ໃນຕອນເຊົ້າຂອງວັນທີ່ 23 ສິງຫາ 2019ທີ່ຜ່ານມານີ້ ຢູ່ທີ່ສະໂມສອນຂອງເມືອງຈຳພອນ ໄດ້ຈັດພິທີປະກາດການຈັດຕັ້ງການນຳຂອງເມືອງ ໂດຍການເປັນກຽດເຂົາຮ່ວມເປັນປະທານ ຂອງ ທ່ານ ປອ ຄຳເຜີຍ ຜັນທະຈອນ ຮອງເລຂາພັກແຂວງ ປະທານສະພາປະຊາຊົນແຂວງສະຫວັນນະເຂດ ມີບັນດາຄະນະການນຳພັກ – ລັດຂອງເມືອງ, ພາກສ່ວນກ່ຽວຂ້ອງ ແລະ ແຂກຖືກເຊີນເຂົ້າຮ່ວມ.


ໃນພິທີ ໄດ້ມີການຜ່ານຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ວ່າດ້ວຍການແຕ່ງຕັ້ງ ທ່ານ ຄໍາລຸຍ ຍາດຕິວົງ ກຳມະການພັກແຂວງ ຈາກຫົວໜ້າພະແນກກະສິກຳ ແລະ ປ່າໄມ້ແຂວງ ມາເປັນເຈົ້າເມືອງ ເມືອງຈຳພອນ ຈາກນັ້ນໃນພິທີກໍໄດ້ມີການຜ່ານຮ່າງບົດບັນທຶກການມອບຮັບວຽກລະຫວ່າງ ເຈົາເມືອງຈຳພອນຜູ້ເກົ່າ ແລະ ຜູ້ທີ່ຈະມາຮັບໜ້າທີ່ເປັນເຈົ້າເມືອງຜູ້ໃໝ່ ຕໍ່ຈາກນັນກໍໄດ້ມີການເຊັນບົດບັນທຶກການມອບຮັບວຽກລະຫວ່າງ ທ່ານ ສຸທິ ຜິວສຸລິຍະມາດ ເຈົ້າເມືອງຈຳພອນຜູ້ເກົ່າ ແລະ ທ່ານ ຄຳລຸຍ ຍາດຕິວົງ ເຈົ້າເມືອງຈຳພອນຜູ້ໃໝ່ ຕໍ່ໜ້າປະທານ ແລະ ແຂກທີ່ໄດ້ເຂົາຮ່ວມເປັນສັກຂີພິຍານໃນການມອບ – ຮັບນ້າທີໃນຄັ້ງນີ້.
ໃນຕອນທ້າຍພິທີ ທ່ານ ປອ ຄຳເຜີຍ ຜັນທະຈອນ ຮອງເລຂາພັກແຂວງ ປະທານສະພາປະຊາຊົນແຂວງ ກໍໄດ້ເປັນກຽດຂື້ນໂອ້ລົມ ເຊິ່ງມີເນື້ອໃນຈິດໃຈສະແດງຄວາມຍິນດີ ແລະ ໃຫ້ຄຳແນະນຳຕໍ່ກັບ ທ່ານ ຄຳລຸຍ ຍາດຕິວົງ ກຳມະການພັກແຂວງ ເຈົ້າເມືອງຈຳພອນຜູ້ໃໝ່ເພື່ອເປັນແນວທາງໃນການປະຕິບັດໜ້າທີ່ວຽກງານໃນຕໍ່ໜ້າ.