ອິງຕາມໜັງສືລາຍງານຂອງທ່ານ ເຈົ້າແຂວງ ໄຊຍະບູລີ, ສະບັບເລກທີ 162/ຈຂ.ຊຍ, ລົງວັນທີ 21 ພະຈິກ 2019 ນີ້ວ່າ: ໃນລະຫວ່າງຄໍ່າຄືນຂອງວັນທີ 20-21 ພະຈິກ 2019 ນີ້, ໄດ້ມີປະກົດການໄພພິບັດທາງທໍາມະຊາດ ( ແຜ່ນດິນໄຫວ ) ເກີດຂຶ້ນຢູ່ຈຸດເຊື່ອມຕໍ່ລະຫວ່າງ ເມືອງຫົງສາ ຫາ ເມືອງເງິນ ແລະ ບັນດາເມືອງອື່ນໆຂອງແຂວງ ໄຊຍະບູລີ, ມີລະດັບແຮງສັ່ນສະເທືອນ 3,9-6,4 ຣິກເຕີ, ນັບແຕ່ເວລາ 23:00 ນ. ຂອງວັນທີ 20 ຫາເວລາ 6 ໂມງ 45 ນາທີ ຂອງວັນທີ 21 ພະຈິກ 2019 ນີ້, ລວມທັງໝົດ 18 ຄັ້ງ, ອັນໄດ້ເຮັດໃຫ້ເຮືອນຂອງປະຊາຊົນ, ອາຄານສໍານັກງານຈໍານວນໜຶ່ງແຕກພັງ, ເສົາໄຟຟ້າເນີ້ງ, ເຮັດໃຫ້ໄຟຟ້າດັບຢູ່ບາງເມືອງເຊັ່ນ: ເມືອງ ຫົງສາ, ເມືອງ ເງິນ ແລະ ເມືອງ ຊຽງຮ່ອນ, ສ່ວນຄວາມເສຍຫາຍເບື້້ອງຕົ້ນຢູ່ ເມືອງຫົງສາ ມີຄົນບາດເຈັບເລັກນ້ອຍ 7 ຄົນ, ຍິງ 5 ຄົນ, ມີ 14 ບ້ານ, 89 ຫຼັງຄາ, ໃນນີ້ເປ່ເພສົມຄວນ 4 ຫຼັງ, ເປ່ເພເລັກນ້ອຍ 85 ຫຼັງ, ໂຮງຮຽນເປ່ເພເລັກນ້ອຍ 3 ແຫ່ງ, ໂຮງໝໍ 1 ແຫ່ງ, ອາຄານ 1 ແຫ່ງ, ຕະຫຼາດ 1 ແຫ່ງ, ວັດ 5 ແຫ່ງ, ເປ່ເພສົມຄວມຄວນມີ ຮ້ານບັນເທີງ 1 ແຫ່ງ, ເສັ້ນທາງປູຢາງແຕກແຫງ 1 ຈຸດ, ເມືອງ ໄຊຊະຖານ 11 ບ້ານ ແລະ ສຸກສາລາ 1 ແຫ່ງ, ນອກນີ້ຍັງມີສໍານັກງານຂອງແຂວງຈໍານວນໜຶ່ງທີ່ໄດ້ຮັບຜົນກະທົບຈາກເຫດການແຜ່ນດິນໄຫວ.

ຕໍ່ກັບເຫດການດັ່ງກ່າວ ໃນຕອນເຊົ້າຂອງວັນທີ 22 ພະຈິກ 2019 ນີ້ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມດ້ວຍຄະນະ ໄດ້ເຂົ້າກວດກາເບິ່ງຄວາມເສຍຫາຍຕົວຈິງຂອງໂຮງໄຟຟ້າຫົງສາ, ພ້ອມທັງໄດ້ຖະແຫຼ່ງຂ່າວຕໍ່ສື່ມວນຊົນວ່າ: ຫຼັງຈາກເກີດເຫດການແຜ່ນດິນໄຫວຂະໜາດ 5.9 ຣິກເຕີ ເຊິ່ງຫ່າງຈາກທີ່ຕັ້ງຂອງໂຮງໄຟຟ້າພະລັງງານຄວາມຮ້ອນຫົງສາ ປະມານ 27 ກິໂລແມັດ ໂດຍເກີດຂຶ້ນເມື່ອເວລາ 04:03 ນ. ຂອງວັນທີ 21 ພະຈິກ 2019 ລວມເຖິງອັບເຕີຊັອກທີ່ເກີດຂຶ້ນຢ່າງຕໍ່ເນື່ອງ, ຜົນກະທົບ ແລະ ຜົນເສຍຫາຍຕົວຈິງ, ເຫັນວ່າໂຮງໄຟຟ້າພະລັງງານຄວາມຮ້ອນຫົງສາ ແມ່ນໄດ້ຮັບຜົນກະທົບພຽງເລັກນ້ອຍເທົ່ານັ້ນ ໂດຍບໍ່ເກີດຄວາມເສຍຫາຍຕໍ່ອຸປະກອນຫຼັກ ຫຼື ໂຄງສ້າງຫຼັກແຕ່ຢ່າງໃດ ແລະ ໃນຄະນະດຽວກັນນີ້ໜ່ວຍຜະລິດທີ 2 ຂອງໂຮງໄຟຟ້າພະລັງງານຄວາມຮ້ອນຫົງສາກໍາລັງກຽມການເພື່ອການເດີນເຄື່ອງຕາມຂັ້ນຕອນ, ຜູ້ບໍລິຫານ ບໍລິສັດ ໄຟຟ້າ ຫົງສາ ຈໍາກັດ ໃຫ້ຄວາມເຫັນວ່າ: ຈາກເຫດການດັ່ງກ່າວ ລະບົບປ້ອງກັນຄວາມເສຍຫາຍຈາກແຮງສັ່ນສະເທືອນຂອງອຸປະກອນຫຼັກໃນໂຮງໄຟຟ້າໄດ້ປະຕິບັດຕາມຂັ້ນຕອນຢ່າງເປັນປົກກະຕິເພື່ອຢຸດການເດີນເຄື່ອງ ແລະ ເປັນໄປຕາມມາດຕະຖານດ້ານຄວາມປອດໄພຂອງຜູ້ປະຕິບັດງານ ແລະ ມາດຕະຖານຂອງບໍລິສັດ, ສະຫຼຸບເຫດການແຜ່ນດິນໄຫວໃນຄັ້ງນີ້ ບໍ່ໄດ້ສົ່ງຜົນໃຫ້ເກີດຜົນກະທົບຮ້າຍແຮງຕໍ່ກັບການດໍາເນີນງານຂອງບໍລິສັດ ແລະ ອຸປະກອນຫຼັກແຕ່ຢ່າງໃດ, ການຢຸດເຄື່ອງຜະລິດໄຟຟ້າດັ່ງກ່າວນັ້ນເປັນໄປຕາມລະບົບປ້ອງກັນຄວາມເສຍຫາຍຂອງເຄື່ອງຈັກຈາກແຮງສັ່ນສະເທືອນໂດຍອັດຕະໂນມັດ ໃນຄະນະດຽວກັນວິສາວະກອນໄດ້ກວດສອບຢ່າງລະອຽດເພື່ອໃຫ້ໝັ້ນໃຈວ່າສາມາດເດີນເຄື່ອງໄດ້ຢ່າງປອດໄພ ແລະ ຕໍ່ເນື່ອງຕໍ່ໄປ