ວັນທີ 31 ຕຸລາ 2019 ນີ້, ທະນາຄານພັດທະນາລາວ ສາຂາ ສາລະວັນ ຈັດພີທີປະກາດນາມມະຍົດ ເປັນກຳມະບານຮາກຖານ 5 ເປັນເຈົ້າ, ໂດຍການເປັນປະທານຂອງ ທ່ານ ສົມພິດ ນາມສາລີ ປະທານກຳມະບານຮາກຖານທະນາຄານພັດທະນາລາວ, ເປັນກຽດເຂົ້າຮ່ວມຂອງ ທ່ານ ຈິດຕະກອນ ສາຍສະໝຸດ ຮອງປະທານຄະນະບໍລິຫານງານສະຫະພັນກຳມະບານແຂວງ, ມີ ທ່ານ ຄຳລຽນ ສິມມະວົງ ວ່າການຫົວໜ້າທະນາຄານພັດທະນາລາວ ສາຂາສາລະວັນ ພ້ອມດ້ວຍແຂກຖືກເຊີນ ແລະ ສະມາຊິກກໍາມະບານພາຍໃນສາຂາເຂົ້າຮ່ວມ.

ທ່ານ ສົມຫວັງ ມາລີຈັນສີ ໄດ້ຜ່ານບົດສະຫຼຸບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ໃນໄລຍະ 3 ປີຜ່ານມາ ໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ແກ່ຖັນແຖວພະນັກງານ, ສະມາຊິກກໍາມະບານໃຫ້ມີແນວຄິດອຸ່ນອ່ຽງ-ທຸ່ນທ່ຽງ, ຮັກສາໄດ້ຄຸນທາດການເມືອງ ແລະ ຄຸນສົມບັດສິນທໍາປະຕິວັດຢ່າງໜັກແໜ້ນ, ໂດຍສະເພາະ ໃນການປົກປ້ອງສິດ ແລະ ຜົນປະໂຫຍດຂອງພະນັກງານ, ສະມາຊິກຳມະບານ, ກຳມະກອນ ແລະຊາວຜູ້ອອກແຮງງານ ແລະ ເຄື່ອນໄຫວເຂົ້າຮ່ວມຂະບວນການຕ່າງໆຂອງພະແນກກໍ່ຄືຂອງແຂວງ, ໄດ້ປະຕິບັດຕາມມະຕິກອງປະຊຸມໃຫຍ່ຄັ້ງທີ VII ຂອງສູນກາງສະຫະພັນກຳມະບານລາວ, ມະຕິກອງປະຊຸມໃຫຍ່ຄັ້ງທີ VI ຂອງສະຫະພັນກໍາມະບານແຂວງ ແລະມະຕິກອງປະຊຸມຄັ້ງທີ V ຂອງກໍາມະບານຮາກຖານທະນາຄານພັດທະນາລາວ ສາຂາສາລະວັນ.

ໄດ້ເອົາໃຈໃສ່ນໍາພາສຶກສາອົບຮົມການເມືອງ-ແນວຄິດໃຫ້ແກ່ສະມາຊິກໃນການຈັດຕັ້ງເຊື່ອມຊຶມບັນດາເອກະສານສຳຄັນຕ່າງໆຂອງພັກຂອງຊາດ, ປັບປຸງແບບແຜນການນຳພາ ແລະ ຂະຫຍາຍການຈັດຕັ້ງກຳມະບານໃຫ້ມີຄວາມໜັກແໜ້ນເຂັ້ມແຂງທາງດ້ານປະລິມານ ແລະຄຸນນະພາບ, ໄດ້ສ້າງສາຍພົວພັນກັບບັນດາປະເທດໃກ້ຄຽງ ເພື່ອແລກປ່ຽນບົດຮຽນໃນການປະຕິບັດໜ້າທີ່ວຽກງານວິຊາສະເພາະກໍ່ຄືວຽກງານກຳມະບານໃຫ້ເຂັ້ມແຂງຂຶ້ນເທື່ອລະກ້າວ.

ພາບ-ຂ່າວ:ທິລານີ
medialaos salavan