ທ່ານ ອຸດົມສຸກ ບຸດສວນທຽນ ສະມາຊິກສະພາປະຊາຊົນແຂວງ ປະທານສະພາປະຈໍາເຂດ ເມືອງກະລຶມ ແຂວງເຊກອງ ໄດ້ໃຫ້ສໍາພາດວ່າ: ຜ່ານການຜັນຂະຫຍາຍມະຕິກອງປະຊຸມສະໄຫມສາມັນເທື່ອທີ7 ຂອງສະພາແຫ່ງຊາດຊຸດທີ8 ແລະກອງປະຊຸມສະໄຫມສາມັນເທື່ອທີ7 ຂອງສະພາປະຊາຊົນແຂວງ ຊຸດທີ1 ໂດຍເມືອງຂອງພວກເຮົາໄດ້ນໍາເອົາບັນດາກົດຫມາຍທີ່ສະພາແຫ່ງຊາດໄດ້ປັບປຸງ ແລະສ້າງໃຫມ່ ມາເຜີຍແຜ່ ຜ່ານໂທລະໂຄ່ງຂອງເມືອງ ທຸກໆວັນ ຊຶ່ງໄດ້ເຮັດໃຫ້ປະຊາຊົນບັນດາເຜົ່າ ໄດ້ຮັບຮູ້ ແລະເຂົ້າໃຈດ້ານກົດຫມາຍຫລາຍຂຶ້ນ.
ຊຶ່ງຜ່ານການລົງພົບປະພໍ່ແມ່ປະຊາຊົນພາຍໃນເມືອງ ສາມາດສັງລວມບັນດາຄໍາສະເຫນີຂອງປະຊາຊົນ ສ່ວນຫລາຍແມ່ນບັນຫາພື້ນຖານໂຄງລ່າງ ເຊັ່ນ: ສະເຫນີໃຫ້ມີການກໍ່ສ້າງເສັ້ນທາງປູຢາງ ແຕ່ ບ້ານໂພນ ເມືອງລະມາມ ຫາ ເມືອງກະກຶມ ແລະແຕ່ເມືອງກະລຶມ ຫາ ຊາຍແດນ ສສ ຫວຽດນາມ, ກໍ່ສ້າງເສັ້ນທາງປູຫີນ ເຂົ້າຫາບັນດາບ້ານໃນທົ່ວເມືອງ; ຕິດຕັ້ງຕາຂ່າຍໄຟຟ້າ, ເຄືອຂ່າຍໂທລະສັບ ຊຶ່ງມີຫລາຍບ້ານບໍ່ທັນເຂົ້າເຖິງ; ດຶງດູດນັກລົງທຶນທັງພາຍໃນ ແລະຕ່າງປະເທດ ເພື່ອເຂົ້າມາລົງທຶນສ້າງຕັ້ງບໍລິສັດໃດຫນຶ່ງ ເພື່ອເຮັດໃຫ້ປະຊາຊົນສາມາດຜະລິດເປັນສິນຄ້າສົ່ງອອກ ທັງນີ້ເພື່ອແກ້ໄຂຊີວິດການເປັນຢູ່ໃຫ້ດີຂຶ້ນ. ທ່ານ ອຸດົມສຸກ ບຸດສວນທຽນ ຍັງໃຫ້ຮູ້ຕື່ມວ່າ ຕໍ່ກັບຄໍາສະເຫນີດັ່ງກ່າວ ພວກເຮົາໄດ້ຊອກວິທີທາງແກ້ໄຂຢ່າງຮີບດ່ວນ ໂດຍນໍາເອົາຄໍາສະເຫນີຂອງປະຊາຊົນ ລາຍງານຕໍ່ກອງປະຊຸມສະໄຫມສາມັນ ຂອງສະພາປະຊາຊົນແຂວງໃນແຕ່ລະຄັ້ງ ເພື່ອຊຸກຍູ້ຂະແຫນງການທີ່ກ່ຽວຂ້ອງ ລົງແກ້ໄຂຢ່າງຮີບດ່ວນ, ສໍາລັບຄໍາສະເຫນີຂອງປະຊາຊົນ ກ່ຽວກັບບັນຫາພື້ນຖານໂຄງລ່າງ ແມ່ນທາງເມືອງເຮົາໄດ້ທະລຸເສັ້ນທາງເສັ້ນທາງຊົ່ວຄາວກ່ອນ, ແຕ່ເສັ້ນທາງດິນແດງປູຫີນ ແລະປູຢາງ ແມ່ນພວກເຮົາສືບຕໍ່ຂຽນບົດສະເຫນີໂຄງການຫາລັດຖະບານຢ່າງຕໍ່ເນື່ອງ, ພາຍຫລັງໄດ້ຮັບຄໍາສະເຫນີຈາກປະຊາຊົນແຕ່ລະບັນຫາມີຄວາມສໍາຄັນ ແລະຈໍາເປັນທີ່ສຸດ ຊຶ່ງໄດ້ຈັດກອງປະຊຸມເພື່ອປຶກສາຫາລືຢູ່ໃນຄະນະນໍຂັ້ນເມືອງ ແລ້ວຮິບໂຮມບັນດາຂໍ້ມູນດັ່ງກ່າວ ຊຸກຍູ້ບັນດາຂະແຫນງການທີ່ກ່ຽວຂ້ອງ ສືບຕໍ່ຕິດຕາມ ກວດກາ ແລະແກ້ໄຂໃຫ້ເປັນຮີບປະທໍາ, ຖ້າຫາກວຽກງານທີ່ເມືອງບໍ່ສາມາດແກ້ໄຂໄດ້ ແມ່ນໄດ້ນໍາສະເຫນີຫາຂັ້ນເທິງ ຊ່ວຍພິຈາລະນາແກ້ໄຂ.
ສໍາລັບທິດທາງແຜນການໃນຕໍ່ຫນ້າ ຈະໄດ້ສືບຕໍ່ລົງຮາກຖານໃກ້ຊິດ ກັບປະຊາຊົນເປັນປະຈໍາ, ເກັບກຳບັນດາຄໍາສະເຫນີຂອງປະຊາຊົນ ເພື່ອເປັນບ່ອນອີງໃນການວາງແຜນວຽກງານຂອງຄະນະບໍລິຫານງານພັກເມືອງ ເຊິ່ງໄດ້ຕິດພັນກັບການພັດທະນາຊົນນະບົດ ແກ້ໄຂຄວາມທຸກຍາກຂອງປະຊາຊົນ, ຊຸກຍູ້ການຜະລິດກະສິກຳຂອງປະຊາຊົນ ໂດຍການສະຫນອງວັດຖຸອຸປະກອນທີ່ຈໍາເປັນ ແລະພະນັກງານວິຊາການລົງຊີ້ນໍາວິທີການຜະລິດ ໃຫ້ແກ່ປະຊາຊົນເປັນປົກກະຕິ, ຄໍາສະເຫນີຂອງປະຊາຊົນແຕ່ລະຄັ້ງ ຖືເປັນວຽກບູລິມະສິດ ທີ່ສໍາຄັນໃນການພັດທະນາເສດຖະກິດ-ສັງຄົມຂອງເມືອງ, ສືບຕໍ່ບັນດາຂະແຫນງການຕ່າງໆທີ່ຕິດພັນກັບວຽກງານພັດທະນາຊົນນະບົດ ລົງຮາກຖານ ໃກ້ຊິດກັບປະຊາຊົນ ແລະແກ້ໄຂວິທີການ-ການດຳລົງຊີວິດຂອງປະຊາຊົນ ເພື່ອເຮັດໃຫ້ປະຊາຊົນຫລຸດພົ້ນຈາກຄວາມທຸກຍາກເທື່ອລະກ້າວ.

ຂ່າວ: ພຸດທະສອນ
Medialaos sekong ຂ່າວເຊກອງ