ໃນ​ໂອ​ກາດ​ເຄື່ອນ​ໄຫວ​ຢ້ຽມຢາມ ແລະ ເຮັດ​ວຽກ​ຢູ່​ແຂວງຄຳ​ມ່ວນ ເມື່ອ​ວັນ​ທີ 16/ 1/2020 ທ່ານ ອາ​ລຸນ​ໄຊ ສູນ​ນະ​ລ​າດ   ກຳມະ​ການ​ສຳ​ຮອງສູນ​ກາງ​ພັກ ເລ​ຂາ​ຄະ​ນະ​ບໍ​ລິ​ຫານ​ງານ​ສູນ ກາງ​ຊາວ​ໜຸ່ມ ປ​ປ ລາວ ໄດ້​ເນັ້ນໃຫ້​ຄະ​ນະບໍ​ລິ​ຫານ​ງານ​ຊາວ​ໜຸ່ມ​ແຂວງ​ຄຳ​ມ່ວນ ຈົ່ງສຸມ​ ໃສ່​ປະ​ຕິ​ບັດ 4 ວຽກ​ໃຫຍ່​ໃນ​ປີ 2020 ໃຫ້​ມີ​ຜົນ​ສຳ​ເລັດ​ ຄື​:

  • ໜຶ່ງ, ໃຫ້​ເອົາ​ໃຈ​ໃສ່​ຮັດ​ແໜ້ນ​ຄວາມ​ສາ​ມັກ​ຄີ​ເປັນ​ເອ​ກະ​ພາບ​ພາຍ​ໃນ​ໃຫ້​ແໜ້ນ​ແຟ້ນ.
  • ສອງ, ປ່ຽນ ແປງ​ໃໝ່​ວຽກ​ງານ​ໂຄ​ສະ​ນາ​ອົບ​ຮົມ​ ປູກ​ຈິດ​ສຳ​ນຶກ​ໃຫ້​ຄົນ​ໜຸ່ມ​ໃຫ້ ເໝາະ​ສົມ​ແທດ​ເຖິງ​ຕົວ​ຈິງ, ມີຜົນ​ງານ​ເດັ່ນ​ແທ້, ທ​ັງ​ຖື​ຄຸ​ນ​ນະ​ພາບ​ເປັນ​ກົກ ແລະ ມີ​ສິ​ລະ​ປະ​ໃນ​ການ​ສຶກ​ສາ​ອົບ​ຮົມ​ຕິດ​ພັນກັບ​ມູນ​ເຊື້ອ​ຂອງ​ພັກ, ຂອງ​ຊາດ ຂອງ​ຊາວ​ໜຸ່ມ, ຕິດ​ພັນ​ກັບ​ສິດ, ໜ້າ​ທີ່ ຜົນ​ປະ​ໂຫຍດ​ຂອງ​ຊາວໜຸ່ມ ທ່ານເລ​ຂາ​ສູນ​ກາງ​ຊາວ​ໜຸ່ມ​ກ່າວ​ວ່າ: ປ່ຽນ​ແປງ​ໃໝ່​ວຽກ​ງ​ານ​ອົບ​ຮົມ​ຕ້ອງ​ກ້າ​ຍົກ​ໃຫ້​ເຫັນ​ວຽກ​ດີ​ຄົນ​ເດັ່ນ: ເລື່ອງ​ຈິງ​ຄົນ​ແທ້​ ແລະ ການ​ອົບ​ຮົມ​ຕ້ອງ​ມີ​ຫຼາຍ​ຮູບຫຼາຍ​ສີ​ມີ​ການ​ປາ​ຖະ​ກະ​ຖາ ມີ​ການສຳ​ມະ​ນາ​ໂດຍ​ມີ​ການ​ແລກ​ປ່ຽນ​ຄຳ​ເຫັນ​ຊຶ່ງ​ກັນ ແລະ ກັນ.
  • ສາມ, ເອົາ​ໃຈ​ໃສ່​ຕື່ມ​ການ​ບູ​ລະ​ນະ​ລະ ບົບ​ການ​ຈັດ​ຕັ້ງ​ຊາວ​ໜຸ່ມ​ໃຫ້​ກາຍ​ເປັນ​ໃຈ​ກາງ​ທີ່​ໜັກ​ແໜ້ນ ເຂັ້ມ​ແຂງ​ຂອງ​ຄົນ​ໜຸ່ມ, ໃນ​ນັ້ນ ຖື​ສຳ​ຄັນ​ການ​ປັບ​ປຸງ​ແບບ​ແຜນ ນຳ​ພາ, ແບບ​ແຜນ​ວິ​ທີ​ເຮັດ​ວຽກ ຕ້ອງວິ​ທະ​ຍາ​ສາດ, ມີ​ການ​ປະ​ສານ​ງານ​ກັບ​ທຸກ​ພາກ​ສ່ວນ ແລະ ທຸກກ​ານ​ເຄື່ອນ​ໄຫວ​ວຽກ​ ງານ​ຂອງ​ຊາວ​ໜຸ່ມ​ຕ້ອງ​ຕິດ​ພັນ​ກັບ​ແຕ່​ລະ​ວຽກ​ເຫດ​ການ​ສຳ​ຄັນ​ຂອງ​ພັກ, ລັດ ແລະ ຂອງ​ຊາວ​ໜຸ່ມ.
  • ສີ່, ສ້າງ​ຂະ​ບວນ​ການ​ຕ້ອນ​ຮັບ​ກອງ​ປະ​ຊຸມ​ໃຫຍ່​​ຂອງ​ຊາວ​ໜຸ່ມ​ຕິດ​ພັນ​ກັບ​ກອງ​ປະ​ຊຸມ​ໃຫຍ່​ຂອງ​ພັກ ແລ​ະ ຂອງ​ຜູ້​ແທນ​ຊາວ​ໜຸ່ມ​ທົ່ວ​ປະ​ເທດ. 

