ໃນຕອນເຊົ້າວັນທີ 1 ພະຈິກ 2019 ນີ້ຢູ່ທີ່ເດີ່ນກິລາຫຼັກ 4 ນະຄອນໄກສອນພົມວິຫານ ແຂວງສະຫວັນນະເຂດ ທາງຄະນະກຳມະການກວດກາ ແລະ ຄອບຄຸມຢາເສບຕິດແຂວງໄດ້ຈັດພິທີທຳລາຍຢາເສບຕິດເນື່ອງໃນວັນແຫ່ງຊາດຕ້ານຢາເສບຕິດ ຄົບຮອບ 18 ປີ (12ຕຸລາ2001-12ຕຸລາ 2019) ໂດຍການໃຫ້ກຽດເຂົ້າຮ່ວມ ຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ, ພ້ອມມີບັນດາພະແນກການອ້ອມຂ້າງແຂວງຕະຫຼອດຮອດກຳລັງ ປກສ ແລະ ປກຊ ເຂົ້າຮ່ວມ.

ໃນພິທີ ທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ, ປະທານກຳມະການກວດກາ ແລະ ຄວບຄຸມຢາເສບຕິດຂັ້ນແຂວງກໍ່ໄດ້ກ່າວລາຍງານວ່າ: ໃນໄລຍະຜ່ານມາກໍ່ຄືປະຈຸບັນ ພັກ ແລະ ລັດຖະບານເຮົາໄດ້ຖືເອົາການຄວບຄຸມ, ສະກັດກັ້ນ, ຕ້ານ ແລະ ແກ້ໄຂໄຂບັນຫາຢາເສບຕິດ ເປັນໜ້າທີ່ສຳຄັນ ແລະ ໄດ້ຊີ້ນຳໆພາຈັດຕັ້ງປະຕິບັດວຽກງານຢ່າງຈົດຈໍ່ ແລະ ຈິງຈັງຕະຫຼອດມາຕໍ່ບັນຫາດັ່ງກ່າວໄດ້ເອົາໃຈໃສ່ສຶກສາ ອົບຮົມທຸກຊັ້ນຄົນໃນສັງຄົມເປັນຕົ້ນແມ່ນຊາວໜຸ່ມ – ເຍົາວະຊົນຜູ້ທີ່ເປັນໜໍ່ແໜງປະເທດຊາດໄດ້ຮັບຮູ້ ແລະ ເຂົ້າໃຈຢ່າງຖືກຕ້ອງກ່ຽວກັບພິດໄພ ແລະ ຜົນຮ້ານຂອງຢາເສບຕິດ, ໂດຍຮູບການໂຄສະນາເຜີຍແຜ່ ແນວທາງນະໂຍບາຍ, ກົດໝາຍ, ລະບຽບການ ແລະ ມະຕິຄຳສັ່ງຂອງພັກ-ລັດກ່ຽວກັບຢາເສບຕິດຢ່າງຕໍ່ເນື່ອງ, ໃນນັ້ນໄດ້ດຳເນີນການບຳບັດປິ່ນປົວ ແລະ ຟື້ນຟູສຸຂະພາບຜູ້ຕິດຢາເສບຕິດເພື່ອໃຫ້ເຂົາເຈົ້າກັບຄືນເປັນຄົນດີຂອງສັງຄົມ, ໃນໄລຍະ 2 ປີຜ່ານມາສູນບໍາບັດປິ່ນປົວ ແລະ ຟື້ນຟູສຸຂະພາບຕິດຢາເສບຕິດ ຫຼັກ 26 ແຂວງສະຫວັນນະຂດ ມີຈຳນວນ 596 ຄົນ , ຍິງ20ຄົນ, ປິ່ນປົວຫາຍດີກັບຄືນສູ່ຄອບຄົວຈຳນວນ567ຄົນ, ຍິງ20ຄົນ, ນອກນັ້ນເຈົ້າໜ້າທີ່ຕຳຫຼວດໄດ້ເອົາໃຈໃສ່ໄດ້ມ້າງຄະດີ ຈັບກຸມຜູ້ກະທຳຜິດ ແລະ ກັກຕົວບັນດາຫົວໂປ່ໂຕການຄ້າຂາຍຢາເສບຕິດລາຍໃຫຍ່ຈຳນວນໜຶ່ງເຊິ່ງຄະດີ ທັງໝົດມີຈຳນວນ 809ລາຍ, ຜູ້ຖືກຫາ1.234ຄົນ, ຍິງ 114 ຄົນ ຊາວຕ່າງປະເທດ 11 ຄົນ, ຍິງ1ຄົນ,ຢຶດຂອງກາງຄະດີ ປະເພດຢາບ້າໄດ້ 2.123.769ເມັດ,ຢາໄອສ໌ 07 ຖົງໃຫຍ່ນໍ້າໜັກ 7 ກິໂລກຼາມ ກັບ 7 ຖົງນ້ອຍ ແລະ 4ຫຼອດນ້ອຍ, ຢາອີຈໍານວນ 2 ເມັດ,ຢາເຄ1ຖົງນ້ອຍ, ກັນຊາແຫຼ້ງຈໍານວນ 2 ຖົງກັບ 2 ກຼາມ ,ເງິນ103ລ້ານກວ່າກີບ,ເງິນບາດ 7ແສນກວ່າບາດ(ສະກຸນເງິນໄທ) ແລະ ຢຶດສັບສິນປະເພດຕ່າງໆເປັນຈຳນວນຫຼວງຫຼາຍ

ຂອງການຄະດີເປັນຢາເສບຕິດປະເພດຕ່າງໆທີ່ຈະນຳ ມາທຳລາຍມີປະກອບມີ ປະເພດຢາບ້າໄດ້ຈຳນວນ 374.525 ເມັດກັບປຽກນໍ້າ, ນໍ້າໜັກ 42.373 ກຼາມ,ຢາບ້າປອມ7.995ເມັດ, ນໍ້າໜັກ 547.0916 ກຼາມ,ຢາໄອສ໌ 1 ຖົງນ້ອຍ ກັບ 4 ຫຼອດ, ນໍ້າໜັກ52.2185 ກຼາມ ກັນຊາແຫ້ງຈໍານວນ 1 ຖົງ , ນໍ້າໜັກ 2 ກຼາມກັບ 13 ແທ່ງກັບ 50 ຖົງນ້ອຍ ກັບ ອີກ 2 ຖົງ ລວມນໍ້າໜັກ14.020ກຼາມ ແລະ ແປ້ງຝຸ່ນສີບົວ 1 ຖົງນ້ອຍ, ນໍ້າໜັກ 2 ກຼາມ.
ຈາກນັ້ນທາງຄະນະນຳຂອງແຂວງກໍ່ໄດ້ເດີນທາງໄປຢ້ຽມຢາມຜູ້ຕິດຢາເສບຕິດທີ່ສູນບຳບັດຜູ້ທີ່ຕິດຢາເສບຕິດຫຼັກ 26 ຕື່ມອີກ.

savannakhet medialaos