ໃນວັນທີ 11 ກຸມພາ 2020, ຢູ່ສະໂມສອນເມືອງຕະໂອ້ຍ ກອງທຶນຫຼຸດຜ່ອນຄວາມທຸກຍາກ ໄດ້ສະຫຼຸບປະເມີນຜົນການຈັດຕັ້ງປະຕິບັດວຽກງານໃນໄລຍະ 15 ປີຜ່ານມາ, ພ້ອມທັງວາງແຜນການທິດທາງໃນປີ 2020, ໂດຍການເປັນປະທານຂອງ ປອ ປະສອນໄຊ ອິນສີຊຽງໃໝ່ ຮອງຜູ້ອຳນວນການ ທລຍ ສູນກາງ, ໃຫ້ກຽດເຂົ້າຮ່ວມຂອງ ທ່ານ ພັທ ບຸນເນື້ອ ຫຼອງຄຳໄຕ ເຈົ້າເມືອງໆຕະໂອ້ຍ, ມີ ທ່ານ ກິພະຈັນ ໂພສາລີ ຜູ້ປະສານງານ ທລຍ ຂັ້ນແຂວງ, ມີບັນດາທິມງານ ທລຍ ຂັ້ນແຂວງ, ເມືອງ, ຫ້ອງການທີ່ກ່ຽວຂ້ອງ ແລະ ກຸ່ມບ້ານເຂົ້າຮ່ວມ.

ທ່ານ ຈັນພານິດ ພິມມະທັດ ຫົວໜ້າທິມງານກອງທຶນຫຼຸດຜ່ອນຄວາມທຸກຍາກເມືອງຕະໂອ້ຍ ໄດ້ລາຍງານຄືນຜົນການຈັດຕັ້ງປະຕິບັດໂຄງການ ໃນໄລຍະ 15 ປີ ນັບແຕ່ປີ 2005-2019 ໂດຍໄດ້ເລັງໃສ່ປະຕິບັດຢູ່ 5 ກຸ່ມ, 56 ບ້ານ, ເຊີ່ງມີທັງໝົດ 193 ໂຄງການ ມີມູນຄ່າທັງໝົດ 28.334 ລ້ານກວ່າກີບ, ໃນນັ້ນຊຸມຊົນໄດ້ປະກອບສ່ວນດ້ານແຮງງານ, ວັດສະດຸທ້ອງຖີ່ນ ຄິດເປັນມູນຄ່າ 2,2 ຕື້ກວ່າກີບ. ໂຄງການທີ່ໄດ້ຈັດຕັ້ງປະຕິບັດແມ່ນໄດ້ເລັງໃສ່ຕາມຄວາມຮຽກຮ້ອງຕ້ອງການຂອງພໍ່ແມ່ປະຊາຊົນ ທີ່ໄດ້ຄັດເລືອກເປັນບຸລິມະສິດຂອງກຸ່ມບ້ານ ແລະ ມີຄວາມເປັນເອກະພາບກັນ ຫຼາຍກວ່າໝູ່ແມ່ນຂົງເຂດວຽກງານສຶກສາ ຈຳນວນ 54 ໂຄງການ, ສາທາ 53 ໂຄງການ, ກິດຈະກຳສ້າງລາຍຮັບ 36 ໂຄງການ ແລະ ອື່ນໆອີກຈຳນວນໜື່ງ.

ຈາກນັ້ນ, ກໍ່ໄດ້ມີການມອບ-ຮັບ ໂຄງການຂອງ ທລຍ ທີ່ໃຫ້ການສະໜັບສະໜູນ ປະຈຳປີ 2019 ຈຳນວນ 14 ໂຄງການ ສຳເລັດ 100% ເພື່ອມອບໃຫ້ກັບອົງການປົກຄອງເມືອງ, ກໍ່ຄືຂະແໜງການທີ່ກ່ຽວຂ້ອງ ແລະ ບ້ານ ເປັນຜູ້ຄຸ້ມຄອງ, ປົກປັກຮັກສາ ແລະ ນຳໃຊ້ໃຫ້ເປັນປະໂຫຍດຕໍ່ຊຸມຊົນ, ຕໍ່ຈາກນັ້ນຜູ້ປະສານງານແຕ່ລະກຸ່ມບ້ານ ກໍ່ໄດ້ຂຶ້ນຜ່ານແຜນປີ 2020 ທີ່ຈະໄດ້ສືບຕໍ່ຈັດຕັ້ງປະຕິບັດ ຕາມການຈັດລຽງບຸລິມະສິດຂອງປະຊາຊົນໃນແຕ່ລະກຸ່ມບ້ານ ແລະ ໃນທີ່ປະຊຸມກໍ່ໄດ້ມີການປະກອບຄຳຄິດເຫັນຂອງບັນດາຫ້ອງການທີ່ກ່ຽວຂ້ອງອ້ອມຂ້າງ.

ໂອກາດດຽວກັນນັ້ນ, ໃນພິທີກໍ່ໄດ້ມີການມອບໃບຍ້ອງຍໍໃຫ້ກັບບ້ານ ແລະ ບຸກຄົນ ດີເດັ່ນ ໃນການປະສານງານ, ການຈັດຕັ້ງປະຕິບັດວຽກງານກອງທຶນຫຼຸດຜ່ອນຄວາມທຸກຍາກ ຕະຫຼອດໄລຍະ 15 ປີຜ່ານມາ, ໂດຍໃຫ້ກຽດມອບໂດຍ: ທ່ານ ພັທ ບຸນເນື້ອ ຫຼອງຄຳໄຕ ເຈົ້າເມືອງໆຕະໂອ້ຍ ແລະ ທ່ານ ປອ ປະສອນໄຊ ອິນສີຊຽງໃໝ່ ຮອງຜູ້ອຳນວຍການ ທລຍ ສູນກາງ.

ໂດຍ:ວິໄລວອນ ສິດທິໄຊ
medialaos salavan