ມີເດຍລາວແຂວງ ສາລະວັນ ໂດຍ: ກິນດາວັນ ອ້ວນນາຄູ ໃນວັນທີ 31 ມີນາ ຜ່ານມານີ້ ທ່ານ ປອ ໂພໄຊ ໄຊຍະສອນ ເຈົ້າແຂວງສາລະວັນ, ພ້ອມຄະນະ, ໄດ້ລົງເຄື່ອນໄຫວຢ້ຽມຢາມຊຸກຍູ້ຄອບຄົວ ພໍ່ ເຊີຍ ຢູ່ບ້ານນາກະເຈີມ ເມືອງຕຸ້ມລານ ເຊິ່ງເປັນຄອບຄົວຕົວແບບລ້ຽງໝູລາດພື້ນບ້ານ.

ການເຄື່ອນໄຫວຄັ້ງນີ້ ທ່ານເຈົ້າແຂວງສາລະວັນ ກໍ່ໄດ້ຮັບຟັງການລາຍງານຂອງພໍ່ເຊີຍ ທີ່ໄດ້ລ້ຽງໝູລາດພື້ນເມືອງແບບທໍາມະຊາດ, ເຊິ່ງໃນເບື້ອງຕົ້ນປີ 2016 ໄດ້ມີແນວພັນໝູ 13 ໂຕ ໝູເຖິກ 1 ໂຕ ການເກືອແມ່ນໃຊ້ມັນຕົ້ນທີ່ຕົນເອງປູກປົນກັບຮໍາເລັກນ້ອຍ ເພື່ອຫຼຸດຕົ້ນທຶນໃນການໃຊ້ຈ່າຍ ແລະ ເຫັນວ່າໝູທີ່ລ້ຽງຕຸ້ຍພີ ແລະ ໃຫຍ່ໄວ ມາຮອດປີ 2017 ໝູກໍໄດ້ອອກລູກໂຕລະ 6-7 ໂຕ ປະມານ 80 ໂຕ, ຕໍ່ມາປີ 2018 ມີໝູນ້ອຍເກີດອອກມາປີລະ 2 ເທື່ອ ເກີດປະມານ 168 ໂຕ ລາວຂາຍໝູ 132 ໂຕ ໂຕລະ 200,000 ກີບ ໄດ້ເງິນປະມານ 26,400,000 ກີບ, ຮອດປີ 2020 ລາວກໍ່ຊື້ດິນອອກຕໍ່ ແລະລ້ຽງໝູຕາມເດີມຂາຍໝູໄດ້ເງິນ 27,600,000 ກີບ, ມາຮອດປີ 2021 ລາວໄດ້ຂາຍອີກ 30 ໂຕ ລາວຂາຍໝູໂຕລະ 300,000 ກີບ ໄດ້ເງິນ 9,000,000 ກີບ, ສະເລ່ຍໃນ 5 ປີ ມີລູກໝູເກີດໄດ້ 510 ໂຕ ສາມາດຂາຍ ແລະໄດ້ເງິນຈາກການຂາຍໝູລາດລວມ 79,250,000 ກີບ.

ຈາກນັ້ນ ທ່ານ ເຈົ້າແຂວງສາລະວັນ ກໍໄດ້ສະແດງຄວາມຍ້ອງຍໍຊົມເຊີຍ ຕໍ່ ພໍ່ເຊີຍ ແລະ ຄອບຄົວທີ່ມີແນວຄິດເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ໃນມີອາຊີບທີ່ບໍລິສຸດສັດຊື່ ແລະ ເກີດຈາກຄວາມດຸໝັ່ນດ້ວຍຕົນ ແລະຫວັງຢ່າງຍິ່ງວ່າຫຼາຍຄອບຄົວທີ່ໄດ້ເຫັນແລ້ວຈະນໍາໄປເປັນແບບຢ່າງເພື່ອນໍາພາຄອບຄົວຂອງຕົນຫຼຸດພົ້ນຈາກຄວາມທຸກຍາກເທື່ອລະກ້າວ ແລະ ໃນວັນດຽວກັນທ່ານເຈົ້າແຂວງກໍໄດ້ລົງຢ້ຽມເບິ່ງຈຸດເຊື່ອມຕໍ່ລະຫວ່າງເມືອງຕຸ້ມລານກັບເມືອງທ່າປາງທອງ ແຂວງສະຫວັນນະເຂດ ຕື່ມອີກ.