ໃນ​ວັນ​ທີ 19 ທັນ​ວາ 2019 ທີ່​ໂຮງ​ແຮມດອນ​ຈັນ​ພາ​ເລດ ນະ​ຄອນ​ຫລວງວຽງ​ຈັນ, ໄດ້​ມີ​ກອງ​ປະ​ຊຸມ​ແລກ​ປ່​ຽນ​ເສດ​ຖະ​ກິດ ​ລາ​ວ-ຈີນ ແລະ ການ​ໂຄ​ສະ​ນາ​ສົ່ງ​ເສີມ​ ເມືອງ​ ອີ່​ປິງ​ ແຂວງ ​ເສ​ສວນ ສ​ປ.ຈີນ, ໂດຍ​ການ​ເຂົ້າ​ຮ່ວມ​ຂອງ​ ທ່ານ ນາງ ຫລິວ ຊ່ຽວ​ລີ່ ປະ​ທານ​ທີ່​ປຶກ​ສາ​ການ​ເມືອງ​ ນະ​ຄອນ​ອີ່ປິງ ແຂວງ​ເສ​ສວນ ສ​ປ.ຈີນ, ທ່ານ ອາ​ນຸ​ສັກ ແພງ​ທິມ​ມະ​ວົງ ຮອງຫົວ​ໜ້າ​ກົມ​ແຜນ​ການ ແລະ ການ​ເງິນ ກະ​ຊວງ​ກະ​ສິ​ກຳ ແລະ ປ່າ​ໄມ້, ທ່ານ ວຽງ​ທອງ ພົມ​ມະ​ຫາ​ໄຊ ຜູ້​ອຳ​ນວຍ​ການໃຫຍ່ ​ລັດ​ວິ​ສາ​ຫະ​ກິດ​​ບໍ​ລິ​ການ​ກະ​ສິ​ກຳ ກະ​ຊວງ​ກະ​ສິ​ກຳ ແລະ ປ່າ​ໄມ້, ມີ​ບັນ​ດາ​ແຂກ​ຖືກ​ເຊີນf ພ້ອມ​ດ້ວຍ​ພາກ​ສ່ວນ​ກ່ຽວ​ຂ້ອງ​ ລາວ-ຈີນ​ເຂົ້າ​ຮ່ວມ.

ກອງ​ປະ​ຊຸ​ມ​ດັ່ງ​ກ່າວ, ຈັດ​ຂຶ້ນ​ເພື່ອ​ແລກ​ປ່ຽນ​ຮ່ວມກັນ ​ທາງ​ດ້ານ​ເສດ​ຖະ​ກິດ ແລະ ການ​ຄ້າ ຂອງ​ສອງ​ປະ​ເທດ​ລາວ-ຈີນ ໂດຍ​ສະ​ເພາະ ​ແມ່ນ​ເມືອງ ​ຢີ​ປິງ ແລະ ສ​ປ​ປ ລາວ, ພ້ອມ​ທັງ​ເປັນ​ການ​ລຳ​ລຶກ​ ຄືນ​ສະ​ຫາຍ​ເກົ່າ ແລະ ຮ່ວມ​ກັນ​ສົ່ງ​ເສີມ​ຕະ​ຫລາດ​ ຂອງ​ສອງ​ປະ​ເທດ ​ໃນ​ແຕ່​ລະ​ເຂດ ໃຫ້​ໄດ້​ຮັບ​ການ​ຂະ​ຫຍາຍ​ຢ່າງກວ້າງ​ຂວາງ.

