ກອງປະຊຸມເຊື່ອມຊຶມນິຕິກໍາ ກ່ຽວກັບການປະເມີນຜົນ ວຽກງານ 3 ສ້າງ ໄດ້ຈັດຂຶ້ນ ວັນທີ 21 ມັງກອນ 2020 ນີ້ຢູ່ທີ່ຫ້ອງປະຊຸມຫ້ອງວ່າການປົກຄອງ ແຂວງໄຊຍະບູລີ. ໂດຍໃຫ້ກຽດເຂົ້າຮ່ວມຂອງ ທ່ານ ຄໍາມູນ ວົງພົງໄຊ ຮອງລັດຖະມົນຕີກະຊວງພາຍໃນ, ທ່ານ ຍັນຍົງ ສີປະເສີດ ຮອງເລຂາພັກແຂວງ ຮອງເຈົ້າແຂວງໄຊຍະບູລີ, ມີບັນດາຫົວໜ້າກົມ, ຮອງກົມ ກະຊວງພາຍໃນ, ມີຫົວໜ້າ, ຮອງຫົວໜ້າພະແນກການ ອົງການ,ກົມກອງ,ບັນດາເຈົ້າເມືອງ,ຮອງເຈົ້າເມືອງ 11 ເມືອງ ພ້ອມດ້ວຍພະນັກງານຫຼັກແຫຼ່ງ ຂະແໜງພາຍໃນເຂົ້າຮ່ວມ.
ໃນພິທີທ່ານ ຍັນຍົງ ສີປະເສີດ ຮອງເລຂາພັກແຂວງ ຮອງເຈົ້າແຂວງໄຊຍະບູລີ ໄດ້ຍົກໃຫ້ເຫັນວ່າວຽກງານ 3 ສ້າງ ແມ່ນວຽກງານຍຸດທະສາດຍາວນານ ມີຄວາມສັບສົນ ແລະ ລະອຽດອ່ອນ ເຊິ່ງຈໍາເປັນຕ້ອງເຮັດຢ່າງມີແຜນການ, ມີບາດກ້າວຕໍ່ເນື່ອງ, ມີການຊີ້ນໍາຢ່າງໃກ້ຊິດ ແມ່ນຄວາມຮັບຜິດຊອບນັບແຕ່ຂັ້ນສູນກາງ ລົງຮອດທ້ອງຖິ່ນ ຮາກຖານສໍາລັບແຂວງໄຊຍະບູລີຂອງພວກເຮົາ ກໍ່ໄດ້ເອົາໃຈໃສ່ຄົ້ນຄວ້າ ແລະ ຜັນຂະຫຍາຍມາເປັນຄໍາສັ່ງແນະນໍາ ສະບັບເລກທີ 198/ຈຂ.ຊຍ, ລົງວັນທີ 29 ພະຈິກ 2016 ວ່າດ້ວຍການສືບຕໍ່ສ້າງແຂວງ ເປັນຫົວໜ່ວຍຍຸດທະສາດ, ສ້າງເມືອງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ,ໄດ້ຈັດຕັ້ງຄະນະຮັບຜິດຊອບ ຊີ້ນໍາວຽກງານ 3 ສ້າງ ຢູ່ແຕ່ລະຂະແໜງການ ຂັ້ນແຂວງ ແລະ ຂັ້ນເມືອງ ໂດຍວາງຄາດໝາຍ ໃນການສ້າງແຂວງເປັນຫົວໜ່ວຍຍຸດທະສາດ ໃຫ້ບັນລຸໃນປີ2020, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ໃຫ້ໄດ້ 5 – 7 ເມືອງ,ສ້າງບ້ານພັດທະນາໃຫ້ໄດ້ 2/3 ຂອງຈໍານວນບ້ານທັງໝົດ ໃນທົ່ວເມືອງ. ວາງຄາດໝາຍໃຫ້ເມືອງເຂັ້ມແຂງທາງດ້ານການເງິນຈໍານວນ 5 ເມືອງ, ນອກຈາກນັ້ນຍັງໄດ້ວາງ ຄາດໝາຍ ຈຸດສຸມພັດທະນາດ້ານຕ່າງໆ. ຜ່ານການຊີ້ນໍາ – ນໍາພາ ນັບແຕ່ມື້ສໍາເລັດການເຮັດທົດລອງ ແລະ ຫັນວຽກງານ 3 ສ້າງ ເຂົ້າສູ່ລວງເລິກ ຕິດພັນກັບຂະບວນແຂ່ງຂັນຮັກຊາດ ແລະ ພັດທະນາ ຊຸມປີ 2015 ເປັນຕົ້ນມາ ແຂວງໄຊຍະບູລີ ສາມາດບັນລຸຜົນສໍາເລັດ, ມີປັດໃຈໃໝ່ເກີດຂຶ້ນຫຼາຍດ້ານ, ເກີດມີຕົວແບບ ມີບາງດ້ານກໍ່ກາຍເປັນບົດຮຽນໃຫ້ກັບແຂວງອື່ນ.

