ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງໄຊສົມບູນ ຊຸດທີ I ໄດ້ດຳເນີນມາຮອດມື້ທີ2 ພາຍຫລັງທີ່ໄດ້ໄຂຂື້ນ ໃນວັນທີ 15 ມັງກອນ 2020 ທີ່ສະໂມສອນເມືອງອະນຸວົງ ພາຍໃຕ້ການເປັນປະທານຮ່ວມ ຂອງທ່ານ ບຸນສຸກ ຈອມວິສານ, ຮອງເລຂາພັກແຂວງ, ປະທານສະພາປະຊາຊົນແຂວງ, ມີທ່ານ ຄຳແດງ ສີລາວົງ, ຮອງປະທານສະພາປະຊາຊົນແຂວງ, ປະທານຄະນະກຳມະການເສດຖະກິດແຜນການ ແລະ ການເງິນ ແລະ ທ່ານ ພັນໂທ ວິໄຊທໍ່ ເພຍຫລວງຈົ່ງເສີ, ຮອງປະທານສະພາປະຊາຊົນແຂວງ, ປະທານຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ.

ໃນວາລະດຳເນີນກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງໄຊສົມບູນ ຊຸດທີ I ໃນມື້ທີ2 ນີ້ ຜູ່ແທນກອງປະຊຸມໄດ້ສືບຕໍ່ຜັດປ່ຽນກັນຂື້ນລາຍງານສະພາບການຈັດຕັ້ງປະຕິບັດໜ້າທີ່ວຽກງານໃນຂອບເຂດຄວາມຮັບຜິດຊອບຂອງຕົນຕໍ່ກອງປະຊຸມໄດ້ຮັບຊາບ ເປັນຕົ້ນ: ໄດ້ຮັບຟັງການລາຍງານຂອງອົງການໄອຍາການປະຊາຊົນແຂວງ ແລະ ສານປະຊາຊົນແຂວງ ຄຽງຄູ່ກັນນັ້ນ ສະມາຊິກສະພາປະຈຳເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ ໄດ້ຜັດປ່ຽນກັນປະກອບຄຳຄິດ-ຄຳເຫັນ ຕໍ່ບົດລາຍງານຂອງອົງການໄອຍາການປະຊາຊົນແຂວງ ແລະ ສານປະຊາຊົນແຂວງ ຢ່າງກົງໄປ-ກົງມາ ດ້ວຍບັນຍາກາດຄຶກຂຶມ ແລະ ສ້າງສັນ ບົນພື້ນຖານຄວາມເປັນເອກະພາບ ພ້ອມນີ້ ພະແນກການທີ່ກ່ຽວຂ້ອງ ກໍ່ໄດ້ມີການຊີ້ແຈງກ່ຽວກັບບັນດາໜ້າວຽກທີ່ຕົນຮັບຜິດຊອບ ຕໍ່ຄຳຊັກຖາມຂອງສະມາຊິກສະພາປະຊາຊົນ ທັງນີ້ ກໍເພື່ອພ້ອມກັນປຶກສາຫາລື ແລະ ວາງທິດທາງ ແຜນການເຄື່ອນໄຫວໃນຕໍ່ໜ້າ ໃຫ້ຮັດກຸມ ແລະ ມີປະສິດທິຜົນດີຂື້ນກວ່າເກົ່າ ພ້ອມດຽວກັນນີ້ ໃນວາລະມື້ທີ2 ຂອງກອງປະຊຸມ ຍັງໄດ້ຄົ້ນຄວ້າພິຈາລະນາຮັບຮອງເອົາ ນິຕິກຳທີ່ສຳຄັນຂອງແຂວງ ຈຳນວນ 01 ສະບັບຄື:

ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງ ແລະ ລະບຽບການບໍລິຫານແຂວງໄຊສົມບູນ ຕໍ່ຈາກນັ້ນກອງປະຊຸມ ຍັງໄດ້ມີການປະເມີນຜົນ ການຈັດຕັ້ງປະຕິບັດໜ້າທີ່ຂອງບຸກຄະລາກອນ ທີ່ດຳລົງຕຳແໜ່ງ ທີ່ສະພາປະຊາຊົນແຂວງ ເລືອກຕັ້ງ ແລະ ຮັບຮອງ ການແຕ່ງຕັ້ງ ກອງປະຊຸມຄັ້ງນີ້ ຈະໄດ້ດຳເນີນໄປຮອດວັນທີ 17 ມັງກອນ 2020 ກໍ່ຄືໃນມື້ອື່ນນີ້ ຈື່ງຈະສຳເລັດ.

MediaLaos xaysomboun
ພາບ-ຂ່າວ: ນາງ ຕູດ ຄຳພໍໃຈ