ສະຖາບັນການຕ່າງປະເທດ ຂອງກະຊວງການຕ່າງປະເທດ ໃນນາມສູນຄົ້ນຄວ້າແມ່ນໍ້າຂອງສາກົນລາວ ໄດ້ຈັດກອງປະຊຸມເພື່ອຫາລືວຽກງານຮ່ວມກັນ ໃນຕອນເຊົ້າຂອງ ວັນທີ 28 ຕຸລາ 2019 ນີ້, ທີ່ໂຮງແຮມຫຼວງພະບາງວິວ, ນະຄອນຫຼວງພະບາງ, ແຂວງຫຼວງພະບາງ ເປັນຄັ້ງທີ 2 ຂຶ້ນພາຍໃຕ້ຫົວຂໍ້: “ການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ເພື່ອກ້າວໄປສູ່ປະຊາຄົມ ແຫ່ງຄວາມຈະເລີນຮຸ່ງເຮືອງ, ຍືນຍົງ ໂດຍການເປັນປະທານຮ່ວມຂອງ ທ່ານ ວົງສະຫວັນເທບພະຈັນ, ຮອງເຈົ້າແຂວງແຂວງຫຼວງພະບາງ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍຊ່ຽວຊານ,ນັກວິ ຊາການຈາກ 6 ປະເທດເຂົ້າຮ່ວມ.

ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ໄດ້ຍົກໃຫ້ເຫັນຄວາມສຳຄັນຂອງຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ(MLC) ທີ່ມີການພັດທະນາໄວໃນໄລຍະເວລາບໍ່ເທົ່າໃດປີ. ໃນນັ້ນ, ລວມທັງການຮັບຮອງແຜນປະຕິບັດງານ 5ປີ (2018-2022), ການສ້າງຕັ້ງສູນຄົ້ນ ຄວ້າແມ່ນໍ້າຂອງສາກົນ(GCMS) ເຊິ່ງຖືເປັນຄັງປັນຍາຂອງຂອບການຮ່ວມມືດັ່ງກ່າວ ແລະ ການສ້າງແລວເສດຖະກິດແມ່ນໍ້າຂອງ-ແມ່ນໍ້າລ້ານຊ້າງ(MLCEDB) ພ້ອມນີ້ທ່ານໄດ້ຮຽກຮ້ອງໃຫ້ບັນດາປະເທດສະມາຊິກຂອງສູນ ແລະ ນັກຄົ້ນຄວ້າທີ່ເຂົ້້າຮ່ວມກອງປະຊຸມສໍາມະນາ ປຶກສາຫາລື ແລະ ແລກປ່ຽນຂໍ້ມູນຈາກການຄົ້ນຄວ້າ ເພື່ອຊອກຫາວິທີທາງໃນການພັດທະນາໃຫ້ມີຄວາມຍືນຍົງ ແລະ ກອງປະຊຸມສຳມະນາຄັ້ງນີ້ ໄດ້ຍົກ 2 ຫົວຂໍ້ທີ່ສໍາຄັນມາປຶກສາຫາລືຮ່ວມກັນຄື: 1) ການປະກອບສ່ວນຂອງຂອບການຮ່ວມມືເແມ່ນໍ້າຂອງ-ແມ່ນໍ້າລ້ານຊ້າງ ເພື່ອບັນລຸເປົ້າໝາຍການພັດທະນາແບບຍືນຍົງ ວິໃສທັດ 2030 ຂອງ ສ ປຊ; 2) ການກຳເນີດຂອງຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ແລະ ກົນໄກການຮ່ວມມືອື່ນໆ ໃນຂົງເຂດ ເພື່ອການເຊື່ອມໂຍງ ແລະ ຄວາມຈະເລີນຮຸ່ງເຮືອງໃນພາກພື້ນ ເຊິ່ງບັນດາຜູ້ເຂົ້າຮ່ວມໄດ້ປຶກສາຫາລື ແລະ ແລກປ່ຽນຄຳຄິດເຫັນຮ່ວມກັນ ເພື່ອເຮັດໃຫ້ການຮ່ວມມືໃນຂອບ MLC ນັບມື້ໄດ້ຮັບການເສີມຂະຫຍາຍ ແລະ ມີລັກສະນະເປີດກວ້າງເທື່ອລະກ້າວ.
