ກອງປະຊຸມຄົບຄະນະບໍລິຫານງານພັກ ແຂວງຄຳມ່ວນ ຄັ້ງທີ 15 ສະໄໝທີ IX ໄຂຂຶ້ນໃນວັນທີ 11 ພະຈິກ 2019 ພາຍໃຕ້ການເປັນປະທານຂອງສະຫາຍ ໂອໄດ ສຸດາພອນ ກໍາມະການສູນກາງພັກ, ເລຂາພັກແຂວງ ເຈົ້າແຂວງໆຄຳມ່ວນ, ມີບັນດາສະຫາຍໃນຄະນະປະຈຳ, ກຳມະການພັກແຂວງ, ເລຂາຄະນະບໍລິຫານງານພັກເມືອງ, ຄະນະພັກຮາກຖານ ແລະ ອົງການຈັດຕັ້ງອ້ອມຂ້າງແຂວງເຂົ້າຮ່ວມ.

ສະຫາຍ ໂອໄດ ສຸດາພອນ ໄດ້ກ່າວໄຂກອງປະຊຸມຢ່າງເປັນທາງການ ເຊິ່ງວາລະກອງປະຊຸມແມ່ນຈະໄດ້ດຳເນີນໄປເປັນເວລາ 05 ວັນ (11-15 ພະຈິກ 2019) ໂດຍຈະໄດ້ຮັບຟັງການລາຍງານ ສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 14 ສະໄໝທີ IX ຜ່ານມາ ໂດຍສະເພາະວຽກງານປ້ອງກັນຊາດ-ປ້ອງກັນຄວາມສະຫງົບ ທີ່ລົງເລິກເຖິງການແກ້ໄຂປະກົດການຫຍໍ້ທໍ້ໃນສັັງຄົມ ເປັນຕົ້ນແມ່ນບັນຫາຢາເສບຕິດ, ອາຊະຍາກຳ, ການປະຕິບັດລະບຽບການລົງທຶນຂອງລັດ ແລະ ເອກະຊົນ ໃຫ້ມີຄວາມໂປ່ງໃສ, ຄ່ອງຕົວ ແລະ ມີປະສິດທິພາບ, ຊຸກຍູ້ສົ່ງເສີມວິສາຫະກິດຂະໜາດນ້ອຍ ແລະ ຂະໜາດກາງ, ຄຸ້ມຄອງລາຍຮັບ-ລາຍຈ່າຍງົບປະມານຂອງລັດ, ປັບປຸງພາລະບົດບາດການຈັດຕັ້ງເຄື່ອນໄຫວຂອງບັນດາຂະແໜງການ ເພື່ອອຳນວຍຄວາມສະດວກໃຫ້ຜູ້ປະກອບການ ແລະ ປະຊາຊົນໄດ້ເຂົ້າເຖິງການບໍລິການທີ່ວ່ອງໄວ, ຕິດຕາມຊຸກຍູ້ການກະກຽມກອງປະຊຸມໃຫຍ່ 3 ຂັ້ນໃນທົ່ວແຂວງ ໂດຍສຸມໃສ່ຊຸກຍູ້ວຽກງານສ້າງຂະບວນການກະກຽມເນື້ອໃນ ແລະ ໂຄງປະກອບບຸກຄະລາກອນ.

ພ້ອມທັງຜ່ານຮ່າງບົດສະຫຼຸບ-ລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ການຈັດເກັບລາຍຮັບ ແລະ ລາຍຈ່າຍງົບປະມານຂອງແຂວງໄລຍະ 9 ເດືອນ ແລະ ແຜນວຽກຈຸດສຸມ 3 ເດືອນທ້າຍປີ 2019, ບັນດາພະແນກການລາຍງານ ແລະ ປະກອບຄໍາເຫັນ ຕີລາຄາການຈັດຕັ້ງປະຕິບັດວຽກງານໃນຂົງເຂດຄວາມຮັບຜິດຊອບຂອງຕົນ ໃນໄລຍະ 9 ເດືອນ ແລະ ແຜນການ 3 ເດືອນທ້າຍປີ, ລາຍງານສະພາບຜົນເສຍຫາຍດ້ານພື້ນຖານໂຄງລ່າງ ຈາກໄພທຳມະຊາດນໍ້າຖ້ວມ ພ້ອມທັງສະເໜີແຜນວຽກຈຸດສຸມໃນການຟື້ນຟູພາຍຫຼັງນໍ້າບົກແຫ້ງ, ບັນດາເມືອງ ລາຍງານກ່ຽວກັບການກະກຽມຄວາມພ້ອມດ້ານຕ່າງໆໃນການຊຸກຍູ້ກະກຽມຈັດຕັ້ງດຳເນີນກອງປະຊຸມໃຫຍ່ຂອງບັນດາອົງຄະນະພັກເມືອງ ແລະ ຜ່ານໂຄງຮ່າງລາຍງານການເມືອງກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງ. ກອງປະຊຸມຍັງຈະໄດ້ດຳເນີນຊີວິດການເມືອງພາຍໃນຄະນະບໍລິຫານງານພັກແຂວງ ປະຈຳປີ 2019 ເພື່ອຕີລາຄາ, ສໍາຫຼວດກວດກາ ການຊີ້ນໍາ-ນຳພາ ແລະ ຄວາມຮັບຜິດຊອບການເມືອງຂອງບັນດາສະຫາຍໃນຄະນະບໍລິຫານງານພັກແຂວງ ສະໄໝທີ IX ເພື່ອແນໃສ່ປັບປຸງ ແລະ ຍົກສູງຄຸນນະພາບ, ສ້າງການຫັນປ່ຽນດ້ານແບບແຜນວິທີນຳພາ ແລະ ວິທີເຮັດວຽກຂອງຄະນະບໍລິຫານງານພັກແຂວງທີ່ຮັບຜິດຊອບໃນແຕ່ລະຂົງເຂດວຽກງານ.

Medialaos khammouane