ວັນທີ 04 ພະຈິກ 2019 ພະແນກ ຖວທ ແຂວງຄຳມ່ວນ ໄດ້ປະກາດປັບປຸງລະບົບການຈັດຕັ້ງ ແລະ ສັບປ່ຽນບ່ອນປະຈຳການຂອງພະນັກງານ-ລັດຖະກອນຈຳນວນໜຶ່ງ ໂດຍເປັນກຽດເຂົ້າຮ່ວມຂອງທ່ານ ຂັນຕີ ໂພທິນ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງຄຳມ່ວນ, ມີບັນດາທ່ານໃນຄະນະພັກຄະນະ ພະແນກ, ຂະ ແໜງການ, ກອງວິຊາການອ້ອມຂ້າງ ຕະຫຼອດພະນັກງານ-ລັດຖະກອນໃນຂົງເຂດດັ່ງກ່າວເຂົ້າຮ່ວມ.

ທ່ານ ພົງສະທອນ ແສງສຸວັນນຸຮັກ ຫົວໜ້າຂະແໜງຈັດຕັ້ງ-ພະນັກງານ ພະແນກ ຖວທ ໄດ້ຜ່ານຂໍ້ຕົກລົງຂອງ ເຈົ້າແຂວງໆຄຳມ່ວນ ວ່າດ້ວຍການແຕ່ງຕັ້ງຫົວໜ້າ, ຮອງຫົວໜ້າຂະແໜງການ, ກອງວິຊາການຂອງພະແນກ ຖວທ ແຂວງ ແລະ ຂໍ້ຕົກລົງຂອງຫົວໜ້າພະແນກ ຖວທ ແຂວງ ວ່າດ້ວຍການສັບປ່ຽນບ່ອນປະຈຳການຂອງພະນັກງານ-ລັດຖະກອນ ເຊິ່ງປະກອບມີ: ແຕ່ງຕັ້ງທ່ານ ສີປັນຍາ ກອງມະນີ ຮອງຫົວໜ້າຂະແໜງວັດທະນະທຳ ຂຶ້ນເປັນຫົວໜ້າ ຂະແໜງວັດທະນະທຳ, ທ່ານ ສົມກຽດ ພິເນດ ຮອງຫົວໜ້າຂະແໜງທ່ອງທ່ຽວ ຂຶ້ນເປັນຫົວໜ້າຂະແໜງທ່ອງທ່ຽວ, ທ່ານ ລຸຍ ຄຳວົງສາ ວິຊາການຂະແໜງບໍລິຫານ ຂຶ້ນເປັນຮອງຫົວໜ້າຂະແໜງບໍລິຫານ, ທ່ານ ນາງ ໝອນຕາ ກາທິລາດ ວິຊາການຫໍສະໝຸດ, ຫໍພິພິຕະພັນ ແລະ ສູນວັດທະນະທຳເດັກ ຂຶ້ນເປັນຮອງຫົວໜ້າຫໍສະໝຸດ, ຫໍພິພິຕະພັນ ແລະ ສູນວັດທະນະທຳເດັກ, ທ່ານ ແກ່ນຕາ ໄຊຍະຫານ ວິຊາການຂະແໜງທ່ອງທ່ຽວ ຂຶ້ນເປັນຮອງຫົວໜ້າສູນຝຶກອົບຮົມ ສື່ມວນຊົນ, ວັດທະນະທຳ ແລະ ທ່ອງທ່ຽວ, ທ່ານ ນາງ ໂພໄຊ ສີມຸກດາ ຫົວໜ້າຂະແໜງທ່ອງທ່ຽວ ໄປເປັນຫົວໜ້າສູນ ຝຶກອົບຮົມສື່ມວນຊົນ, ວັດທະນະທຳ ແລະ ທ່ອງທ່ຽວ, ທ່ານ ບຸນສະຖິດ ອິນທິພາບ ຮອງຫົວໜ້າຂະແໜງບໍລິຫານ ເປັນຮອງຫົວໜ້າໜ້າກອງວິຊາການສະຖານີວິທະຍຸ, ທ່ານ ນາງ ແຫຼມທອງ ອໍ່າພິລາວົງ ຮອງຫົວໜ້າຂະແໜງຈັດຕັ້ງ-ພະນັກງານ ເປັນຮອງກອງວິຊາການຫໍພິພິຕະພັນ, ຫໍສະໝຸດ ແລະ ສູນວັດທະນະທຳເດັກ, ທ່ານ ນາງ ວິໄລພອນ ເທບພະລັດວົງສາ ຮອງຂະແໜງວັດທະນະທຳ ເປັນຮອງຂະແໜງຈັດຕັ້ງ-ພະນັກງານ ແລະ ສັບປ່ຽນບ່ອນປະຈຳການ ຂອງພະນັກງານລັດຖະກອນພາຍໃນພະແນກອີກຈຳນວນໜຶ່ງ. ທັງນີ້ກໍ່ເພື່ອຕອບສະໜອງຄວາມຮຽກຮ້ອງຕ້ອງການ ທາງດ້ານໜ້າທີ່ວຽກງານໃນໄລຍະໃໝ່ ແລະ ເພື່ອປັບປຸງດ້ານຄວາມຮູ້ຄວາມສາມາດໃຫ້ສອດຄ່ອງກັບໜ້າທີ່ວຽກງານ ຕົວຈິງ ທັງເປັນການຕອບສະໜອງຍຸດທະສາດໃນການພັດທະນາກົມກອງໃຫ້ມີການຂະຫຍາຍຕົວດີຂຶ້ນເລື້ອຍໆ. ໂອກາດດັ່ງກ່າວ ທ່ານ ແສງມະນີ ສີລາເພັດ ຫົວໜ້າຂະແໜງບໍລິຫານ ຍັງໄດ້ຜ່ານກ່ຽວກັບດຳລັດ 184/ລບ ວ່າດ້ວຍ ຈັນຍາບັນຂອງພະນັກງານ-ລັດຖະກອນ ເຊິ່ງດຳລັດດັ່ງກ່າວແມ່ນໄດ້ກຳນົດຫຼັກການ, ລະບຽບການ ແລະ ມາດຕະການ ກ່ຽວກັບຈັນຍາບັນຂອງພະນັກງານ-ລັດຖະກອນ ເພື່ອເປັນບ່ອນອີງ ແລະ ແນໃສ່ຄຸ້ມຄອງ, ສຶກສາອົບຮົມ ໃຫ້ພະນັກ ງານ-ລັດຖະກອນໃຫ້ມີຄຸນທາດການເມືອງ, ຄຸນສົມບັດສິນທຳປະຕິວັດໜັກແໜ້ນ, ມີຄວາມຮັບ ຜິດຊອບສູງ ຕໍ່ໜ້າທີ່ວຽກງານ ຂອງຕົນ, ມີສະຕິຕື່ນຕົວ ເຄົາລົບ, ປະຕິບັດກົດໝາຍ ແລະ ລະບຽບການຢ່າງເຂັ້ມງວດ ແລະ ມີປະສິດທິພາບສູງ.

Medialaos khammouane