ທີ່​ຫ້ອງ​ປະ­ຊຸມ​ຂອງ​ຫ້ອງ​ວ່າ­ການ​ປົກ­ຄອງ​ແຂວງ​ສະຫວັນ​ນະ​ເຂດ ໄດ້​ຈັດ​ໃຫ້​ມີ​ພິ­ທີ​ມອບ ​-​ຮັບ​ໜ້າ­ທີ່​ຫົວ­ໜ້າ​ພະ​ແນ​ກ​ພາຍ​ໃນ​ແຂວງຂຶ້ນ​ໃນ​ວັນ​ທີ 5 ທັນວາຜ່ານ​ມາ ໂດຍ​ການ​ເປັນ​ກຽດ​ເຂົ້າ​ຮ່ວມ​ເປັນ​ປະ­ທານ​ຂອງ​ທ່ານ ໂພ​ໄຊ ໄຊ​ຍະ​ສອນ ກຳ­ມະ­ການ​ສຳ­ຮອງ​ສູນ​ກາງ​ພັກ ຮອງ​ເລ­ຂາ​ພັກ​ແຂວງ ຮອງ​ເຈົ້າ­ແຂວງ​ສະ­ຫວັນ​ນະ​ເຂດ, ມີ​ພະ­ແນກ­ການ​ກົມ​ກອງ​ອ້ອມ​ຂ້າງ​ແຂວງ ເຂົ້າ​ຮ່ວມ.

ໃນ​ພິ­ທີ, ທ່ານ ພອນ​ຄຳ ໄຊ​ຍະ​ສົມ­ບັດ ຫົວ­ໜ້າ​ພະ​ແນ​ກ​ພາຍ​ໃນ​ແຂວງ​ຄົນ​ເກົ່າ ກໍໄດ້​ຂຶ້ນ​ລາຍ​ງານ​ການ­ເຄື່ອນ­ໄຫວ​ຊີ້​ນຳ​ວຽກ​ງານ​ໃນ​ໄລ­ຍະ​ທີ່​ຮັບ​ໜ້າ­ທີ່​ນັບ​ແຕ່​ເດືອນ​ກຸມ­ພາ ປີ 2015 ຈົນ​ມາ​ເຖິງ​ປັດ­ຈຸ​ບັນ ຈາກ​ນັ້ນ, ກໍ່​ໄດ້​ມີ​ການ​ເຊັນ​ມອບ​-​ຮັບ​ໜ້າ­ທີ່​ກັນ​ຢ່າງ​ເປັນ​ທາງ​ການ​ລະ­ຫວ່າງ​ທ່ານ ພອນ​ຄຳ ໄຊ​ຍະ​ສົມ­ບັດ ຫົວ­ໜ້າ​ພະ​ແນ​ກ​ພາຍ​ໃນ​ແຂວງ​ຄົນ​ເກົ່າ ແລະ ​ທ່ານ ແສນ​ສັກ ພົມ​ວົງ­ສາ (ອະ­ດີດ​ຮອງ​ຫົວ­ໜ້າ​ຄະ­ນະ​ຈັດ​ຕັ້ງ​ແຂວງ) ຮັກ­ສາ​ການ​ຫົວ­ໜ້າ​ພະ​ແນ​ກ​ພາຍ​ໃນ​ແຂວງ​ຄົນ​ໃໝ່.

ໂອ­ກາດ​ນີ້, ທ່ານ ໂພ​ໄຊ ໄຊ​ຍະ​ສອນ ​ກໍໄດ້​ກ່າວ​ໂອ້​ລົມ ຕໍ່​ພິ­ທີ ໂດຍ​ທ່ານ​ໄດ້​ສະ­ແດງ​ຄວາມ​ຍ້ອງ­ຍໍ​ຊົມ­ເຊີຍ​ຕໍ່​ຜົນງານ​ ທີ່​ທາງ​ທ່ານ​ຫົວ­ໜ້າ​ພະແນກ​​ພາຍ​ໃນ​ແຂວງ​ຄົນ​ເກົ່າຍາດ​ ມາ​ໄດ້​ໃນ​ໄລ­ຍະ​ຜ່ານ​ມາ ພ້ອມ​ນີ້, ທ່ານ​ກໍຍັງ​ໄດ້​ເນັ້ນ​ໜັກ​ໃຫ້​ຮັກ­ສາ​ການ​ຫົວ­ໜ້າ​ພະ​ແນ​ກ​ພາຍ​ໃນ​ແຂວງ​ຄົນ​ໃໝ່ ໃຫ້​ສືບ­ຕໍ່​ຄົ້ນ­ຄວ້າ ແລະ ​ ປຶກ­ສາ​ຫາ­ລື​ຮ່ວມ​ກັນ ເພື່ອ​ແກ້​ໄຂ​ວຽກ​ງານ​ທີ່​ຍັງ​ຄົງ​ຄ້າງ ພ້ອມ​ທັງ​ກຳ­ນົດ​ແຜນ ­ການ​ທີ່​ຈະ​ສຸມ​ໃສ່​ຈັດ​ຕັ້ງ​ປະ­ຕິ ­ບັດ​ໃນ​ປີ 2020 ຕື່ມ​ອີກ.

Medialaos MMD