ກອງປະຊຸມຄົບຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ຂອງສະພາປະຊາຊົນແຂວງໄຊຍະບູລີ ຊຸດທີ I ໄດ້ໄຂຂຶ້ນຢ່າງເປັນທາງການ ໃນຕອນບ່າຍຂອງວັນທີ 21 ມັງກອນ 2020 ນີ້ຢູ່ທີ່ຫ້ອງປະຊຸມພະແນກກະສິກໍາ ແລະ ປ່າໄມ້ແຂວງໄຊຍະບູລີ. ໂດຍເປັນກຽດເຂົ້າຮ່ວມຂອງ ທ່ານ ຊຊ ບຸນທຽມ ນັນທະກອນ ກໍາມະການພັກແຂວງ, ຮອງປະທານສະພາປະຊາຊົນແຂວງ, ຜູ້ຊີ້ນໍາວຽກງານຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ, ມີຄະນະກໍາມະການ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ 11 ເມືອງ, ມີຫົວໜ້າ, ຮອງຫົວໜ້າພະແນກການ, ອົງການ, ກອງບັນຊາການ, ກົມກອງອ້ອມຂ້າງແຂວງ, ເມືອງ ແລະ ພະນັກງານວິຊາການຈາກສະພາປະຊາຊົນແຂວງເຂົ້າຮ່ວມ.

ທ່ານ ເພັກ ອ່ອນດາວົງ ປະທານຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ໄດ້ກ່າວເປີດກອງປະຊຸມຢ່າງເປັນທາງການ ເຊິ່ງທ່ານໄດ້ກ່າວວ່າ: ໂດຍປະຕິບັດຕາມພາລະບົດບາດ, ສິດ ແລະ ໜ້າທີ່ຂອງຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ທີ່ເປັນເສນາທິການໃຫ້ແກ່ສະພາປະຊາຊົນແຂວງ ແລະ ຄະນະປະຈໍາສະພາປະຊາຊົນແຂວງ ໃນການຈັດຕັ້ງປະຕິບັດວຽກງານ ຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ ໃຫ້ມີຄວາມເຂັ້ມງວດ, ຍຸຕິທໍາ ແລະ ໂປ່ງໃສ. ໃນກອງປະຊຸມຄົບຄະນະຄັ້ງນີ້ໄດ້ດໍາເນີນເປັນເທື່ອທີ 4 ຂອງຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບສະພາປະຊາຊົນແຂວງຊຸດທີ I. ບັນດາຜູ້ເຂົ້າຮ່ວມກອງປະຊຸມ ຈະໄດ້ສຸມໃສ່ຄົ້ນຄວ້າ, ປະກອບຄໍາຄິດຄໍາເຫັນຫຼາຍບັນຫາສໍາຄັນໃສ່ບົດຕ່າງໆຂອງຄະນະກໍາມະການເຊັ່ນ: ຮັບຟັງລາຍງານ ການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2019 ແລະ ແຜນການເຄື່ອນໄຫວວຽກງານປະຈໍາປີ 2020 ຂອງອົງການໄອຍະການປະຊາຊົນ ແລະ ສານປະຊາຊົນ, ຮັບຟັງການປະກອບຄໍາເຫັນ, ຊັກຖາມ ຂອງສະມາຊິກສະພາປະຊາຊົນແຂວງ ຕໍ່ການລາຍງານພາກສ່ວນທີ່ກ່ຽວຂ້ອງ, ຮັງຟັງການຕອບຄໍາຊັກຖາມ ຊີ້ແຈງຂອງບັນດາພະແນກການ, ອົງການທີ່ກ່ຽວຂ້ອງກັບຄະນະກໍາມະການ, ຮັບຟັງການຜ່ານຮ່າງບົດສະຫຼຸບການເຄື່ອນໄຫວວຽກງານປະຈໍາປີ 2019 ແລະ ແຜນການຈຸດສຸມປີ 2020 ຂອງຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ, ຮັບຟັງການປະກອບຄໍາເຫັນຂອງສະມາຊິກສະພາປະຊາຊົນແຂວງ ໃສ່ຮ່າງບົດສະຫຼຸບການເຄື່ອນໄຫວວຽກງານປະຈໍາປີ 2019 ແລະ ແຜນຈຸດສຸມປີ 2020 ຂອງຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ, ຜ່ານຮ່າງນິຕິກໍາຈໍານວນ 2 ສະບັບຄື: ຮ່າງຂໍ້ຕົກລົງ ວ່າດ້ວຍກອງທຶນສົ່ງເສີມກະສິກໍາຍືນຍົງ ແລະ ຮ່າງຂໍ້ຕົກລົງ ວ່າດ້ວຍການຄຸ້ມຄອງ ແລະ ພັດທະນາຊົນລະປະທານແຂວງໄຊຍະບູລີ, ຮັບຟັງການໂອ້ລົມແນະນໍາບາງບັນຫາ ຂອງຄະນະປະຈໍາສະພາປະຊາຊົນແຂວງ, ຮັບຟັງການຜ່ານຮ່າງມະຕິກອງປະຊຸມຄົບຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບປະຈໍາປີ 2019. ກອງປະຊຸມຈະໄດ້ດໍາເນີນເປັນເວລາ 2 ວັນ.

ຂ່າວ: ມະໄລວັນ.
Medialaos xayaboury