ວັນທີ 12 ພະຈິກ 2019 ທີ່ສະໂມສອນກອງບັນຊາການທະຫານ ແຂວງຫຼວງພະບາງ ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ຈັດກອງປະຊຸມ ເຜີຍແຜ່ກົດໝາຍວ່າດ້ວຍການກັນ ແລະ ຄວບຄຸມພະຍາດຕິດຕໍ່ ໃຫ້ບັນດາແຂວງພາກເໜືອ ໂດຍມີທ່ານ ສິງຕັນ ໄຊລື່ຊົ່ງ ຄະນະປະຈໍາພັກແຂວງ,ຮອງປະທານສະພາປະຊາຊົນແຂວງຫຼວງພະບາງ,ທ່ານ ດຣ ຣັດຕະນະໄຊ ເພັດສຸວັນ ຄະນະພັກກະຊວງສາທາລະນະສຸກ ຫົວໜ້າກົມຄວບຄຸມພະຍາດຕິດຕໍ່,ມີຫົວໜ້າສໍານັກງານນາຍົກລັດຖະມົນຕີ,ຕາງໜ້າຈາກສະພາແຫ່ງຊາດ ພ້ອມດ້ວຍສະມາຊິກ ແລະ ສະພາປະຊາຊົນ 8 ແຂວງພາກເໜືອເຂົ້າຮ່ວມ.

ຈຸດປະສົງກໍ່ເພື່ອເປັນການເຜີຍແຜ່ປະກາດໃຊ້ກົດໝາຍວ່າດ້ວຍການກັນ ແລະ ຄວບຄຸ້ມພະຍາຕິດຕໍ່, ທັງເປັນການປຸກລະດົມທົ່ວປວງຊົນລາວ ໃນການເຂົ້າຮ່ວມການຈັດຕັ້ງປະຕິບັດກົດໝາຍດັ່ງກ່າວຢ່າງມີປະສິດທິພາບ. ອີກດ້ານໜຶ່ງ ກໍ່ເປັນການຍົກສູງ ຄວາມຮູ້ ຂີດຄວາມສາມາດ ໃຫ້ແກ່ຂະແໜງການສາທາລະນະສຸກ ແລະ ຂະແໜງການທີກ່ຽວຂ້ອງ 8 ແຂວງພາກເໜືອ ໄດ້ຮັບຮູ້ເຂົ້າໃຈ ເນື້ອໃນກົດໝາຍດັ່ງກ່າວຢ່າງເລິກເຊິ່ງ ແລະ ເປັນເອກະພາບກັນໃນຂອບເຂດທົ່ວປະເທດ,ກາຍເປັນບ່ອນອິງ ແລະ ນຳເອົາໄປຈັດຕັ້ງປະຕິບັດໃຫ້ໄດ້ຮັບຜົນດີ.
ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ໄດ້ກ່າວວ່າ:

ກອງປະຊຸມຄັ້ງນີ້, ຜູ້ເຂົ້າຮ່ວມຈະໄດ້ຮັບຟັງການລາຍງານການສ້າງ ແລະ ການອະທິບາຍ ເນື້ອໃນຂອງກົດໝາຍຢ່າງຄົບຖ້ວນ, ລວມທັງການແລກປ່ຽນຄວາມຄິດຄວາມເຫັນ ແລະ ເຮັດໃຫ້ເນື້ອໃນກົດໝາຍມີຄວາມກະຈ່າງແຈ້ງຍິ່ງຂຶ້ນກວ່າເກົ່າ ແລະ ກາຍເປັນພື້ນຖານ ໃນການຈັດຕັ້ງປະຕິບັດຢ່າງຖືກຕ້ອງ ແລະ ໄດ້ຮັບຜົນດີໃນຕໍ່ໜ້າ. ທ່ານກ່າວຕື່ມວ່າ ພະຍາດຕິດຕໍ່ ເປັນພະຍາດໜຶ່ງທີ່ປະເທດລາວໃຫ້ການເຝົ້າລະວັງ, ມີຄວາມສໍາຄັນ ແລະ ຈໍາເປັນຫຼາຍຕໍ່ການກັນພະຍາດຕິດຕໍ່ ເປັນຕົ້ນແມ່ນພະຍາດຊ່າ,ເຊິ່ງເປັນພະຍາດທີ່ລະບາດຫຼາຍຢູ່ບັນດາປະເທດໃນທະວີບອາຊີ ແລະ ກໍາລັງແຜ່ລາມໄປຈາກທະວີບສູ່ທະວີບ,ເຮັດໃຫ້ມີຄົນເສຍຊີວິດເປັນວົງກ້ວາງສົ່ງຜົນກະທົບຕໍ່ເສດຖະກິດ-ສັງຄົມຂອງແຕ່ລະປະເທດ ແລະ ປະເທດລາວແມ່ນເລີ້ມປະເຊີນໜ້າກັບພະຍາດຕິດຕໍ່ ໃນປີ 2013 ເປັນຕົ້ນມາ,ໂດຍແມ່ນພະຍາດໄຂ້ຍຸງລາຍແຜ່ລະບາດໃນຫຼາຍປີຜ່ານມາ ພ້ອມນີ້ກະຊວງສາທາລະນະສຸກ ໂດຍສະເພາະແມ່ນກົມຄວບຄຸມພະຍາດຕິດຕໍ່ ໄດ້ເປັນເຈົ້າການຈັດຕັ້ງປະຕິບັດ ແລະ ກໍໄດ້ອອກນິຕິກໍາ ພ້ອມທັງສະເໜີໃຫ້ສະພາແຫ່ງຊາດພິຈາລະນາຮັບຮອງເອົານິຕິກໍາດັ່ງກ່າວ ແລະ ມີເບີໂທສຸກເສີນ 166.

ໃນປະຈຸບັນກົດໝາຍດັ່ງກ່າວແມ່ນໄດ້ຖືກຮັບຮອງຈາກສະພາແຫ່ງຊາດ ແລະ ປະກາດໃຊ້ຢ່າງເປັນທາງການແລ້ວ.

ຂ່າວ: ເພັດສາຄອນ ສິມມະວົງ
ຂ່າວສານຫຼວງພະບາງ