼາຍ, ມາຕໍ່ທີ່ຕຶກ ທາວເວີ (Tower) ເປັນຕຶກທີ່ສູງອັບດັບທີ 2 ຂອງໂລກ ຮອງຈາກຕຶກ ເບີສ ຄາລີຟາ ປະເທດດູໄບ, ຕຶກທາວເວີມີຄວາມສູງເຖິງ 632 ແມັດ ສາມາດຂຶ້ນດ້ວຍລິບທີ່ມີຄວາມໄວເຖິງ 18 ແມັດຕໍ່ວິນາທີ ເພື່ອຊົມວິວຂອງຕົວເມືອງຊຽງໄຮ້ ແລະ ແມ່ນ້ຳຫວງຟູທີ່ຍາວສຸດສາຍຕາ ເຊິ່ງໃນມື້ໜຶ່ງມີນັກທ່ອງທ່ຽວຂຶ້ນຕຶກທາວເວີ ເພື່ອຊົມວິວຕົວເມືອງຊຽງໄຮ້ປະມານ 5 ພັນຄົນ, ຫໍພິພິທະພັນຊຽງໄຮ້ ເປັນບ່ອນວາງສະແດງວັດຖຸບູຮານທີ່ເກົ່າແກ່ ໂດຍຈະມີອາຍຸ 100 ປີຂຶ້ນໄປ ມີທັງຮູບປັ້ນ, ຮູບແຕ້ມ, ເຄື່ອງປັ້ນດິນເຜົາ ແລະ ອື່ນໆ ທີ່ສ່ອງແສງເຖິງປະຫວັດສາດ ແລະ ວັດທະນະທຳຂອງຈີນໃນສະໄໝກ່ອນ, ດິດນີແລນ ເປັນສວນສະນຸກທີ່ຕິດອັບດັບ 6 ຂອງໂລກ, ເລີ່ມກໍ່ສ້າງໃນປີ 2011 ແລະ ເປີດຢ່າງເປັນທາງການໃນປີ 2016 ໂດຍແບ່ງພື້ນທີ່ອອກເປັນ 6 ໂຊນຄື:

ໂຊນຂາຍສິນຄ້າ, ສວຍງາມໃນຈິນຕະນາການ, ດິນແດນແຫ່ງເທບນິຍາຍ, ຖໍ້າແຫ່ງຂຸມຊັບ, ລຸຍເກາະຜະຈົນໄພ ແລະ ດິນແດນແຫ່ງອະນາຄົດ ເປັນສວນສະໜຸກທີ່ລວບລວມເອົາເຫດການຕ່າງໆມາສ້າງຈຳລອງໃຫ້ມີຄວາມສົມຈິງ, ມີພື້ນທີ່ກວ້າງຂວາງ, ສວຍງາມ ແລະ ໜ້າຕື່ນຕາຕື່ນໃຈ ເຊິ່ງມີນັກທ່ອງທ່ຽວເຂົ້າມາທ່ຽວປະມານ 15 ພັນຄົນຕໍ່ມື້, ຊິນທຽນຕີ້ ອີກໜຶ່ງສະຖານທີ່ສວຍງາມ ແລະ ມີສື່ສຽງ ເໝາະແກ່ການມາຖ່າຍຮູບ ສະຖານທີ່ນີ້ປະກອບມີຫ້າງຫຼູຫຼາ ແລະ ຮ້ານອາຫານທີ່ຕົກແຕ່ງສວຍງາມ, ຖະໜົນໜານຈິງ ເຊິ່ງເປັນທະໜົນທີ່ມີສື່ສຽງອີກເສັ້ນໜຶ່ງຂອງຊຽງໄຮ້ ຈະປະກອບມີຕຶກສະຕາຍຢູໂຣບທີ່ສວຍງາມ, ຕັ້ງຢູ່ໃຈກາງເມືອງມີຄວາມຍາວເຖິງ 5 ກິໂລແມັດ ມີຜູ້ຄົນຈຳນວນຫຼາຍທີ່ເຂົ້າມາຍ່າງຊົມຄວາມສວຍງາມ, ຊື້ເຄື່ອງ ແລະ ມີອາຫານອີກຫຼາກຫຼາຍໃຫ້ຊວນຊິມລົດຊາດ, #ຖຽນຈີຟາງ ເປັນແຫຼ່ງຈຳໜ່າຍສິນຄ້າ ແລະ ອາຫານການກິນ, ມີຫຼາຍຊອກຊອຍທີ່ໃຫ້ຍ່າງໄປ-ມາ, ຮູບແບບຂອງອາຄານທີ່ມີຄວາມສວຍງາມ ແລະ ມີລັກຊະນະສະເພາະຂອງຊຽງໄຮ້, ຈູເຈີຍຈ໊ຽວ ເມືອງບູນຮານ ຕັ້ງຢູ່ທິດຕາເວັນຕົກສ່ຽງເໜືອຂອງຊຽງໄຮ້ ເດີນທາງຈາກຊຽງໄຮ້ດ້ວຍລົດເມ ໃຊ້ເວລາປະມານ 1 ຊົ່ວໂມງເຄິ່ງ.

ຈູເຈີຍຈ໊ຽວເປັນສະຖານທີ່ທີ່ເກົ່າແກ່ມີອາຍຸກວ່າ 1.700 ປີ, ມີຄອງນ້ຳໄຫຼຜ່ານ ສາມາດຂີ່ເຮືອຊົມບັນຍາກາດອ້ອມຮອບ ເປັນອີກໜຶ່ງສະຖານທີ່ຍັງຮັກສາຄວາມເປັນເອກະລັກແບບດັ້ງເດີມ ບໍ່ວ່າຈະເປັນອາຄານ ແລະ ຂົວຫີນເກົ່າ, ທັງສອງຝັ່ງຈະມີທັງຮ້ານອາຫານແບບທ້ອງຖິ່ນ, ເຂົ້າໜົມຈີນບູຮານ, ເມນູອາຫານຫຼັກແມ່ນເຂົ້າຕົ້ມ, ຂາໝູ ບັນຍາກາດຮ້ານທີ່ຕົກແຕ່ງສວຍງາມ ແລະ ຮ້ານຄ້າໃຫ້ເລືອກຊື້ຫຼາຍຢ່າງເຊັ່ນ: ກະເປົາ, ເສື້ອຜ້າ, ເຄື່ອນຸ່ງຫົ່ມ, ຂອງທີ່ລະນຶກ ແລະ ອື່ນໆ. ນອກຈາກທີ່ກ່າວມານີ້ ຊຽງໄຮ້ຍັງມີແຫຼ່ງທ່ອງທ່ຽວທີ່ສວຍງາມອີກຫຼາຍແຫ່ງທີ່ຄອຍຖ້າທ່ານໄປສຳພັດດ້ວຍໂຕຂອງທ່ານເອງ ຮັບຮອງໄດ້ວ່າຖ້າໄປສຳຜັດແລ້ວຢາກກັບໄປອີກຄັ້ງແນ່ນອນ. ການເດີນທາງກໍ່ສະດວກສະບາຍ ໂດຍມີສາຍການບິນທີ່ບິນຕົງຈາກສະໜາມບິນສາກົນວັດໄຕ ສປປ ລາວ ຫາ ສະໜາມບິນສາກົນພູດົງ ນະຄອນຊຽງໄຮ້ ເຊິ່ງມີຈຳນວນຖ້ຽວບິນ 3 ຄັ້ງຕໍ່ອາທິດ ແລະ ໃຊ້ເວລາປະມານ 3 ຊົ່ວໂມງເຄິ່ງ.

MediaLaos khammouanenews