ໃນ​ໂອ​ກາດນີ້ ເລ​ຂາ​ສູນກາງ​ຊາວ​ໜຸ່ມ​ຍັງ​ໄດ້​ຮັບ​ຟັງ​ລາຍ ​ງານສະ​ພາບ​ການ​ຈັດ​ຕັ້ງປະ​ຕິ​ບັດ​ວຽກ​ງານ​ຊາວ​ໜຸ່ມ​ຂອງ ແຂວງຄຳ​ມ່ວນ​ໄລ​ຍະ 1 ປີ ຜ່ານ​ມາ ຈາ​ກທ່ານ ນາງ ວົງ​ພະ​ຈັນ ສີ​ບຸນ​ເຮືອງ ກຳ​ມະ​ການ​ສູນ​ກາງ​ຊາວ​ໜຸ່ມ ປ​ປ ລາວ ເລ​ຂາ​ຄະ​ນະ​ບໍ​ລິ​ຫານ​ງານຊາວ​ໜຸ່ມ​ແຂວງຄຳ​ມ່ວນ ຊຶ່ງ​ທ່ານ​ໄດ້​ຍົກໃຫ້ເຫັນ​ວ່າ​ໜຶ່ງ​ໃນ​ຜົນ​ງານ​ເດັ່ນ​ຂອງ​ຊາວ​ໜຸ່ມ​ແຂວງ​ຄຳ​ມ່ວນ ແມ່ນ​ວຽກ​ງານ​ຂອງ​ໜ່ວຍ​ງານ​ອາ​ສາ​ກູ້​ໄພ​ແຂວງ​ຄຳ​ມ່ວນ ໄດ້​ປະ​ກອບ​ສ່ວນ​ຊ່ວຍ​ສັງ​ຄົມ ໂດຍບໍ່​ຫວັງ​ຜົນ​ຕອບ​ແທນ​ຊ່ວຍຜູ້​ເກີດ​ອຸ​ບັດ​ເຫດ​ຕາມ​ທ້ອງ​ຖະ​ໜົນ, ເຫດ​ສຸກ​ເສີນ, ໂດຍ​ສະ​ເພາະ​ແມ່ນ​ຂະ​ບວນ​ການ​ຊ່ວຍເຫຼືອ​ຜູ້​ໄດ້​ຮັບ​ຜົນ​ກະ​ທົບ ​ຈ​າກໄພ​ນ້ຳ​ຖ້ວມ​ເມື່ອ​ປີ​ຜ່ານ​ມາ​ຮ່ວມ​ກັບ​ພາກ​ສ່ວນ​ອື່ນໆ​ຂອງ​ສັງ​ຄົມ​ໄດ້​ເປັນ​ຢ່າງ​ດີ ຕອນ​ທ້າຍ​ຂອງ​ການ​ພົບ​ປະ​ເລ​ຂາ​ສູນ​ກາງ​ຊາວ​ໜຸ່ມ ປ​ປ ລາວ ຍັງ​ໄດ້​ມອບ​ເງິນ​ສົດ ແລະ ວັດ​ຖຸປັດ​ໄຈ​ຈຳ​ນວນ​ໜຶ່ງ​ໃຫ້​ແກ່​ໜ່ວຍ​ງານ​ອາ​ສາ​ກູ້​ໄພ​ແຂວງ​ຄຳ​ມ່ວນ ເພື່ອ​ປະ​ກອບ​ສ່ວນ​ຊຸກ​ຍູ້​ເປັນ​ກຳ​ລັງ​ໃຈ​ໃຫ້​ແກ່​ຊາວ​ໜຸ່ມ​ພະ​ນັກງານ​ທີ່​ມີ​ຜົນ​ງານ​ໃນ​ວຽກ​ດັ່ງ​ກ່າວ.

Medialaos