ຫຼັງຈາກທີ່ໄດ້ດໍາເນີນມາເປັນເວລາ 2 ວັນເຕັມ ກອງປະຊຸມໃຫຍ່ ຄັ້ງທີ V ຂອງຜູ້ແທນອົງຄະນະພັກ ເມືອງ ພູວົງ, ແຂວງ ອັດຕະປື ກໍ່ໄດ້ສໍາເລັດລົງໃນວັນທີ 30 ມັງກອນ 2020 ໂດຍມີຜູ້ແທນສົມບູນທີ່ມາຈາກຄະນະພັກຮາກຖານ ແລະ ໜ່ວຍພັກທົ່ວເມືອງ 117 ສະຫາຍ, ທີ່ເປັນຕົວແທນໃຫ້ແກ່ສະມາຊິກພັກທັງໝົດທົ່ວເມືອງພູວົງ 910 ສະຫາຍ.

ຕະຫລອດວາລະດຳເນີນກອງປະຊຸມ ຜູ້ແທນທີ່ມີໜ້າເຂົ້າຮ່ວມ ຕ່າງກໍ່ໄດ້ພ້ອມກັນຄົ້ນຄວ້າຕີລາຄາຄືນການຈັດຕັ້ງປະຕິບັດແນວທາງປຽ່ນແປງໃໝ່ຮອບດ້ານທີ່ມີຫລັກການຂອງພັກກໍ່ຄືການຈັດຕັ້ງປະຕິບັດເນື້ອໃນຈິດໃຈມະຕິກອງປະຊຸມໃຫຍ່ຂອງອົງຄະນະພັກເມືອງ, ເສີມຂະຫຍາຍດ້ານຕັ້ງໜ້າ, ຊອກຫາວິທີແກ້ໄຂຂໍ້ຂາດຕົກບົກຜ່ອງ ແລະ ບົດຮຽນທີ່ຖອດຖອນໄດ້ ເພື່ອພ້ອມກັນປັບປຸງແກ້ໄຂ ແລະ ກຳນົດທິດທາງ 5 ປີຕໍ່ຫນ້າ, ພ້ອມນີ້ກອງປະຊຸມຍັງໄດ້ເປັນເອກະສັນກັນຮັບຮອງເອົາຮ່າງລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ບົດສຳຫຼວດການນຳພາລວມຂອງຄະນະພັກຊຸດເກົ່າ ແລະ ໄດ້ດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເຊິ່ງມີຜູ້ຮັບສະໝັກທັງໝົດ 29 ສະຫາຍ, ຍິງ 8 ສະຫາຍ, ໃນນີ້ເລືອກເອົາ 25 ສະຫາຍ, ກອງປະຊຸມປະຖົມມະລຶກໄດ້ຕົກລົງເລືອກເອົາ ສະຫາຍ ສຸລິຈັນ ໂຊກຄຳຈັນ ເປັນເລຂາຄະນະບໍລິຫານງານພັກເມືອງຄົນໃໝ່, ສະຫາຍ ຄຳໃບ ແກ້ວມະນີ ເປັນຮອງເລຂາ ແລະ ເປັນປະທານຄະນະກວດກາພັກເມືອງ, ສະຫາຍ ສີທົນ ຊາວພູວົງ ຮອງເລຂາ, ສະຫາຍ ນາງ ພົງສິດ ໄຊສົງຄາມ, ສະຫາຍ ພັທ ຄຳກ້ອນ ດວງສົມປານ, ສະຫາຍ ຄຳເກີດ ບຸດດາວັນ ແລະ ສະຫາຍ ຄຳຊຽງ ພິມມະຈັນ ເປັນຄະນະປະຈຳ ແລະ ອີກ 18 ສະຫາຍ ເປັນກຳມະການພັກເມືອງ.

ກອງປະຊຸມຍັງໄດ້ຮັບຟັງການໂອ້ລົມຂອງ ສະຫາຍ ເລັດ ໄຊຍະພອນ ເລຂາຄະນະບໍລິຫານງານພັກແຂວງ ເຈົ້າແຂວງ ໂດຍສະຫາຍໄດ້ເນັ້ນໜັກໃຫ້ຄະນະບໍລິຫານງານພັກເມືອງຊຸດໃໝ່ເອົາໃຈໃສ່ເພີ່ມທະວີໃນການສຶກສາອົບຮົມ ການເມືອງ-ແນວຄິດ, ນໍາເອົາແນວທາງ, ມະຕິ, ຄໍາສັ່ງຂອງພັກ, ລະບຽບກົດໝາຍຂອງລັດ ເຜີຍແຜ່ເຊື່່ອມຊືມ ໃຫ້ແກ່ຖັນແຖວພະນັກງານ-ສະມາຊິກພັກ ແລະ ປະຊາຊົນບັນດາເຜົ່າຢ່າງທົ່ວເຖິງ, ເສີມຂະຫຍາຍຄວາມສາມະຄີເປັນປຶກແຜ່ນຂອງປະຊາຊົນ, ຊັ້ນຄົນບັນດາເຜົ່າ, ເສີມຂະຫຍາຍຈິດໃຈເປັນເຈົ້າຕົນເອງ ເພິ່ງຕົນເອງ ສ້າງຄວາມຮັ່ງມີເຂັ້ມແຂງດ້ວຍຕົນເອງ ໃຫ້ເປັນຮູບປະທຳຫຼາຍຂຶ້ນ, ຕັ້ງໜ້າແກ້ໄຂບັນດາປະກົດການຫຍໍ້ທໍ້ທີ່ເກີດຂື້ນ ໃນຖັນແຖວພະນັກງານ, ສະມາຊິກພັກ ແລະ ໃນໝູ່ປະຊາຊົນເປັນຕົ້ນ ແມ່ນບັນຫາປະກົດການຫຍໍ້ທໍ້ຂອງສັງຄົມ ແລະ ອື່ນໆ ທີ່ຂັດກັບລະບຽບກົດໝາຍ, ນອກຈາກນັ້ນ, ສະຫາຍກໍ່ຊີ້ທິດເຍືອງທາງໃຫ້ຄະນະບໍລິຫານງານພັກເມືອງຊຸດໃໝ່ (ຊຸດທີ V) ນຳໄປຈັດຕັ້ງປະຕິບັດ ແລະ ເຜີຍແຜ່ມະຕິຂອງກອງປະຊຸມໃຫຍ່ຄັ້ງນີ້ ໃຫ້ເປັນແຜນງານ-ໂຄງການລະອຽດ, ໃຫ້ມີຜົນສຳເລັດຕາມລະດັບຄາດໝາຍທີ່ວາງໄວ້.

ໂດຍ: ມາລາທິບ
ມີເດຍລາວ ອັດຕະປື