ສໍາລັບກອງປະຊຸມພາກພື້ນຄັ້ງທີ 1 ໄດ້ຈັດຂື້ນໃນລະຫວ່າງວັນທີ 22-23 ສິງຫາ 2019 ຜ່ານມາໃນຫົວຂໍ້: “ການສ້າງແລວພັດທະນາເສດຖະກິດແມ່ນ້ຳຂອງ-ແມ່ນ້ຳລ້ານຊ້າງ: ກາລະໂອກາດ ແລະ ສິ່ງທ້າທາຍ ພາຍໃຕ້ໂຄງການຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ທີ່ນະຄອນປາກເຊ, ແຂວງຈໍາປາສັກ. ມີຜູ້ເຂົ້າຮ່ວມຈາກສູນ GCMS ທັງ 6 ປະເທດສະມາຊິກ (ຈີນ, ລາວ, ຫວຽດນາມ, ມຽນມາ, ໄທ ແລະ ກໍາປູເຈຍ), ກອງເລຂາ MLC ລາວ, ນັກຄົ້ນຄວ້າຄັງປັນຍາ (Think-Tank) ຈາກ ສິງກະໂປ, ອິນໂດເນເຊຍ ແລະ ມາເລເຊຍ, ຕາງໜ້າຈາກສະຖາບັນ ທັງພາຍໃນ ແລະ ພາກພື້ນເຊັ່ນ: MRC, UNDP, ສະຖາບັນແມ່ນໍ້າຂອງ (Mekong Institute),ຜູ້ຕາງໜ້າຈາກ ສະຖານທູດຈີນ, ຍີ່ປຸ່ນ, ສ.ເກົາຫຼີ, ພ້ອມດ້ວຍຜູ້ເຂົ້າຮ່ວມຈາກສະຖາບັນຄົ້ນຄວ້າຕ່າງໆຂອງລາວ (ມະຫາວິທະຍາໄລແຫ່ງຊາດ, ສະຖາບັນຄົ້ນຄວ້າເສດຖະກິດແຫ່ງຊາດ) ລວມທັງໝົດ 50 ກວ່າທ່ານ.
ຄຽງຄູ່ກັບກອງປະຊຸມດັ່ງກ່າວ, ໃນວັນທີ 29 ຕຸລາ 2019, ສູນ GCMS ຂອງລາວ ຮ່ວມກັບ ສູນ GCMS ຂອງຈີນ ໄດ້ຈັດກອງປະຊຸມຜູ້ປະສານງານຂອງສູນຄົ້ນຄວ້າແມ່ນໍ້າຂອງສາກົນ ເຊິ່ງແຕ່ລະສູນໄດ້ນຳສະເໜີບົດຄົ້ນຄວ້າຂອງຕົນ ພາຍໃຕ້ຫົວຂໍ້: A Concrete Path towards Creating Lan cang-Mekong Economic Development Belt (LMEDB)ໂດຍອີງໃສ່ບົດຮຽນຂອງແຕ່ລະປະເທດສະມາຊິກ ໃນການຈັດຕັ້ງປະຕິບັດບັນດາໂຄງການພາຍໃຕ້ຂອບການຮ່ວມມື MLC ລວມທັງບັນດາຂໍ້ສະເໜີແນະຕ່າງໆ ເຊິ່ງຈະຖືກຮວບຮວມ ເພື່ອມາສະເໜີຕໍ່ ພາກລັດຖະບານ ໃນຂັ້ນຕໍ່ໄປ. ນອກຈາກນັ້ນ, ກອງປະຊຸມຍັງໄດ້ຮັບຮອງເອົາ MLEDB Vision 2030 ແລະ ປຶກສາຫາລືແຜນການຮ່ວມມືກັນໃນຕໍ່ໜ້າ.
ພາຍຫຼັງສິ້ນສຸດກອງປະຊຸມ, ຄະນະຜູ້ແທນທັງໝົດ ຍັງຈະໄດ້ໄປຢ້ຽມຢາມ ແລະ ທ່ຽວຊົມສະຖານທີ່ທ່ອງທ່ຽວສໍາຄັນທາງປະຫວັດສາດ ແລະ ທໍາມະຊາດຂອງແຂວງຫຼວງພະບາງ ຕື່ມອີກ.

ຂ່າວສານຫລວງພະບາງ PhetsakhoneSimmavong