ໃນ​ໂອ​ກາດ​ດັ່ງ​ກ່າວ, ທ່ານ ນາງ ຫລິວ ຊ່ຽວ​ລີ່ ໄດ້​ກ່າວ​ວ່​າ: ​ເມືອງ ​ອີ່​ປິງ​ ເປັນ​ເມືອງ​ໜຶ່ງ​ທີ່​ຢູ່​ໃນ​ແຂວງ​ເສ​ສວນ ສ​ປ.ຈີນ ມີ​ແມ່ນໍ້​າ​ສາມ​ສາຍທີ່​ປະ​ສານ​ເຊື່ອມ​ຕໍ່​ກັນ ​ຄື: ແມ່​ນ້ຳ​ຊາ​ຈຽງ, ແມ່​ນ້ຳ​ມິນ ແລະ ແມ່​ນ້ຳ​ຊາງ, ເມືອງ ​ອີ່​ປິງ ເປັນ​ເມືອງ​ທີ່​ມີ​ປະ​ຫວັດສາດ​ຫລາຍກວ່າ 2.200 ປີf ເປັນ​ເມືອງ​ທີ່​ມີ​ຊື່​ສຽງ​ດ້ານ​ການ​ປູກ​ຊາ, ຜະ​ລິດ​ເຫລົ້າ ແລະ ໄມ້​ປ່ອງ, ມີ​ເນື້ອ​ທີ່​ທັງ​ໝົດ 13.283 ກິ​ໂລ​ຕາ​ແມັດ ແລະ ມີ​ພົນ​ລະ​ເມືອງ  5,5 ລ້ານກວ່າ​ຄົນ, ເມືອງ ​ອີ່​ປິງ ມີ​ເຂດ​ພັດ​ທະ​ນາ​ເສດ​ຖະ​ກິດ​ ແຫ່ງ​ຊາດລຽບ​ຕາມ​ທ່າ​ເຮືອ, ມີ 7 ເຂດ​ພັດ​ທະ​ນາ​ເສດ​ຖະ​ກິດ ​ຂອງ​ແຂວງ​ເສ​ສວນ, ມີ 1 ເຂດ​ເຕັກ​ໂນ​ໂລ​ຊີ​ລະ​ດັບ​ສູງ​ຂອງ​ແຂວງ ແລະ ກຳ​ລັງ​ເປັນ​ເຂດ​ເຕັກ​ໂນ​ໂລ​ຊີ​ ລະ​ດັບ​ສູງ​ແຫ່ງ​ຊາດ, ມີ​ສູນ​ຂົນ​ສົ່ງ​ສິນ​ຄ້າ​ປອດ​ພາ​ສີ. ພ້ອມ​ນີ້, ຍັ​ງ​ເປັນ​ເມືອງ​ທ່ອງ​ທ່ຽວ​ທີ່​ດີ​ເລີດ​ໃນ​ປະ​ເທດ​ຈີນ, ເປັນ​ເມືອງ​ທ່ອງ​ທ່ຽວ​ທາງວັດ​ທະ​ນະ​ທຳ ແລະ ນິ​ເວດ​ວິ​ທະ​ຍາ​ທີ່​ດີ​ທີ່​ສຸດ​ ຂອງ​ປະ​ເທດ​ຈີນ ເປັນ 1 ໃນ 5 ສະ​ຖານ​ທີ່​ທ່ອງ​ທ່ຽວ​ ທີ່​ໃຫຍ່​ຂອງ​ແຂວງ​ເສ​ສວນ, ມີ​ອັດ​ຕາ​ການ​ປົກ​ຫຸ້ມ​ຂອງ​ປ່າ​ໄມ້​ 47% ເຊິ່ງ​ເປັນ​ສ່ວນ​ສະ​ໜັບ​ສະ​ໜູນ​ທີ່​ສຳ​ຄັນ​ ຕໍ່​ການ​ປົກ​ປ້ອງ​ລະ​ບົບ​ນິ​ເວດ ໃນ​ບໍ​ລິ​ເວນ​ຕົ້ນ​ນ້ຳ​ຂອງ​ແມ່​ນ້ຳ​ຢາງ​ຊີ, ທົ່ວ​ເມືອງມີ 34 ຈຸດ​ຊົມ​ວິວ​, ໃນ​ປີ 2018 ເມືອງ​ ອີ່​ປິງ ມີ​ເນື້ອ​ທີ່​ສວນ​ຊາ​ທັງ​ໝົດ 79.133 ເຮັກ​ຕາ, ຜົນ​ຜະ​ລິດ​ຊາ​ແຫ້ງ​ບັນ​ລຸ 71.000 ໂຕນ ມູນ​ຄ່າ​ການ​ຜະ​ລິດ​ຊາ​ບັນ​ລຸ 16,52 ຕື້ຢວນ.

ໂອກາດ​ນີ້, ທ່ານ ວຽງ​ທອງ ພົມ​ມະ​ຫາ​ໄຊ ກ່າວ​ວ່າ: ປະ​ເທດ​ລາວ​ ເປັນ​ປະ​ເທດ​ທີ່​ມີເນື້ອ​ທີ່​​ເອື້ອ​ອຳ​ນວຍ​ໃນ​ການ​ຜະ​ລິດ​ກະ​ສິ​ກຳ, ເປັນ​ປະ​ເທດ​ທີ່​ມີ​ພື້​ນ​ທີ່ 3 ລັກ​ສະ​ນະ​ແຕກ​ຕ່າງ​ກັນ ໃນ​ການ​ປູກ​ຝັງ​ລ້ຽງ​ສັດ, ໂດ​ຍ​ສະ​ເພາະ​ ໃນ​ການ​ຜະ​ລິດ​ກະ​ສິ​ກຳ​ທົ່ວ​ໄປ. ພ້ອມ​ນີ້, ຍັງ​ມີ​ເຂດ​ພູ​ດອຍ, ເຂດ​ພູ​ພຽງ ແລະ ເຂດ​ທົ່ງ​ພຽງ. ສະ​ເພາະ​ຢູ່​ປະ​ເທດ​ລາວ​ເຮົາມີ​ອາ​ກາດ ແລະ ພູມ​ສັນ​ຖານ​ທີ່​ເໝາະ​ສົມ ແລະ ເອື້ອ​ອຳ​ນວຍ​ທີ່​ສຸດ ໃນ​ການ​ຜະ​ລິດ​ກະ​ສິ​ກຳ, ເຊິ່ງ​ພັກ ແລະ ລັດ​ຖະ​ບານ ​ຂອງ​ພວກ​ເຮົາ​ກໍ່​ມີ​ນະ​ໂຍ​ບາຍ​ຕ່າງໆ ທີ່​ຕິດ​ພັນ​ກັບການ​ສົ່ງ​ເສີມ​ ການ​ລົງ​ທຶນ​ດ້ານ​ກະ​ສິ​ກຳ ​ແລະ ໄດ້​ເປີດກວ້າງ​ໃຫ້​ນັກ​ລົງ​ທຶນ ​ຈາກ​ຕ່າງ​ປະ​ເທດ​ເຂົ້າ​ມາ​ຮ່ວມ​ມື ແລະ ​ລົງ​ທຶນໃນ ສ​ປ​ປ ລາວ ຫລາຍ​ຂຶ້ນ.

Medialaos