ຕອນເຊົ້າ ວັນທີ 07 ກຸມພາ 2020 ນີ້ ຢູ່ທີ່ຄ້າຍຄຸມຂັງ-ດັດສ້າງ ປກສ ແຂວງ ບໍລິຄໍາໄຊ ໄດ້ຈັດພິທີປະກາດອະໄພຍະໂທດ ແລະ ຜ່ອນໂທດ ໃຫ້ນັກໂທດຜູ້ທີ່ມີມາດຖານເງື່ອນໄຂຄົບຖ້ວນຕາມກົດລະບຽບຂອງຄ້າຍຄຸມຂັງ-ດັດສ້າງ ເນື່ອງໃນໂອກາດວັນຊາດ ທີ 02 ທັນວາ ຄົບຮອບ 44 ປີ, ໂດຍການໃຫ້ກຽດເຂົ້າຮ່ວມຂອງທ່ານ ບຸນມາ ບຸຈະເລີນ ຮອງເຈົ້າແຂວງ ບໍລິຄໍາໄຊ.

ພາຍຫຼັງ ຜ່ານບົດສະຫຼຸບ ການຈັດຕັ້ງປະຕິບັດວຽກງານການອະໄພຍະໂທດ-ຫຼຸດຜ່ອນໂທດໃຫ້ແກ່ນັກໂທດແລ້ວ, ທ່ານ ບຸນຜັນ ທໍາມະວົງ ຮອງຫົວໜ້າອົງການໄອຍະການປະຊາຊົນ ແຂວງ ກໍ່ໄດ້ຜ່ານລັດຖະດໍາລັດຂອງປະທານປະເທດແຫ່ງ ສປປ ລາວ ສະບັບເລກທີ 031/ປປທ, ລົງວັນທີ 10 ມັງກອນ 2020 ວ່າດ້ວຍການໃຫ້ອະໄພຍະໂທດ-ຫຼຸດຜ່ອນໂທດ ແກ່ນັກໂທດຜູ້ທີ່ມີຄວາມກ້າວໜ້າໃນຂອບເຂດທົ່ວປະເທດ ເນື່ອງໃນໂອກາດ ວັນຊາດ ທີ 02 ທັນວາ 2019 ຄົບຮອບ 44 ປີ ເຊິ່ງມາດຖານເງື່ອນໄຂຂອງຜູ້ທີ່ຈະໄດ້ຮັບການຜ່ອນໂທດ ແມ່ນຈະຕ້ອງເປັນບຸກຄົນທີ່ມີຄວາມກິນແໜງແຄງໃຈຕໍ່ການກະທໍາຜິດຂອງຕົນ, ມີຄວາມບຸກບືນ, ຫ້າວຫັນໃນການປັບປຸງຕົນເອງ, ມີຜົນງານທີ່ດີເດັ່ນໃນຂະບວນການອອກແຮງງານ ແລະ ຕັ້ງໜ້າໃນການປະຕິບັດໂທດ, ກົດລະບຽບວິໄນຂອງຄ້າຍຄຸມຂັງ-ດັດສ້າງຢ່າງເຂັ້ມງວດ, ເປັນແບບຢ່າງທີ່ດີໃຫ້ແກ່ນັກໂທດດ້ວຍກັນ ຈຶ່ງຈະໄດ້ຮັບການອະໄພຍະໂທດ ແລະ ຜ່ອນໂທດ ຕາມແນວທາງນະໂຍບາຍຂອງພັກ – ລັດ ຂັ້ນເທິງ, ຜ່ານການຄົ້ນຄ້ວາການອະໄພຍະໂທດ – ຜ່ອນໂທດ ໃຫ້ກັບນັກໂທດ ຜູ້ມີມາດຖານ, ເງື່ອນໄຂ ຢູ່ແຂວງ ບໍລິຄໍາໄຊ ໃນ ປີ 2019 ມີຈໍານວນ 85 ຄົນ, ຍິງ 14 ຄົນ, ຂໍ້ຫາ ຢາເສບຕິດ ມີ 79 ຄົນ, ຍິງ 14 ຄົນ, ຂໍ້ຫາທົ່ວໄປມີ 06 ຄົນ, ໃນນີ້ ໄດ້ຮັບການປ່ອຍຕົວ 02 ຄົນ.

ໃນໂອກາດດັ່ງກ່າວ ທ່ານ ບຸນມາ ບຸຈະເລີນ ກໍ່ໄດ້ເປັນກຽດໂອ້ລົມຕໍ່ບັນດານັກໂທດທີ່ໄດ້ຮັບການອະໄພຍະໂທດ-ຜ່ອນໂທດ ໃນຄັ້ງນີ້ ເຊິ່ງທ່ານໄດ້ຍົກໃຫ້ເຫັນຫຼາຍບັນຫາ ເພື່ອໃຫ້ນັກໂທດເຂົ້າໃຈຕໍ່ລະບຽບກົດໝາຍຂອງບ້ານເມືອງທີ່ຕ້ອງໄດ້ບັງຄັບໃຊ້ ເພື່ອຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຢູ່ໃນສັງຄົມ,​ ພ້ອມນັ້ນ ຍັງໄດ້ເນັ້ນໜັກໃຫ້ນັກໂທດທີ່ໄດ້ຮັບການຜ່ອນໂທດ ແລະ ບໍ່ໄດ້ຮັບການຜ່ອນໂທດ ຈົ່ງເອົາໃຈໃສ່ປະຕິບັດກົດລະບຽບຂອງຄ້າຍຄຸມຂັງ-ດັດສ້າງຢ່າງເຂັ້ມງວດ, ມີຄວາມບຸກບືນຫ້າວຫັນຕໍ່ຂະບວນການອອກແຮງງານ ໃຫ້ກາຍເປັນບຸກຄົນທີ່ມີຄວາມກ້າວໜ້າ ເພື່ອຈະໄດ້ຮັບການອະໄພຍະໂທດ-ຜ່ອນໂທດໃນຄັ້ງຕໍ່ໄປ, ສ່ວນຜູ້ທີ່ໄດ້ຮັບການປ່ອຍຕົວກໍ່ຈົ່ງກັບຄືນສູ່ຄອບຄົວ-ສັງຄົມ ແລະ ປະກອບສ່ວນທຸກວຽກງານຕາມການຈັດຕັ້ງບ້ານມອບໝາຍໃຫ້. ເພື່ອພັດທະນາຕົນເອງ, ຄອບຄົວ ແລະ ບ້ານເມືອງ, ເອົາໃຈໃສ່ທໍາມາຫາກີນ ອອກແຮງງານ ເພີ່ມພູນຜະລິດຜົນ, ມີອາຊີບທີ່ສຸດຈະລິດ ຖືກຕ້ອງຕາມລະບຽບກົດໝາຍໃຫ້ເຂັ້ມງວດ ເພື່ອເຮັດໃຫ້ຄອບຄົວມີຄວາມຮັ່ງມີ ເຂັ້ມແຂງ ຂຶ້ນເທື່ອລະກ້າວ.

Medialaos bolikhamxay