ມີເດຍລາວແຂວງວຽງຈັນ ພາບ-ຂ່າວ:ດາວເພັດແກ້ວປະເສີດ. ໃນວັນທີ 25 ມິຖຸນາ 2021 ຜ່ານມານີ້ ຫ້ອງການແຮງງານສະຫວັດດີການ-ສັງຄົມເມືອງແກ້ວອຸດົມຮ່ວມກັບ 3 ເມືອງທົ່ງພຽງຂອງແຂວງວຽງຈັນ ໄດ້ຈັດພິທີມອບ-ຮັບເງີນນະໂຍບາຍໃຫ້ແກ່ຄອບຄົວຜູ້ເສຍສະຫຼະຊີວິດໃນປາງສົງຄາມ ຕາມດຳລັດ 272/ລບຂອງ 4 ເມືອງທົ່ງພຽງເຊີ່ງປະກອບມີ: ເມືອງແກ້ວອຸດົມ,ເມືອງວຽງຄຳ,ເມືອງໂພນໂຮງ ແລະ ເມືອງທຸລະຄົມ ຂື້ນຢູ່ສະໂມສອນໃຫຍ່ຂອງເມືອງແກ້ວອຸດົມແຂວງວຽງຈັນ.

ໂດຍເປັນກຽດເຂົ້າຮ່ວມຂອງທ່ານ ສີສະຫວາດ ແສງພະຈັນ ກຳມະການພັກແຂວງ ເລຂາພັກເມືອງ ເຈົ້າເມືອງໆແກ້ວອຸດົມ,ມີທ່ານ ບຸນຖົມ ພົງວິໄລ ຮອງຫົວໝ້າ ພະແນກແຮງງານສະຫວັດດີການ-ສັງຄົມແຂວງວຽງຈັນ,ມີຄະນະປະຈຳພັກເມືອງ,ກຳມະການພັກເມືອງ,ຫົວໝ້າ,ຮອງຫົວໝ້າຫ້ອງການທີ່ກຽ່ວຂ້ອງ ແລະ ພໍ່ແມ່ປະຊາຊົນຜູ້ທີ່ໄດ້ຮັບນະໂຍບາຍເຂົ້າຮ່ວມຢ່າງພ້ອມພຽງ.

ໃນພິທີທ່ານ ນາງ ສົມສີນ ພູບຸນປູກ ກຳມະການພັກເມືອງ ຫົວໝ້າ ຫ້ອງການແຮງງານສະຫວັດດີການ-ສັງຄົມເມືອງແກ້ວອຸດົມ ໄດ້ໃຫ້ກຽດຂື້ນຜ່ານບົດລາຍງານການເມືອງ ການຈັດຕັ້ງປະຕິບັດວຽກງານນະໂຍບາຍຕາມດຳລັດ 272/ລບຂອງເມືອງແກ້ວອຸດົມໃນໄລຍະ1 ປີຜ່ານມາທີ່ມີທັງຈຸດດີ,ຈຸດອ່ອນ ແລະ ຂໍ້ຄົງຄ້າງ,ພ້ອມນັ້ນ ທ່ານ ນາງ ຊ້ອຍໝູລັນ ພັນໂນຫລາດ ຮອງຫົວໝ້າ ຂະແໝງນະໂຍບາຍ ພະແນກແຮງງານສະຫວັດດີການ-ສັງຄົມແຂວງວຽງຈັນໄດ້ຂື້ນຜ່ານຂໍ້ຕົກລົງຂອງດຳລັດ 272/ລບຂອງແຂວງວຽງຈັນ ເລກທີ 4016/ຮສສ ລົງວັນທີ 1 ທັນວາ 2020 ວ່າດ້ວຍ ການຈັດຕັ້ງປະຕິບັດເງີນອຸດໝູນເສຍສະຫຼະຊີວິດໃນງວດ lV ປະຈຳປີ 2020 ຕໍ່ຜູ້ທີ່ມີຜົນງານ ແລະ ຄຸນງາມຄວາມດີໃນພາລະກິດຮັບໄຊ້ການປະຕິວັດຊາດໃນຈຳນວນ 16 ທ່ານເປັນຈຳນວນເງີນທັງໝົດ 355.950.900 ກີບມອບໃຫ້ແກ່ຄອບຄົວຂອງຜູ້ເສຍສະຫຼະຊີວິດໃນປາງສົງຄາມ,

ພ້ອມທັງຜ່ານລາຍຊື່ຜູ້ທີ່ໄດ້ຮັບນະໂຍບາຍປະຈຳປີ 2020 ຂອງແຂວງວຽງຈັນ.ຫຼັງຈາກນັ້ນ,ທ່ານ ບຸນຖົມ ພົງວິໄລ ຮອງຫົວໝ້າ ພະແນກແຮງງານສະຫວັດດີການ-ສັງຄົມແຂວງວຽງຈັນໄດ້ມີຄຳເຫັນຕໍ່ພິທີພ້ອມທັງມອບແຜ່ນປ້າຍ ແລະ ກ່າວຮັບໂດຍ ທ່ານ ສີສະຫວາດ ແສງພະຈັນ ກຳມະການພັກແຂວງ ເລຂາພັກເມືອງ ເຈົ້າເມືອງໆແກ້ວອຸດົມ ພ້ອມທັງໄດ້ມອບໃຫ້ແກ່ຄອບຄົວຜູ້ທີເສຍສະຫຼະຊີວິດໃນປາງສົງຄາມໃນຈຳນວນ 4 ເມືອງທົ່ງພຽງຂອງແຂວງວຽງຈັນ,ພ້ອມທັງໄດ້ໂອ້ລົມຕໍ່ກັບຜູ້ທີ່ໄດ້ຮັບນະໂຍບາຍດັ່ງກ່າວຕື່ມອີກດ້ວຍ.