ກອງ​ປະຊຸມ​ວຽກ​ງານ​ການ​ຮ່ວມ​ມື​ຂອງ​ສື່​ມວນ​ຊົນ​ຂອງ​ອາ​ຊຽນ ແລະ ຄູ່​ຮ່ວມ​ເຈລະຈາ 3 ປະເທດ​ຄື ສ.ເກົາຫຼີ, ຍີ່​ປຸ່ນ ແລະ ສປ.ຈີນ​ຄັ້ງ​ທີ 10 ໄດ້​ຈັດ​ຂຶ້ນ​ໃນ​ວັນ​ທີ 15 ທັນວາ​ ທີ່​ນະຄອນ​ເສີນ​ຕູ່, ສປ.ຈີນ​ ໂດຍ​ການ​ເປັນ​ປະທານ​ຂອງ​ທ່ານ ຟາງ ເຈຍ ເສີງ (Mr Fang Jiangshan) ຮອງ​ຫົວໜ້າ​ບັນ​ນາທິ​ການ​ ໜັງສືພິມ​ ປະຊາຊົນ​ ລາຍ​ວັນ​ຂອງ​ຈີນ, ຝ່າຍ​ລາວ​ໂດຍ​ການ​ເຂົ້າ​ຮ່ວມຂອງ​ທ່ານ ທອງ​ຫຼໍ່ ດວງ​ສະຫວັນ ຫົວໜ້າ​ບັນນາທິການ​ໜັງສືພິມ​ພາສາ​ຕ່າງປະເທດ ພ້ອມ​ດ້ວຍ​ບັນດາ​ຫົວໜ້າ​ບັນນາທິການ, ຮອງ​ຫົວໜ້າ​ບັນນາທິການ​ທັງ​ສື່​ສິ່ງ​ພິມ, ວິທະຍຸ, ໂທລະພາບ, ຕະຫຼອດ​ຮອດ​ນັກ​ຂ່າວ​ຈາກ​ບັນດາ​ປະເທດ​ສະ​ມາ​ຊິກ​ອາ​ຊຽນ ແລະ ຄູ່​ຮ່ວມ​ເຈລະຈາ​ເຂົ້າ​ຮ່ວມ.

ໃນ​ພິທີ​ທ່ານ ທອງ​ຫຼໍ່ ດວງ​ສະຫວັນ ໄດ້​ຕາງໜ້າ​ໃຫ້​ຄະນະ​ຜູ້​ແທນ​ຝ່າຍ​ລາວ​ຂຶ້ນ​ມີ​ຄຳ​ເຫັນ​ໂດຍ​ມີ​ເນື້ອ​ໃນ​ບາງ​ຕອນ​ສຳຄັນ​ໃຫ້​ຮູ້​ວ່າ: ກອງ​ປະຊຸມ​ວຽກ​ງານ​ການ​ຮ່ວມ​ມື​ລະຫວ່າງ​ສື່​ມວນ​ຊົນ​ຂອງ 10 ປະເທດ​ອາ​ຊຽນ ແລະ ຄູ່​ຮ່ວມ​ເຈລະຈາ​ຄັ້ງ​ນີ້ ແມ່ນ​ມີ​ຄວາມ​ໝາຍ​ສຳຄັນ​ໃນ​ການ​ພົວພັນ​ຮ່ວມ​ມື​ລະຫວ່າງ ສປປ ລາວ ແລະ ສປ.ຈີນ ​ເວົ້າ​ລວມ, ເວົ້າ​ສະເພາະ​ການ​ຮ່ວມ​ມື​ລະຫວ່າງ​ສື່​ມວນ​ຊົນ​ຂອງ​ປະເທດ​ສະມາຊິກ​ອາ​ຊຽນ ແລະ ຄູ່​ຮ່ວມ​ເຈລະຈາ​ຂອງ​ອາ​ຊຽນ​ກໍຄື: ສປ.ຈີນ, ສ.ເກົາຫຼີ ແລະ ຍີ່ປຸ່ນ, ເພື່ອ​ພັດທະນາ​ຂະແໜງການ​ສື່​ມວນ​ຊົນ​ໃນ​ຍຸກ​ດີ​ຈີ​ຕອນ​ໃຫ້​ມີ​ການ​ເຊື່ອມ​ໂຍງ​ໃນ​ພູມິ​ພາກ​ອາ​ຊຽນ, ລວມ​ໄປ​ເຖິງ​ການ​ເຊື່ອມ​ໂຍງ​ເຂົ້າ​ກັບ​ບັນດາ​ສື່​ມວນ​ຊົນ​ຂອງ​ປະເທດ​ຄູ່​ຮ່ວມ​ເຈລະຈາ​ຂອງ​ອາ​ຊຽນ​ຈະ​ໄດ້​ແລກປ່ຽນ​ຄຳ​ຄິດ​ຄຳ​ເຫັນ​ຮ່ວມ​ກັນ​ໃນ​ການ​ພັດທະນາ​ວຽກ​ງານ​ສື່​ມວນ​ຊົນ​ໃຫ້​ໄດ້​ຮັບ​ຜົນ​ປະໂຫຍດ​ສູງ​ສຸດ​ຮ່ວມ​ກັນ​ໃນ​ອະ​ນາ​ຄົດ.

ທ່ານ ຟາງ ເຈຍ ເສີງ ໄດ້​ກ່າວ​ວ່າ: ຕາມ​ນະໂຍບາຍ​ການ​ເປີດ​ປະຕູ​ສູ່​ພາຍ​ນອກ​ຂອງ​ຈີນ​ໂດຍ​ສະເພາະ​ແມ່ນ​ນະໂຍບາຍ​ຂອງ​ປະທານ ສີຈິ້ນຜິງ ກໍ​ຄື “ໜຶ່ງ​ແລວ ​ໜຶ່ງ​ເສັ້ນທາງ” ເນື້ອ​ແທ້​ແມ່ນ​ຈະ​ສ້າງ​ໃຫ້​ນະຄອນ​ເສີນ​ຕູ່​ເປັນ​ແຂວງ​ທີ່​ເຊື່ອມ​ໂຍງ​ການ​ຄົມມະນາຄົມ​ຂົນສົ່ງ ແລະ ຈະລາຈອນ​ສິນຄ້າ​ລະຫວ່າງ 10 ປະເທດ​ອາ​ຊຽນ ແລະ ປະເທດ​ໃນ​ເຂດ​ອາຊີ​ໃຕ້ ແລະ ເປີດ​ການ​ເຊື່ອມ​ໂຍງ​ການ​ຄົມມະນາຄົມ​ທາງ​ນໍ້າ, ທາງ​ທະເລ ແລະ ທາງ​ອາກາດ​ໃນ​ອະນາຄົດ​ອັນ​ໃກ້​ນີ້, ກອງ​ປະຊຸມ​ຄັ້ງ​ນີ້​ຈະ​ໄດ້​ຮ່ວມ​ກັນ​ປຶກສາ​ຫາລື​ຂອງ​ຂະແໜງການ​ສື່​ມວນ​ຊົນ​ໃນ​ການ​ເຜີຍແຜ່​ນະໂຍບາຍ​ຕ່າງໆ​ຂອງ​ຈີນ ແລະ ອາ​ຊຽນ​ມີ​ຮ່ວມ​ກັນ.

Medialaos MMD