ມີເດຍລາວແຂວງວຽງຈັນ ພາບ-ຂ່າວ:ບຸນມາ ແກ້ວບຸດດາ. ພິທີເຊັນສັນຍາສຳປະທານ ການລົງທຶນພັດທະນາໂຄງການເກັບມຽນ ແລະ ແຍກຂີ້ເຫຍື້ອທັນສະໄໝ 4 ຕົວເມືອງທົ່ງພຽງ ຂອງແຂວງວຽງຈັນ ມີເມືອງວຽງຄຳ, ເມືອງແກ້ວອຸດົມ, ເມືອງທຸລະຄົມ ແລະ ເມືອງໂພນໂຮງ ແລະ ສ້າງສະຖານທີ່ຖິ້ມຂີ້ເຫຍື້ອ ຢູ່ເມືອງໂພນໂຮງ, ແຂວງວຽງຈັນ ລະຫວ່າງອົງການປົກຄອງແຂວງວຽງຈັນ ແລະ ບໍລິສັດ ເອັສເອັມພີ ອີໂກກຣີນ ຈຳກັດ ໄດ້ຈັດຂຶ້ນໃນວັນທີ 22 ມິຖຸນາ 2021.

ທ່ານ ອານຸຊາ ເຮືອງຈະເລີນ ຜູ້ອຳນວຍການໃຫຍ່ ບໍລິສັດ ເອັສເອັມພີອີໂກກຣີນ ຈຳກັດ ໄດ້ມີຄຳເຫັນຕໍ່ພິທີວ່າ: ອີງໃສ່ການພັດທະນາຕົວເມືອງທີ່ມີການຂະຫຍາຍຕົວຢ່າງວ່ອງໄວ ຄ່ຽງຄູ່ກັບການຊົມໃຊ້ຂອງປະຊາກອນທີ່ຫຼາຍຂຶ້ນ ເຮັດໃຫ້ປະລິມານຂີ້ເຫຍື້ອ ແລະ ສິ່ງເສດເຫຼືອ ເພີ່ມຂື້ນ ສະເລ່ຍແລ້ວປະມານ 50 -80 ໂຕນຕໍ່ວັນ. ດັ່ງນັ້ນ, ເພື່ອພັນຂະຫຍາຍແນວທາງນະໂຍບາຍຂອງລັດ 6 ສ ຄື: ສ ສະອາດ, ສ ສະຫງົບ, ສ ສະຫວ່າງ, ສ ສີຂຽວ, ສ ສະເໜ່ ແລະ ສ ສີວິໄລ, ພ້ອມກັບເພີ່ມທະວີການຮັບປະກັນຄວາມສະອາດຈົບງາມ
ແລະ ເປັນມິດຕໍ່ສິ່ງແວດລ້ອມໃນໄລຍະຍາວ, ອົງການປົກຄອງຂັ້ນເມືອງ, ແຂວງ ແລະ ບໍລິສັດ ເອັສເອັມພີ ເຫັນເຖິງຄວາມສໍາຄັນ ແລະ ຈໍາເປັນໃນການເກັບມ້ຽນຂີ້ເຫຍື້ອ ແລະ ກໍາຈັດຂີ້ເຫຍື້ອດ້ວຍລະບົບທັນສະໄໝ, ດັ່ງນັ້ນ ເລີ່ມແຕ່ປີຕົ້ນ 2000 ເປັນຕົ້ນມາ

ບໍລິສັດ ເອັສເອັມທີ ອິໂກ ກຣີນ ກໍ່ໄດ້ສຶກສາຄວາມເປັນໄປໄດ້ຕໍ່ກັບການສຳປະທານການໃຫ້ບໍລິການເກັບມ້ຽນ ແລະ ສະໜາມກຳຈັດຂີ້ເຫຍື້ອດ້ວຍລະບົບທັນສະໄໝ, ແລະ ໄດ້ສຳເລັດບົດວິພາກເສດຖະກິດເຕັກນິກໂດຍຜ່ານການຮັບຮອງຈາກການຈັດຕັ້ງທີ່ກ່ຽວຂ້ອງທຸກຂັ້ນ ຈົນກ້າວມາສູ່ການເຊັນສັນຍາໃນມື້ນີ້.

ໃຫ້ກຽດລົງນາມໃນສັນຍາຄັ້ງນີ້ ຝ່າຍອົງການປົກຄອງແຂວງວຽງຈັນໂດຍທ່ານ ເຕັ່ງເມັ້ງ ຢ່າງລືໄຊ (ຫົວໜ້າພະແນກແຜນການ ແລະ ການລົງທຶນ ແຂວງວຽງຈັນແລະຝ່າຍຜູ້ລົງທຶນລົງນາມເຊັນໂດຍ ທ່ານ ອານຸຊາ ເຮືອງຈະເລີນ ຜູ້ອຳນວຍການໃຫຍ່ ບໍລິສັດ ເອັສເອັມພີອີໂກກຣີນ ຈຳກັດ ແລະມີພະຍານເຊັນຮ່ວມຝ່າຍລະ2ທ່ານ,ຝ່າຍອົງການປົກຄອງແຂວງວຽງຈັນມີທ່ານພູວອນບຸນວິໄລຫົວໜ້າພະແນກໂຍທາທິການແລະຂົນສົ່ງແຂວງວຽງຈັນ,ທ່ານສຸກັນວິໄລຣັດຫົວໜ້າພະແນກຊັບພະຍາກອນທຳມະຊາດແລະສິ່ງແວດລ້ອ
ມແຂວງວຽງຈັນ, ຝ່າຍຜູລົງທຶນມີທ່ານນາງ ສອນດາລາ ເຮືອງຈະເລີນ (ປະທານບໍລິສັດ ເອັສເອັມພີອີໂກກຣີນ) ແລະ ນາງ ພອນທິບ ທິລາກຸນ (ຫົວໜ້າຝ່າຍບໍລິຫານ ບໍລິສັດ ເອັສເອັມພີອີໂກກຣີນ)ໂດຍຊ່ອງໜ້າທ່ານ ພູວົງ ບຸນຊູ ຮອງເຈົ້າແຂວງ ແຂວງວຽງຈັນ, ມີທ່ານເຈົ້າເມືອງ 4 ເມືອງດັ່ງກ່າວ, ພ້ອມດ້ວຍພາກສ່ວນທີ່ກ່ຽວຂ້ອງ ທັງສອງຝ່າຍເຂົ້າຮ່ວມເປັນສັກຂີພິຍານ.