ແຈ້ງອີກໃຫ້ຮັບຊາບຕື່ມຜ່ານມາເປັນການປະກາດໃນຂັ້ນສູນກາງ ເລີມແຕ່ໄດ້ມີພິທີມອບ – ຮັບໜ້າທີ່ຮັກສາການ ປກສ ແຂວງ ອັດຕະປືນັບແຕ່ ວັນທີ 23 ສິງຫາ 2019 ເປັນຕົ້ນໄປ. ໂດຍຊ້ອງໜ້າບັນດານາຍ ແລະ ພົນຕຳຫລວດທຸກພາກສ່ວນເຂົ້າຮ່ວມນີ້ ທ່ານ ພັອ ສີເວີນ ແກ້ວສີວົງສາ ຮອງເລຂາຄະນະພັກ ຮອງກອງບັນຊາການ ປກສ ແຂວງ ອັດຕະປື ໄດ້ເຊັນມອບຮັບໜ້າທີ່ ຂຶ້ນເປັນຜູ້ຮັກສາການຫົວໜ້າກອງບັນຊາການ ປກສ ແຂວງ ກັບ ທ່ານ ພົຈວ ທອງຈັນ ຈັນທະພົງ ຫົວໜ້າກອງບັນຊາການ ປກສ ແຂວງອັດຕະປື (ຜູ້ເກົ່າ) ເພາະຮອດກະສຽນພັກຜ່ອນເຂົ້າຮັບບຳນານແລ້ວ.

ຕໍ່ໜ້າພິທີດັ່ງກ່າວ ທ່ານ ພັອ ສີເວີນ ແກ້ວສີວົງສາ ຮອງເລຂາຄະນະພັກ ໃນຖານະຂຶ້ນເປັນຜູ້ຮັກສາການຫົວໜ້າກອງບັນຊາການ ປກສ ແຂວງ ຄົນໃໝ່ນີ້ ຈະສືບຕໍ່ຈັດຕັ້ງປະຕິບັດເຮັດວຽກງານທີ່ຫົວໜ້າຜູ້ເກົ່າມອບໝາຍໃຫ້ ເຊັ່ນ: ການເມືອງແນວຄິດໃຫ້ມີຄວາມໜັກແໜ້ນ, ເຂັ້ມແຂງ, ປັບປຸງບູລະນະຄ້າຍຄູ ແລະ ຕິດຕາມໂຄງການກໍ່ສ້າງ – ສ້ອມແປງກອງບັນຊາການທີ່ບໍ່ທັນສຳເລັດ, ຕິດຕາມແຜນຂໍງົບປະມານຈາກແຂວງ ເພື່ອນຳໃຊ້ເຂົ້າໃນວຽກງານສະກັດກັ້ນ ແລະ ຕ້ານຢາເສບຕິດ, ສືບຕໍ່ກວດກາ, ແກ້ໄຂ ແລະ ອຳນວຍຄວາມສະດວກໃຫ້ຄົນຕ່າງປະເທດໃນການຂື້ນທະບຽນ, ອອກບັດອະນຸຍາດ ພັກເຊົາ ແລະ ດຳເນີນທຸລະກິດຢູ່ ສປປ ລາວ ຕາມຄຳສັ່ງເລກທີ 62/ນຍ, ດຳເນີນການແກ້ໄຂລົດຢຶດ ໂດຍປະສານ ສົມທົບກັບພະແນກການທີ່ກ່ຽວຂ້ອງ, ປັບປຸງສູນບຳບັດຜູ້ຕິດຢາເສບຕິດ ໃຫ້ສອດຄ່ອງກັບແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໃຫ້ມີຄວາມເປັນເອກະພາບກັນໃນທົ່ວປະເທດ, ສືບຕໍ່ເປີດກອງປະຊຸມ 6 ເດືອນຕົ້ນປີ 2019 ແລະ ເຂົ້າຮ່ວມກອງປະຊຸມ 6 ແຂວງ 3 ປະເທດ ຫລື ການບໍລິຫານວຽກງານປິ່ນອ້ອມອື່ນໆ ແລະ ຄວາມຄືບໜ້າຈະເປັນໄປແນວໃດນັ້ນໂປດຕິດຕາມເບິ່ງນຳກັນໃນວາລະການຊີ້ນຳຂອງທ່ານ ແລະ ໃນກອງປະຊຸມໃຫຍ່ສະໄໝທີ XI ຂອງອົງຄະນະພັກແຂວງໃນຕໍ່ໜ້ານຳກັນ.