ມີເດຍລາວແຂວງບໍ່ແກ້ວ ( ຂ່າວ ທອງເພັດ ).
ວັນທີ 23 ມິຖຸນານີ້, 4 ໜ່ວຍພັກຮາກຖານກຸ່ມບ້ານທ່າຟ້າ ໄດ້ຈັດພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2020 ຂຶ້ນຢູ່ຫໍປະຊຸມບ້ານທ່າຟ້າ ໃຫ້ກຽດເຂົ້າຮ່ວມມີ ສະຫາຍ ສຸວັດ ເພັງພະຈັນ ກຳມະການພັກເມືອງ ຮອງເຈົ້າເມືອງໆຫ້ວຍຊາຍ, ມີບັນດາ ຄະນະພັກ, ຜູ້ຊີ້ນຳກຸ່ມບ້ານ, ເລຂາ-ຮອງເລຂາໜ່ວຍພັກ, ການຈັດຕັ້ງບ້ານ ພະນັກງານວິຊາການຫ້ອງການກ່ຽວຂ້ອງ ແລະ ສະມາຊິກພັກທັງ 6 ໜ່ວຍເຂົ້າຮ່ວມ.

ສະຫາຍ ຄຳໃສ ແກ້ວລືໄສ ຄະນະພັກຮາກຖານກຸ່ມບ້ານທ່າຟ້າ ໄດ້ຂຶ້ນຜ່ານບົດສະຫຼຸບຫຍໍ້ການເຄື່ອນໄຫວ ແລະ ທິດທາງແຜນການລວມຂອງ 4 ໜ່ວຍພັກໃຫ້ຮູ້ວ່າ: ໃນໄລຍະຜ່ານມາຄະນະພັກໄດ້ເອົາໃຈໃສ່ຊີ້ນຳໆພາ, ສຶກສາອົບຮົມການເມືອງ-ແນວຄິດ, ເຜີຍແຜ່-ເຊື່ອມຊຶມບັນດາມະຕິຄຳສັ່ງ, ແຈ້ງການ ໃຫ້ແກ່ສະມາຊິກພັກໄດ້ຮັບຮູ້, ເຂົ້າໃຈຢ່າງຕັ້ງໜ້າ ຖືເອົາວຽກງານປ້ອງກັນຊາດ-ປ້ອງກັນຄວາມສະຫງົບເປັນວຽກນຳໜ້າ ຍົກສູງວຽກງານຂະຫຍາຍພັກໃນໄລຍະໃໝ່ໃຫ້ເປັນຮູບປະທຳ, ປະຕິບັດໜ້າທີ່ແບບລວມສູນປະຊາທິປະໄຕ ເຮັດວຽກເປັນໝູ່ຄະນະ ມີການປຶກສາຫາລືແກ້ໄຂບັນຫາຮ່ວມກັນ ຕິດພັນກັບ ການແບ່ງວຽກໃຫ້ບຸກຄົນຮັບຜິດຊອບນຳໄປຈັດຕັ້ງປະຕິບັດດ້ວຍຜົນສຳເລັດ

ຈາກນັ້ນ, ຄະນະຮັບຜິດຊອບ ໄດ້ຜ່ານຂໍ້ຕົກລົງຂອງຄະນະປະຈຳພັກແຂວງ ວ່າດ້ວຍການມອບໃບຢັ້ງຢືນໃຫ້ໜ່ວຍພັກຄຸ້ມ 1 ບ້ານທ່າຟ້າ, ໜ່ວຍພັກໂຮງຮຽນ ມຕ ທ່າຟ້າ, ບ້ານປາງສະລາວ ແລະ ໜ່ວຍພັກຄຸ້ມ 2 ບ້ານທ່າຟ້າ ລວມ 4 ໜ່ວຍພັກ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2020 ໃຫ້ກຽດຂຶ້ນມອບໂດຍ ສະຫາຍ ສຸວັດ ເພັງພະຈັນ.

ໂອກາດນີ້, ສະຫາຍ ສຸວັດ ເພັງພະຈັນ. ໄດ້ໃຫ້ທິດຊີ້ນຳເນັ້ນໜັກ ຄະນະພັກ, ເລຂາໜ່ວຍພັກ ແລະ ສະມາຊິກພັກທັງ 4 ໜ່ວຍ ຕ້ອງຖືເອົາວຽກງານຕິດຕາມກວດກາ, ດຳເນີນຊີວິດການເມືອງ, ຕຳນິກໍ່ສ້າງຊ່ວຍເຫຼືອເຊິ່ງກັນ ແລະ ກັນເປັນສຳຄັນ ສືບຕໍ່ສຶກສາອົມຮົມການເມືອງ-ແນວຄິດ, ເສີມຂະຫຍາຍການກໍ່ສ້າງມະຫາຊົນຜູ້ກ້າວໜ້າ ເຂົ້າເປັນສະມາຊິກພັກຢ່າງຕໍ່ເນື່ອງ ພ້ອມກັນ ຮັກສາມູນເຊື້ອໜ່ວຍພັກໜ່ວຍພັກປອດໃສ, ເຂັ້ມແຂງ, ໜັກແໜ້ນໃຫ້ໝັັ້ນຄົງເປັນກົກ ຍົກສູງການຊີ້ນຳໆພາສະມາຊິກພັກ ຈັດຕັ້ງປະຕິບັດຕາມພາລະບົດບາດ, ສິດ, ໜ້າທີ່ຂອງຕົນ ຕາມການມອບໝາຍຂອງຂັ້ນເທິງໃຫ້ປະສົບຜົນສຳເລັດດີຂຶ້ນເລື້ອຍໆ.