ໃນວັນທີ 23 ສິງຫາ 2019 ນີ້ ກອງບັນຊາການທະຫານແຂວງສະຫວັນະເຂດ ໄດ້ຈັດພິທີປະກາດການຈັດຕັ້ງຂັ້ນຫົວໜ້າການທະຫານ ແລະ ຫົວໜ້າຫ້ອງການເມືອງ ແລະ ຍົກຍ້າຍນາຍທະຫານໄປຮັບໜ້າທີ່ໃຫ່ມຢູ່ແຂວງ ໂດຍການເຂົ້າຮ່ວມຂອງທ່ານ ທອງທ່ຽງ ສີດາວົງ ກຳມະການປະຈຳພັກແຂວງ ຫົວໜ້າຄະນະຈັດຕັ້ງແຂວງສະຫວັນະເຂດ,ມີທ່ານ ພົນຈັດຕະວາ ຈະເລີນ ວົງວິໄຊ ເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງ,ມີຄະນະພັກ-ຄະນະບັນຊາກອງບັນຊາການທະຫານແຂວງ ກອງບັນຊາການທະຫານເມືອງ ກອງພັນ,ກອງຮ້ອຍເອກະລາດທີ່ຂື້ນກັບກອງບັນຊາການທະຫານແຂວງເຂົ້າຮ່ວມ.

ໃນພິທີ ພັນໂທ ວັນທອງ ບຸດສະດາ ຄະນະພັກ ຫົວໜ້າຫ້ອງການກອງບັນຊາການທະຫານແຂວງ,ຂື້ນອ່ານຂໍ້ຕົກລົງຂອງກະຊວງປ້ອງກັນປະເທດວ່າດ້ວຍການແຕ່ງຕັ້ງຮັກສາການຫົວໜ້າການທະຫານ,ຮັກສາການຫົວໜ້າຫ້ອງການເມືອງຄົນໃຫ່ມ ແລະ ຂໍ້ຕົກລົງຂອງກະຊວງປ້ອງກັນປະເທດວ່າດ້ວຍການຍົກຍ້າຍນາຍທະຫານໄປໃຫ້ຄະນະພັກ-ຄະນະປົກຄອງແຂວງສະຫວັນະເຂດໂດຍອິງໃສ່ກົດໝາຍນາຍທະຫານກອງທັບປະຊາຊົນລາວສະບັບປັບປຸງພາກທີ II ໝວດ 4 ມາດຕາ 26 ແລະ ເພື່ອປະຕິບັດຕາມທີດທາງກ່ຽວກັບການປັບປຸງບູລະນະກົງຈັກການຈັດຕັ້ງນໍາພາ-ບັນຊາໃນກຳລັງປະກອບອາວຸດໃຫ້ເຂັ້ມແຂງ,ໜັກແໜ້ນຮອບດ້ານ,ເພື່ອເຮັດສຳເລັດໜ້າທີ່ປົກປັກຮັກສາ ແລະ ພັດທະນາປະເທດຊາດ,ໃນນີ້ແຕ່ງຕັ້ງສະຫາຍ ພັນໂທ ຄຳເພັດ ສຸລິຍະວົງ ຄະນະພັກ ຫົວໜ້າຫ້ອງເສນາທິການຂື້ນຮັກສາການຫົວໜ້າການທະຫານກອງບັນຊາການທະຫານແຂວງສະຫວັນະເຂດ,ແຕ່ງຕັ້ງສະຫາຍ ພັນໂທ ຄຳຜົງ ພັດທະນາ ຄະນະພັກ ຮອງຫົວໜ້າຫ້ອງການເມືອງ ຂື້ນຮັກສາການຫົວໜ້າຫ້ອງການເມືອງກອງບັນຊາການທະຫານແຂວງສະຫວັນະເຂດ,ຍົກຍ້າຍພັນໂທ ວິລະວົງ ມະນີແສງ ຄະນະພັກ ຫົວໜ້າຫ້ອງການເມືອງໄປໃຫ້ຄະນະພັກຄະນະປົກຄອງແຂວງສະຫວັນນະເຂດ.

ໃນໂອກາດນີ້ ທ່ານ ທອງທ່ຽງ ສີດາວົງ ກຳມະການປະຈຳພັກແຂວງ ຫົວໜ້າຄະນະຈັດຕັ້ງແຂວງ ໄດ້ເນັ້ນໃຫ້ຜູ້ທີ່ໄດ້ຮັບໜ້າທີ່ໃຫ່ມພ້ອມດ້ວຍຄະນະ ຈົ່ງພ້ອມກັນສືບຕໍ່ເພີ່ມທະວີຄວາມຮັບຜິດຊອບໜ້າທີ່ການເມືອງຂອງຕົນໃຫ້ສູງ, ໂດຍຖືເອົາການສືກສາອົບຮົມການເມືອງແນວຄິດສອດຫ້ອຍເຂົ້າໃນທຸກຂົງເຂດວຽກງານຂອງກົມກອງ, ເຮັດວຽກລວມສູນປະຊາທິປະໄຕ, ນຳພາເປັນໝູ່ຄະນະບຸກຄົນຮັບຜິດຊອບຢ່າງຈະແຈ້ງ, ຕັ້ງໜ້າປັບປຸງກໍ່ສ້າງກົມກອງໃຫ້ມີຄວາມໜັກແໜ້ນເຂັ້ມແຂງໃນທຸກດ້ານ, ພ້ອມກັນນຳພາກົມກອງກ້າວຂື້ນໃນການສ້າງກອງທັບໃຫ້ມີລະບຽບແບບແຜນ ແລະ ທັນສະໄໝ.
—————-
#savannakhet #medialaos