ຂະບວນການແຂ່ງຂັນກິລາມິດຕະພາບ ກະຊັບມິດ ເພຶ່ອຊິງຂັນ ອໍານວຍການ ໂຄງການເກັບກູ້ລະເບີດ ( ຄກລ ) ແຫ່ງຊາດ ຄັ້ງທີ2 ລະຫວ່າງ ທີມຄະນະປະສານງານ ຄກລ ຈາກ 3 ແຂວງພາກໃຕ້ ຄື: ເຊກອງ, ສາລະວັນ ແລະອັດຕະປື ໄດ້ມີຂຶ້ນໃນວັນທີ 23 ທັນວາ 2019 ນີ້, ຢູ່ທີ່ເດີ່ນກິລາຟຸດຊໍ ສາຍທາງຫຼວງ ແຂວງເຊກອງ ທ່ານ ອົບມາ ລາດຕະກຸນຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງເຊກອງ ກ່າວ່າ: ການແຂ່ງຂັນກິລາບານເຕະໃນຄັ້ງນີ້ ແມ່ນການແຂ່ງຂັນເພື່ອສຸຂະພາບ ແລະເພື່ອສ້າງຂະບວນການມິດຕະພາບ ກະຊັບມິດ ແລະຮັດແໜ້ນຄວາມສາມັກຄີ ທັງເປັນການສ້າງຂະບວນການຕ້ອນຮັບວັນສໍາຄັນຕ່າງໆຂອງຊາດ ກໍຄືຂອງແຂວງພວກເຮົາ ທີ່ກໍາຂຸ້ນຂ້ຽວເປີດກອງປະຊຸມໃຫຍ່ໃນຂັ້ນຕ່າງໆຂອງຕົນຢ່າງຟົດຟື້ນ ພ້ອມນັ້ນ ຍັງເປັນການສ້າງໂອກາດໃຫ້ຄະນະນໍາ, ຄະນະບໍລິຫານງານ ແລະພະນັກງານ ຄກລ ທັງ 3 ແຂວງ ໄດ້ພົບປະແລກປ່ຽນ, ຖອດຖອນບົດຮຽນເຊິ່ງກັນ ແລະກັນຕື່ມອີກ; ຊຶ່ງການແຂ່ງຂັນຄັ້ງນີ້ແມ່ນຈັດຂຶ້ນເປັນຄັ້ງທີສອງ ໂດຍແມ່ນແຂວງເຊກອງ ເປັນເຈົ້າພາບ, ໂດຍທັງ 3 ແຂວງໄດ້ປ່ຽນກັນເປັນເຈົ້າພາບ ໝູນວຽນກັນໄປ.

ຊຶ່ງການແຂ່ງຂັນກິລາໃນຄັ້ງນີ້ ມີ 5 ທີມເຂົ້າຮ່ວມຄື: ທີມຊາວໜຸ່ມ ຄກລ ຈາກແຂວງເຊກອງ, ສາລະວັນ ແລະອັດຕະປື ແຂວງລະ 1 ທີມ, ທີມອາວຸໂສ ຈາກຄະນະພະແນກແຮງງານ ແລະສະຫວັດດີການສັງຄົມແຂວງເຊກອງ ແລະ ທີມລວມອາວຸໂສ ຈາກ ຄກລ ທັງ 3 ແຂວງ; ຜ່ານການແຂ່ງຂັນກິລາດັ່ງກ່າວ, ທີມຊາວໜຸ່ມ ຄກລ ຊະນະເລີດ ໄດ້ແກ່ ທີມ ຄກລ ແຂວງອັດຕະປື ສາມາດເອົາຊະນະ ທີມ ຄກລ ແຂວງເຊກອງ ດ້ວຍ 1 ປະຕູ ຕໍ່ 0 , ຊຶ່ງໄດ້ຮັບຂັນລາງວັນ ອໍານວຍການໂຄງການ ຄກລ ແຫ່ງຊາດ 1 ໜ່ວຍ; ທີມອາວຸໂສ ຊະນະເລີດ ໄດ້ແກ່ ທີມພະແນກ ຮສສ ແຂວງເຊກອງ ເອົາຊະນະຄະນະ ທີມລວມອາວຸໂສ ຈາກ ຄກລ ທັງ 3 ແຂວງ ດ້ວຍ 3 ປະຕູ ຕໍ່ 2 , ຊຶ່ງໄດ້ຮັບຂັນໜຶ່ງໜ່ວຍຈາກຜູ້ປະສານງານ ຄກລ ແຂວງເຊກອງ.

Medialaos