ຊຸດອົບຮົມຄູຝຶກວຽກງານ ຕ້ານການຄ້າມະນຸດທົ່ວແຂວງໄຊຍະບູລີ ໄດ້ຈັດຂຶ້ນໃນວັນທີ 4 ພະຈິກ 2019ນີ້ ຢູ່ທີ່ຫ້ອງປະຊຸມພະແນກຍຸຕິທໍາແຂວງໄຊຍະບູລີ, ໃຫ້ກຽດເຂົ້າຮ່ວມມີທ່ານ ຄໍາສິງ ສໍລະສຸກ ກໍາມະການປະຈໍາພັກແຂວງ ປະທານແນວລາວສ້າງຊາດແຂວງ, ທ່ານ ປະລິນຍາເອກ ຈອມຄໍາ ບຸບຜາລິວັນ ຫົວໜ້າກົມສົ່ງເສີມລະບົບຍຸຕິທໍາກະຊວງຍຸຕິທໍາ, ມີວິທະຍາກອນຈາກສູນກາງ, ມີຫົວໜ້າ, ຮອງຫົວໜ້າຫ້ອງການຍຸຕິທໍາ 11 ເມືອງ ພ້ອມດ້ວຍພະນັກງານຫຼັກແຫຼ່ງພະແນກຍຸຕິທໍາແຂວງເຂົ້າຮ່ວມ.

ທ່ານ ຄໍາສິງ ສໍລະສຸກ ປະທານແນວລາວສ້າງຊາດ ໄດ້ກ່າວວ່າ: ບັນຫາການຄ້າມະນຸດເກີດຂຶ້ນບໍ່ສະເພາະຢູ່ປະເທດໃດປະເທດໜຶ່ງເທົ່ານັ້ນ ແຕ່ໄດ້ແຜ່ລາມໄປທົ່ວໂລກ; ປະເພດການຄ້າມະນຸດອັນພົ້ນເດັ່ນ ແມ່ນຂູດຮີດທາງເພດ ແລະ ຂູດຮີດແຮງງານດ້ວຍຫຼາຍຮູບການ ເຊິ່ງສາເຫດຕົ້ນຕໍແມ່ນມາຈາກຊີວິດການເປັນຢູ່ຂອງປະຊາຊົນບັນດາເຜົ່າຈໍານວນໜຶ່ງຍັງທຸກຍາກ, ການພັດທະນາລະຫວ່າງຕົວເມືອງ ແລະ ຊົນນະບົດມີຄວາມແຕກໂຕນກັນ, ລະບົບການສຶກສາຂອງປະຊາຊົນຍັງມີຈໍາກັດສີມືແຮງງານບໍ່ທັນສົມຄູ່ກັບຄວາມຕ້ອງການຂອງຕະຫຼາດແຮງງານ, ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍໃນຄອບຄົວຍັງເກີດຂຶ້ນຫຼາຍ ເຊິ່ງເປັນແຮງຊຸກດັນເຮັດໃຫ້ໄວໜຸ່ມຍິງ-ຊາຍມີການເຄື່ອນຍ້າຍແຮງງານ ຊອກວຽກເຮັດງານທໍາຢູ່ຕົວເມືອງໃຫຍ່ທັງພາຍໃນ ແລະ ຕ່າງປະເທດ, ໂດຍຫວັງວ່າຈະໄດ້ຮັບຄ່າຕອບແທນສູງເພື່ອແກ້ໄຂຊີວິດການເປັນຢູ່ພາຍໃນຄອບຄົວໃຫ້ດີຂຶ້ນ.

ປັດໃຈດັ່ງກ່າວຈຶ່ງພາໃຫ້ເກີດມີການຕວົະຍວົະຫຼອກລວງໄປເຮັດວຽກຢູ່ຕ່າງປະເທດ ເປັນຕົ້ນປະເທດໄທ, ຈີນ ແລ້ວຖືກກົດຂີ່ຂູດຮີດແຮງງານ ຢູ່ຟາມລ້ຽງສັດ, ສວນສາລີ, ຫາປາຢູ່ທະເລ ບາງກໍລະນີກໍ່ຍັງບັງຄັບໃຫ້ຂາຍປະເວນີຕາມຮ້ານອາຫານ, ສະຖານທີ່ບັນເທິງອື່ນໆ. ສະນັ້ນຍາມໃດພັກ-ລັດຖະບານເຮົາໄດ້ໃຫ້ຄວາມສໍາຄັນ ວາງແນວທາງນະໂຍບາຍກົດໝາຍ ແລະ ລະບຽບການຈໍານວນໜຶ່ງ ເພື່ອປົກປ້ອງສະກັດກັ້ນ ແລະ ຊ່ວຍເຫຼືອຜູ້ຖືກເຄາະຮ້າຍ ຈາກການຄ້າມະນຸດ ແນໃສ່ປົກປ້ອງສິດຜົນປະໂຫຍດ, ຊີວິດ, ສຸຂະພາບ, ກຽດສັກສີ, ເສລີພາບຂອງພົນລະເມືອງ ແລະ ຮີດຄອງປະເພນີອັນດີງາມ ຂອງຊາດເຮັດໃຫ້ສັງຄົມມີຄວາມສະຫງົບ ແລະ ມີຄວາມຍຸຕິທໍາໃນສັງຄົມ. ຊຸດອົບຮົມໃນຄັ້ງນີ້ບັນດານັກສໍາມະນາກອນຈະໄດ້ຮຽນຮູ້ສະພາບການຂອງການຄ້າມະນຸດໂດຍສັງເຂບ, ເຜີຍແຜ່ບັນດາກົດໝາຍ ແລະ ລະບຽບການຕ່າງໆຂອງ ສປປ ລາວກ່ຽວກັບການຕ້ານການຄ້າມະນຸດ, ທັກສະການໂຄສະນາເຜີຍແຜ່ສຶກສາອົບຮົມກົດໝາຍ, ການເຂົ້າເຖິງກົດໝາຍໂດຍຜ່ານສື່ເອເລັກໂຕຼນິກ, ການເອົາເດັກມາເປັນລູກລ້ຽງແອບແຝງ, ການແຕ່ງດອງແອບແຝງ, ຄວາມຮູ້ພື້ນຖານກ່ຽວກັບການຄ້າມະນຸດ, ການລະບຸຕົວຜູ້ຖືກເຄາະຮ້າຍຈາກການຄ້າມະນຸດ, ການຊ່ວຍເຫຼືອຜູ້ຖືກເຄາະຮ້າຍຈາກການຄ້າມະນຸດ ແລະ ແນະນໍາວຽກງານຕ້ານການຄ້າມະນຸດສະເພາະຂະແໜງຍຸຕິທໍາໃນຕໍ່ໜ້າ. ຊຸດອົບຮົມແມ່ນຈະໄດ້ໃຊ້ເວລາ 3 ວັນຈຶ່ງສໍາເລັດ.

ຂ່າວ: ບຸນທີ.
Medialaos xayaboury