ການເຮັດວຽກງານ 3 ສ້າງນີ້ບໍ່ແມ່ນງ່າຍ( ເວົ້າງ່າຍ- ແຕ່ເຮັດຍາກ) ໄປໃສກໍ່ພາກັນເວົ້າວ່າວຽກ 3 ສ້າງ. ສະນັ້ນໃຫ້ເຂົ້າໃຈວ່າ 3 ສ້າງແມ່ນ ກວມເອົາທັງແຂວງ, ເມືອງ ແລະ ບ້ານ, ພົວພັນເຖິງຫຼາຍດ້ານ ແລະ ເປັນຄວາມຮັບຜິດຊອບຂອງທຸກຂະແໜງການ ຖ້າບໍ່ມີຄວາມຕັດສິນໃຈສູງ ກໍ່ບຸກທະລຸບໍ່ໄດ້. ຄຽງຄູ່ກັນນີ້ ການປະເມີນວຽກ 3 ສ້າງໃຫ້ສືບຕໍ່ຈັດຕັ້ງປະຕິບັດ ຄໍາສັ່ງເລກທີ 03 ກົມການເມືອງສູນກາງພັກ ວ່າດ້ວຍການສ້າງບ້ານເປັນຫົວໜ່ວຍພັດທະນາ ສ້າງບ້ານໃຫ່ຍໃຫ້ກາຍເປັນຕົວເມືອງນ້ອຍໃນຊົນນະບົດ ໂດຍສະເພາະບັນດາເມືອງຕ້ອງໄດ້ກວດກາຄືນ ບັນດາບ້ານໃຫ່ຍ,ບ້ານພັດທະນາຕ່າງໆ ຂອງເມືອງຕົນເອງ ເພື່ອຈະໄດ້ສຸມໃສ່ສ້າງເປັນຈຸດສຸມຕົວແບບໃນການສ້າງເປັນຫົວໜ່ວຍພັດທະນາ ແລະ ກາຍເປັນຕົວເມືອງນ້ອຍໃນຊົນນະບົດ ໃນນີ້ຕ້ອງໄດ້ກວດຄືນ 7 ກິດຈະກໍາ ພື້ນຖານຂະໜາດນ້ອຍ ແຜນການພັດທະນາຂອງບ້ານ, ຄາດຄະເນໃນມະຕິ VI ສ້າງບ້ານພັດທະນາໃຫ້ໄດ້ 80% ຂອງບ້ານທັງໝົດ ແລະ ສ້າງເປັນຕົວເມືອງນ້ອຍໃຫ້ໄດ້ 18 ແຫ່ງ, ປະຈຸບັນພວກເຮົາປະກາດໄດ້ແລ້ວ 7ແຫ່ງ,ກອງປະຊຸມໃຫ່ຍຄັ້ງທີ X ຂອງພັກໄດ້ກໍານົດວິໄສທັດຮອດປີ 2030 ໄດ້ວາງຄໍາຂວັນຍຸດທະສາດຂອງການພັດທະນາແມ່ນ ( ສູ້ຊົນ ພັດທະນາປະເທດຊາດໃຫ້ຫຼຸດພົ້ນອອກຈາກສະຖານະພາບດ້ອຍພັດທະນາ ກ້າວໄປສູ່ ປະເທດກໍາລັງພັດທະນາ ທີ່ມີລາຍຮັບປານກາງ ສູງຕາມທິດການພັດທະນາສີຂຽວ ແລະ ຍືນຍົງ) ອັນນັ້ນແມ່ນອຸດົມການ ແລະ ຈຸດໝາຍແຫ່ງການສ້າງສາປະເທດຊາດ ແລະ ສັງຄົມຂອງພວກເຮົາທີ່ຈະຕ້ອງສູ້ຊົນກ້າວໄປເຖິງຮອດປະຈຸບັນ ຂໍ້ມູນການສໍາຫຼວດປະເມີນຜົນຂອງອົງການສະຫະປະຊາຊາດ ຄັ້ງທໍາອິດຫວ່າງປີແລ້ວນີ້ ໃນຈໍານວນ 3 ຕົວຊີ້ວັດໃຫ່ຍ ເຫັນວ່າລາວເຮົາສາມາດບັນລຸ ແລ້ວ 2 ຕົວຊີ້ວັດ ຄືລາຍຮັບແຫ່ງຊາດ ສະຫະປະຊາຊາດ ຕັ້ງໄວ້ 1.230 ໂດລາ ປະຕິບັດໄດ້ 1996 ໂດລາ, ດັດຊະນີຊັບສິນມະນຸດ ສະຫະປະຊາຊາດຕັ້ງ 66% ສປປລາວໄດ້ 72,8%, ຍັງອີກຕົວຊີ້ວັດໜຶ່ງ ກໍ່ຄືອັດຕາຄວາມບອບບາງທາງດ້ານເສດຖະກິດ ( EVI) ຕ້ອງຕໍ່າກວ່າ 32 ແຕ່ ສປປລາວຢູ່ທີ່ 33,7 ສະນັ້ນໃນປີ 2021 ສະຫະປະຊາຊາດຈະມາປະເມີນຕື່ມອີກ.

ຂ່າວ: ບຸນທີ.
Medialaos xayaboury